屋企→香港國際機場→日本名古屋機場→伊良湖view風呂酒店
今日七點要去到機場集合, 所以五點幾就起左身啦, 好辛苦, 但又好精神, 因為有得去玩啦~~~~
出門口時, 阿哥都未起身, 得老豆起左身, 貼番哂d眼耳口鼻後, check下有冇帶溜0野, 就出發去今日的第一個景點啦。由放我個筴係中型筴, 所以係唔滿的, 輕輕鬆鬆咁上路啦。跟據慣例, 坐輕鐵再轉船再轉巴士咁就會去到機場啦, 但遲到, 七點二先到, 算吧啦, 佢都預左啦, 放低passport俾個領隊, 再去寄埋行李, 咁就可以去食早餐啦, 以往我都會在大家樂食個大早餐, 但唔知點解, 今日唔肚餓, 所以只買左個飽飽食。響機場見到間disney shop, 真係好有衝動買0野, 但係要忍呀, 無理由家下買架, 要拎架。
八時五十分, boarding, 上到架機, 已經覺得架機好舊, 又迫, 好在我坐到最後, 可以將椅背放下又唔會俾人話, 正。九時十分, 準時飛啦, 我的旅程開始啦。由於這架機會經台灣的, 所以一小時十五分後, 就降落了。我地可以選擇留響機上或者落機行下, 咁係落啦, 我又返到台灣啦喎。落機後, 發覺中正機場好唔長進, 都係咁0既樣, 排隊那個位都係同想當年一樣。在中正機場的二十分鐘內, 行左陣書店, 跟住就上番機繼續我地的旅程啦。之前飛台灣之時, 已經派左個早餐飽飽俾我地, 再上機就派飯啦, 但係個午餐勁難食, 食左一啖放棄左, 我真係接受唔到呀, 好在有條古古力, 同埋今朝的兩個飽, 頂得下。派完飯, 我諗負責我個area的空姐是新的, 烏龍百出, 做錯哂d程序。而整隊人又好嘈, 真係勁嘈, 有個空姐把聲又尖, 真係想死, 佢地係咁傾計, 係好似街市咁傾喎, 嘩嘈到落機呀, 空姐的形象就咁破壞哂啦。
到達名古屋機場, 係下午三時許, 一去旅行, 幾本上我係唔多看錶的。排隊入境, 比上次去東京好好多, 半個小時拎埋行李, 乜都攪掂哂, 上次去柬京, 剩係過關都去左七十五分鐘呀。名古屋機場係一個新的機場, 係為左舊年愛知博覽會而建的, 所以超新。攪掂哂後, 由於我選擇左觀光團, 所以坐車的時間會比較長, 而是晚酒店也比較遠, 所以要坐三個鐘頭車先可以到達。但呢三個鐘的長途車, 我好叻呀, 無訓覺, 沿途見到好多在山上的櫻花, 見到好多田園景色, 見到好多叮噹住那種屋, 好正。長途車當然有中途站啦, 便利店使是我們的第一個景點, 由於知道今晚會食自助餐, 所以無乜買宵夜, 只買了著片及飲品。而在這個中途站, 就見到我最想見的櫻花啦, 開心死。
是晚酒店, 果然係靚view, 在房望出去, 全是海, 由於我地到時已經入夜, 見到外邊的酒店教堂勁靚。梳洗過後, 就食飯啦, 自助餐, 我覺得麻麻, 但係最好味的就是炸蕃薯仔, 超好食。食過後, 上房抖抖, 就去浸溫泉啦, 呢次係我第一次赤條條咁浸溫泉, 所以都諗過唔浸的,但係一場黎到, 無可以唔架, 所以決定一試。在室內浸過後, 本想走出去露天風呂的, 但已經好多人, 而D水又確實太熱, 我身體機能話我知, 今晚頂唔順啦, 決定放棄, 閃。最失望就係大部份人都係阿婆, 無0野睇, 噢~~~。但聽聞作晚的星星好靚。
4月8日 (星期六) 天晴
酒店→汽車渡海輪→鳥羽→伊勢神宮→伊勢古典街→鬼城美景→那智大瀑布→串本溫泉酒店
由於見到溫泉門口寫住日出時間為五點半, 所以決定晨早起來, 還樹morning call係六點。但係鬧鐘響過後, 發覺天已經光了, 太陽伯伯都升左上黎lu。天氣不太好, 因為想落雨的關係, 個太陽間唔中都係俾0的霧包圍住, 只見到光, 但咁樣又有另一番的美景喎。今日的早餐還可以, 吃館後就自己一條友走左出去酒店停車場影相, 好凍, 應該得幾度, 但有太陽, 都算還可以。
第一個景點係汽車渡海輪, 因為我地要去一個叫做鳥羽的地方, 如果坐車去, 要五個鐘, 但如果車連人撘船過去, 都只不過係一個鐘, 慳好多時間。到達時, 由於是星期六, 日本人是五日工作的, 所以好多時都會駕車去第二樹玩, 所以都幾多車排隊, 導遊好驚上唔到船, 否則要再等多一個小時先會再開船, 好彩大車唔係好多, 所以上到。上到船, 第一件事就係搵下有0野可以影下相, 由於未來一個小時都會在一隻船上, 無景可言, 加上尋晚未慣在外邊訓覺, 訓得唔好, 所以決定來一個早睡。差不多到的時候, 導遊就叫醒我地啦, 開始有d0野睇, 見到好多魚排, 又有養珍珠的排, 見到人網魚, 好得意。
落船後, 我地就往伊勢神宮進發, 呢個係我最想去的地方, 因為一向都覺得日本的廟好得靚, 一向都想睇鳥居, 或者係睇得金田一多啦。到達後, 見到好多人, 係好多, 因為有公司組團去參拜, 日本人參拜會著得好formal的, 男的西裝, 女的套裝加抖零高跟鞋, 仲要行碎車路, 超勁。到達神宮, 就開始見到好多櫻花啦, 勁靚, 好多呀~~~, 由於怕與那些日本人一齊入去, 所以要行好快咁入去個神宮睇下。入到去除左櫻花, 仲見到好多好高大的樹, 好壯觀。當我地去睇完廟之後, 回後一望, 嘩~~~ 一條黑色的人龍呀, 好長, 好在行得快。之後就慢慢咁行番去伊勢古典街逛街街啦。一條好有特色的街道, 一開始勁多食店, 但我只試左豆腐雪糕, 好味過ok好多。跟住就向招財貓舖頭進發, 因為決定買招財貓俾舅父做生日禮物。雖然有地圖, 但確實太多舖頭, 太相似啦, 所以都係行錯路, 去左街尾, 但係就俾我地見到我地入廟時經過的馬路, 一條左右都係櫻花的馬路, 好壯觀, 好靚。玩樂過後, 就係食飯時間, 午餐為鳥冬定食, ok啦。
跟住就去左一個叫做鬼城的地, 睇石, 睇左一舊話似枯櫨骨頭的石, 但我點都睇唔出, 我只覺得似豹。其實全個環境都係由被海浪衝激, 天然咁形成的, 同埋一到大風大浪時, 會吹到好似鬼叫咁, 所以叫做鬼城。玩樂過後, 又去那智大瀑布, 由於無落雨, 所以變左小瀑布, 好幼。但有條樓梯好正, 好高, 兩旁有大大棵樹, 好宏偉。
返酒店lu, 呢間酒店俾前一晚的酒店再靚dd, 放下包袱, 就去左shopping, 因為免稅, 係時候買手信啦。買完就去食飯, 今晚係食懷石料理, 由於預計到唔0岩食的關係, 我已經買定薯片, 杯麵作為宵夜。吃過飯後, 又去浸溫泉, 今晚決定再戰露天風呂, 我做到啦, 仲浸得耐左, 或者d水無咁熱啦, 但係今晚無星星。今晚住尾房, 但係好大, 足夠四個人住。
4月9日 (星期日) 天陰
橋杭岩→串本海中公園→櫻花→Tore Tore魚市場→三段壁→千疊敷→備長炭紀今館→梅工房→和歌山紀洲溫泉酒店
確實又係晨早起來, 對我來說基本上無所謂, 因為去玩特別易起身。今日早餐確實唔吸引, 所以食左兩啖就算。跟住就去最近酒店的景點橋杭岩, 基本上間房已經見到遠景啦。又係睇石, 但今次可以行出去睇, 行到好遠, 有d水"乙水", 好多生物, d小朋友搵到寄居蟹, 水蝸牛, 仲有d唔知乜。玩左一輪水, 就去串本海中公園。
呢個海中公園, 規模唔算大, 但係d海洋生物都幾特別, 最咁要係有海龜睇, 好鐘意睇龜架, 仲有龜bb添。之後就行一條好長的橋出去海中心再行落去海底, 好細, 好似好似個海咁, 但係由於有團友在上邊餵咁魚, d魚遊哂上去海面, 在下邊只可以睇到海燥,珊瑚等等。跟住就去睇櫻花啦, 但係好失望, 因為一路行都係見到d好稀疏的花, 已經出左大部份葉, 最大棵的櫻花樹仲完全出哂葉添, 花已落哂。但總算仲有d花0既, 但無左個震撼啦, 但都見到花落浪漫情境。由於早餐食得唔飽, 所以買左燒八爪魚丸食,但唔係太好味的。
跟住就去魚市場食飯lu, 同肥仔都唔係好食魚生的關係, 我地買左一盤蝦食, 好鮮, 又買左d前菜, 烏冬同埋豬扒飯, 個豬扒飯幾好食, 烏冬都唔錯。之後就到三段壁啦, 今次係睇岩洞, 無無聊聊行完走番上去買左燒魷魚食, 不錯。跟住又去三疊敷啦, 呢個又係天然美景, d石好似榻榻米咁, 但最好睇係, d日本人無聊行為。佢地刻左d字響d石到, 好勁, 刻好深, d字都唔錯，勁。跟住再去備長炭紀念館啦, 睇下長炭夠竟點整, 但買唔到黎用, 因為原條入唔到境。再去梅工房, 由於塞車我地晏左, 阻住人收工, 但佢有3D電影介紹梅的, 好過癮, 跟住就返酒店lu。今晚酒好攪笑, 我地住在平台那邊, 可以爬到出去平台玩, 半團人走左出去玩, 影相, 一樂也。
今晚由於訂左蟹做宵夜, 所以無買杯麵, 只買了少量零食。今晚晚飯係食Shabu Shabu, 都係咁啦, 仲有食左炸雪糕, 不錯。之後就去左浸溫泉, 呢間酒店有炭的用品, 同埋今晚係最後一晚溫泉, 所以決定浸耐d, 用下產品。今晚好叻, 玩個半個小時, 浸完後面都紅哂, 好似飲醉酒咁。浸完肚餓, 拆蟹食, 嘩好在訂左半隻, 好大, 但好好食, 剪開隻蟹腳, 好似食咁蟹雪條咁, 正到爆。食飽又訓~~~~早d休息, 明天決戰環球影城。
4月10日 (星期一) 雨
環球影城→大阪心齋橋→美國村自由購物→環球影城日航酒店
今朝早餐又係那些0野食啦, 無乜特別。但今日的天氣好差, 一早起身就見到落雨, 好無癮, 今日仲諗住在環球影城影靚架。早餐後第一個景點就係今晚的酒店, 我地先去那?瞭解下個環境先, 因為今晚住的酒店就係在環城影城隔離的日航酒店, 在酒店行去只不過係五分鐘路程。到達影城後, 就開始玩啦, 但仍然落咁細雨。但後期雨越落越大, 結果一路玩一路落雨, 又好凍, 玩到手腳冰冷, 真係僵哂, 對鞋變左四色nike, 但決定一次過玩盡佢, 還樹都濕哂, 又帶左雨褸去。最終我地玩左 3D的Terminator, Backdraft, Jurassic Park, JAWS, 4D shrek's Adventure, E.T. Advanture。咁多個遊戲, 最激都已經叫做Jurassic Park啦, 會由幾層樓高沖落黎。其間同左Hello Kitty影相, 雖然唔鐘意佢, 但見到無可能唔影架, 好難得咁落雨都有公仔走出黎。玩樂過後, 就慢慢Shopping, 去番d有蓋遮頭的shooping地帶買手信, 咁多日以來積壓住旳銀包, 終於出動啦。期間又有見到有其他的卡通人物走左出黎, 咁係要影下相啦, 影埋相就行番過去City Walk行街買Late Lunch食啦, 有得玩真係會唔肚餓的, 連飯連水都唔使食。過到去其實都四點幾啦, 又無乜時間, 就決定買個HamBurger食, 去左間叫做Mus Burger買上車食。買左個餐, 仲去埋一個賣固力果食品的舖頭作最後衝刺, 買百力枝, 本來想買盒超大的, 但係太貴, 唔拾得買。
跟住就後心齋橋出發啦, 到左心齋橋, 導遊跟我們講左在那?集合, 目標舖頭在那, 就分導揚標, 四出殺貨。唔明點解成個大阪, 咁少舖頭賣小熊維尼, d夾公仔又無乜正0野, 比起柬京又難夾好多, 只係夾到一個史力仔, 而肥仔仲全軍覆沒添。結果買左想買的東西, 手信又買埋, 滿載而歸。晚餐我們在一間日式餐廳食鐵板燒, 唔係太喜歡鐵板燒, 所以食左少少就算。食飯過後, 咁係返酒店啦, 放低行裝, 就向大阪梅田出發啦。由於未撘過JR的關係, 連飛都唔識買, 要問人。成功買到票後, 大阪迷失之旅就開始啦。上車, 由於唔知要撘幾多個站, 再望又望, 結果有個日本人走埋黎問我地想去邊, 我地話Osaka, 他說撘這架車對啦, 可能佢以為我地撘錯車呀, 佢好好人事。導遊講過叫我地去一個叫做阪急東通的地方就會有0野食, 有機舖。我地在大阪落左車, 由於無任何指示牌係寫住呢幾隻字, 所以就是但搵個位出左去, 見到有兩邊都好多燈的地方, 先去左右手邊望下, 唔對路, 再返去左邊, 今次就成功咁俾我地搵到東通街啦。一條直直的街, 人來人往, 由於時間好趕, 又肚餓, 所以就是但咁搵左間食餃子同炒飯的舖頭食埋個late dinner。跟住只剩下少少時間, 玩左陣夾公仔啦, 結果我夾左個小熊維尼掛飾。回程時, 諗住時但搵個入口, 入左去先搵番我地撘黎的櫻島線, 點知搵唔番, 結果問票務員, 佢叫我地撘大阪線在西九條再轉車, 由於其實唔太明佢講乜的關係, 而又見到個行車線係可行的, 就決定一試。上到去要等到12:08先有大阪線的車, 好擔心, 因為在去?時, 那個票務員說最後一班櫻島線係00:08, 所以好驚, 因為撘唔到的話, 的士費好貴。所以我再一次搵左個日本女仔問佢, 佢教我在呢邊等車係0岩0既, 但係要在西九條過對面撘番櫻島線, 而最後那班車應該係00:19, 好在問下, 個心定d。日本人d英文真係好差架, 但係佢地好用心咁幫你, 好好人事呀。成功在西九條落左車撘左架芝麻街列車, 我諗今次唔會錯啦掛, 芝麻街喎, 仲唔係返universal city。落左車, 出左閘, 個JR站就落閘關門啦, 好好彩, 立即鬆了一口氣。由於呢個行程係突然加插的, 因為個行程明明唔係住呢間酒店架, 所以無諗過會坐JR, 否則我會買定本書啦, 真係無地圖無剩, 得張酒店地圖仔架咋, 真係好鬼驚呀, 好在有驚無險, 但就體驗左日本人的禮貌, 同無禮貌啦, 因為見到醉酒佬會打職員架。最開心就係, 肥仔又真係會同我顛埋一份。
返到酒店, 去過便利店行個轉後, 就返房pack行李啦, 結果成三點先訓, 但無所謂啦, 明天都已經係最後一日。
4月11日 (星期二) 天陰
神戶地震碼頭→UCC咖啡館→菊正宗紀念館→Factory Outlet→大阪機場→香港
今朝早餐又係差唔多, 但最特別的係佢有兒童餐的用具供應, 而我呢個大細路, 咁係用兒童餐的火車頭公仔碟為自己炮制一份精美早餐啦。我用哂佢全部的兒童餐具, 雖然個早餐一般, 但係有左呢d用具, 真係會開胃d架。跟住就出發去神戶地震碼頭啦, 呢d景點確實無乜0野睇, 但係就感受到當年地震時帶來的後果。因為佢保留住某d地方, 俾人睇番當年個地裂成點, 又有d相俾你睇, 但係落住雨, 又凍, 結果影完相, ??上車啦。之後就到UCC咖啡館啦, 當然又係睇下買下啦, 本來好悶的, 但最好玩就係有D電腦俾你答下問題, 就可以做到咖啡大博士啦, 有張CERT, 仲有相添。但D問題係日文來的, 只靠估, 後尾有姐姐黎幫我地答, 所以拎到大博士証書, 仲用左超人死光黎殺死左隻咖啡豆恐龍添。
玩樂過後, 又繼續我地的行程啦, 菊正宗紀念館, 沿途其間都下著雨, 仲要唔細的, 都幾密, 但在這個時候, 我們的特別行程就出現啦, 我地架車俾架私家車撞呀, 駕車仲要不顧而去。其實個導遊係望住架車衝埋黎的, 我地直去, 私家車打橫的, 佢已經同個司機講左叫佢留意同埋叫佢*剎車啦, 好在我地架係新車, 而個司機技術又好好, 架車唔係剎得好急的, 而全車人又無訓覺, 好好彩地無人撞親。但私家車就飛左個LING出黎, 我地架車花車少少, 但都要報警。結果一來就來左三個架線羊仔, 一個架單車來的警察, 攪左成半個鐘, 先再有兩駕警車, 拎個相機黎影相, 結果攪左成個鐘頭。但好攪笑係, 佢地有佢地攪, 我地就係咁影相, 雖然出邊落咁橫風橫雨, 但係我地後尾都忍唔住落埋車黎影相, 因為呢D0野, 唔好有第二次啦掛, 最後連個警察都俾D團友捉住黎影,而有一個最笑我地仲乜鬼咁都影, 勁攪0野。
攪掂哂就起行去睇日本酒啦, 菊正宗係一間生產SAKE的酒公司, 又要聽埋D歷史, 我咁係使出一招借尿循啦, 閃左去周圍影相, 又去左試酒, 梅酒確實幾好味, 但係21%alcohol實在太高啦, 唔敢飲咁多。
今日午餐係自費的, 但又唔太肚餓, 所以在Factory ourlet 買左碗拉麵同埋燒八爪魚丸食, 不錯。在Factory outlet無乜0野買, 大部份都係名牌子0野, 波鞋在花園街仲平過佢, 無謂搬啦, 所以都只係買左d手信咁, 好快就行哂啦。之後就去機場, 五分鐘路程就到啦。到左機場, 又要坐無人駕駛列車先可以去到入閘處。入到去作最後衝刺, 因為諗住用埋d 硬yen, 買左杯蜜瓜雪糕, 勁好食, 好鬼鐘意在日本食蜜瓜雪糕架, 真係好好食。仲有錢剩, 買左手信, 最後仲買左盒百力枝先上機, 勁, 剩番幾蚊, 算。今晚的晚餐係飛機餐, 比起去程時好味好多, 由於我係non-beef 的關係, 係一早派餐的, 我食完, 肥仔先有餐食, 今餐好味好多。經過四小時的機程, 就返番去繁的香港啦, 即係五日的關之旅就咁結束啦。
本來哥哥黎接我的, 但係我早左到, 佢又未出門口, 所以要自己撘船, 佢響碼頭接我, 好彩我無買到pack箱0者, 呢次係唯一一次無pack箱回來, 嘻。整個旅程又靜, 又動, 又驚險, 又刺激, 都算不往此行啦。
4月12日 (星期三) 晴
屋企→屯門圖書館→屋企
今日係回港後的第一天, 訓到十二點幾, 彈起身, 去左食我最愛的成仔記雲吞麵, 跟住就去左圖書館幫哥哥借書, 玩樂過後, 咁當然係返歸食關太私房菜啦, 幾日無食過啦, 仲有湯水, 正。因為肥仔屋企人今晚先返香港, 佢無飯開, 所以都上埋黎開餐, 有人陪我睇電視, yeah~~~
4月13日 (星期四) 晴
屋企→又一城→旺角→屋企
今日終於有機會去睇案內人呢套戲啦, 因為剩番三間戲院上, 所以就揀左又一城AMC啦。到達又一城後, 撘lift時見到小儀, 我問肥仔係咪, 佢話邊有咁靚呀, 唔係啦。但我見到有其他有都竊竊私語啦, 我斷定係。出lift後, 我見到佢行去log on放向, 所以跟住去, 原來log on今日係裝修開張, 搵佢做司儀。咁未開始, 我地就走去買飛先, 再折返, 就開始拉, 原來仲有森美添, 個show完左, 我地搵左森美同埋小儀影相呀, 開心死, 我幾ok佢地架。
之後就去睇戲啦, 無悶場, ok啦, 其實有少少唔明的。之後去番旺角食飯, 食左壽司, 麻麻地, 又多人排隊, 但新0野, 試下0麻。
4月14日 (星期五) 晴
屋企→碼頭聯邦酒樓→海翠坊→錦田龍華酒樓→屋企
今日如常十二點起身, 同媽媽哥哥去左聯邦飲茶, 飲完之後, 就去左海翠坊, 見到大班麵飽可以即整蛋糕, 而又有二磅咁多喎, 所以決定一試。其實係買俾阿爸同阿婆的, 佢兩個都生日。由於要等蛋糕, 同媽媽行到落去蝴蝶?街市行添, 拎番個蛋糕, 就返歸啦。抖陣, 就再出發去錦田食飯啦, 順便派埋手信俾舅父佢地啦。食過飯後, 就返歸打機lu。
4月15日 (星期六) 晴
屋企→尖沙咀→屋企
今日勁呀, 二點先起身, 跟住約埋肥仔, 食左個tea, 就向尖咀出發啦, 其實都無乜0野行架, 但無聊咪去行下0羅。其間肚餓, 周圍搵蜜瓜味雪糕食, 搵左好耐, 終於搵到, 但係無日本的咁好食, 但係個芒果味就不錯。無0野好行, 就早早返歸睇電視啦, 睇到電車男, 電視版確實好睇過電影版的, 個男主角似模似樣好多, 好笑d。
4月16 (星期日) 晴
屋企→旺角海天酒樓→Charlie Brown Cafe→新墟大牌檔→甜不甩糖水舖→屋企
晨早起來, 就飛出去旺角飲茶, 由於我地係諗住飲下午茶的, 所以要等時間到先入得去。今日的目的係同班豬朋狗友聚下, 派埋d手信, 睇下相咁。間酒樓都算唔錯呀, 我地真係老啦, 要飲茶黎聚, 哈哈哈~~~。席間, 我地同威爺doris的感覺都係怪怪咁, 格格不入咁, 家下連威爺都係, 我地都諗唔明原因, 問乜唔答問, 有心敷衍我們咁, 好唔開心。
跟住就去左波鞋街, 同埋好景行左陣, 就去左Charlie Brown Cafe啦, 有charlie有史路比咁的特色cafe啦, 但係都幾嘈。席間無0野做, 咁係鬥機啦, 不錯, 其實都係hea住咁等全全黎接雲妮, 因為佢地今晚會睇陶?演唱會, 威爺實唔會照顧佢啦, 所以我地唔會咁無義氣放低佢0既。等埋全全黎, 玩多陣, 就各散東西啦。我地就同左unique, astley返左屯門食晚飯, 今晚揀左在新墟大排檔食打冷, 都ok呀。之後咁係食埋糖水啦, 席間又講又笑, 幾開心, 好鐘意咁樣傾下計。飲飽食醉後就返歸啦。
4月17(星期一) 晴
屋企→新屯中酒樓→屋企
今日係最後一日假期, 真係唔捨後, 唔想起身, 但係十二點時俾哥哥叫左起身飲茶。新屯中呢間酒樓, 真係唔係咁好食, 但算吧啦, 好一餐唔好又一餐。返屋企, 睇左陣報紙, 就開始睇The Lord of the Ring最一集, 四個鐘呀, 係四個鐘呀, 肥仔決定放棄, 所以佢唔陪我睇, 在家訓覺。結果今晚睇左三個鐘頭, 因為我要睇其他電視, 留番一個鐘遲d埋啦。好唔想訓覺, 成日覺得遲d訓, 個假期咪好似無咁快完咁0羅, 呢個自欺欺人的想法, 所以我兩點先訓, 亦即是這個Happy easter holiday完結啦。
沒有留言:
發佈留言