梅窩瘋顛三天遊

十月二十八日 (星期六)

朝早當然是返工啦, 個個星期六都要返工, 真討厭, 呢d咁0既大公司, 又話與時並進, 除左賣樓那個價錢係與時並進之外, 所有policy都係落伍的。放工返歸執行李, 同埋用最快速度睇埋本射鵰第一本書。執好行李, 出發去睇演唱會, 先在味精拉麵吃過晚餐, 就過去紅館啦。

今日係雲妮介紹新朋友俾我地認識的大日子, 我當然係要保持神秘感加埋少少興奮的心情去啦, 新朋友叫阿邦, 確實有少少威爺的style。何cc演唱會, 好有梅姐的影子, 尤其是前大半部份, 真係幾似, 佢d形態, 舞台風格都好似。佢一開場就話會唱到十二點, 死啦, 我要趕十二點半班船, 最遲十一點半要走啦, 結果十一點時, 我望住個鐘, 佢多謝人多謝左五個半字, 十一點半先帶阿sammi出黎做嘉賓, 激死, 結果我按耐唔住要睇埋sammi, 呢part係成晚最好睇的, 但到左十一點九仲未唱完, 我真係要走啦, 結果全場觸目咁走, 因為當時係無人走的, 好在一到左巴士站, 見過海車就上, 到左中環先算, 結果十一點廿幾分去到碼頭, 趕得切。一點到入到去, 就食我的夜宵杯麵薯片啦。

十一月二十九 (星期日)

今日哥哥, 迪迪同ling ling都要排練, 所以哥哥一早就出番去城啦, 而我同肥仔兩個霸佔哂成千呎的屋, 一樂也。
十二點幾, 行出去食個午飯, 跟住在銀礦灣一帶漫游左一陣, 好熱, 跟住行番去買野準備今晚的bbq。哥哥出門時同肥仔講, 令願買少d, 買多兩個杯麵, 癈事食唔哂d野。結果我買野買到三點, 去買今日報紙時, 感受到梅窩人的熱情, 因為我買一份今日報紙, 叔叔問我係咪燒雞翼, 跟住佢俾左三份過期的太陽報俾我透爐, 其實太多啦, 但係熱情難卻, 所以無退番d俾佢。

返到屋, 睇左隻迪士尼花木蘭, 又幾好睇喎, 好鬼攪笑, 佢將d鬼佬野混埋入去套戲到, 好過癮的。跟住五點到, 就行去沙灘玩啦, 本來想睇日落架, 但係miss左, 結果去玩左陣沙沙, 再去買炭, 買完返到去都入黑啦。佢地仲未走得, 肚餓又食野, 一日食左三包薯片啦, 好放縱自己, 跟住訓鬼著左, 攪到連正字都唔係睇左好多。

佢地入到黎, 我地就開始bbq啦, d野食剛剛好, 只係剩番少少, 五個人用一個大爐, d粟米?哂, 每條都只係剩三分一或者一半。燒到十二點幾, 突然間聽到人地拍門, 原來警衛叔叔黎叫我地唔好咁嘈, 話隔離屋好早起身的喎, 咁我地咪散band, 執野0羅, 沖埋涼, 兩點幾先訓, 五個人住千幾呎屋, 勁舒服。

十一月三十日 (星期一)

今朝要九點起身, 因為十一點要交屋, 是日行程是放風箏同埋踩單車。ling ling整埋尋晚d野食黎做早餐, 跟住就去海灘風箏啦, 隻野係迪迪由雲南用左廿蚊買番黎的, 好大隻, 個線轆係好大陸0個隻架, 在北京見過。之但係我地放極都放唔起, 跟住我有一次拎住隻野係咁走, 本來得架, 但係放線的, click實左個轆呀, 結果又唔得。後尾仲玩到唔見左粒絲帽, 無得玩, 收隊踩單車。

計劃係, 由於ling ling 係梅窩本土人士, 仲有間屋在這?, 我地決定放低d袋去佢家?, ?去銀礦瀑布。原來佢屋企好遠架, 踩單車都係十幾二十分鐘先到, 仲要係上山, 仲要行小路, 我咁渣邊踩到呀, 結果大部份我都係推入去, 有次我仲撞到飛哂籃籃內的水樽出黎, 而佢間屋真係好遠, 真係踩到腳軟。入到去, 間屋其實係隻貓住的, 佢媽媽一個月筅返黎一次, 屋的周圍好鄉下的, 荔枝樹, 西柚樹, 番石榴樹, 好多唔同的植物圍住間屋的。

放下行裝, 再出發去銀礦瀑布, 好在好多地方都係平路, 條路又大, 我踩到架, 入到去, 佢地玩水, 我就同肥仔係咁諗, 點先可以爬到上d石到, 結果肥仔差d滑下去, 嚇死我, 我捉到佢幾實呀, 後尾我表弟過左去先, 一個佪咁再過去。影完相, 走時又到哥哥差d滑到, 肥仔又滑埋去哥哥到, 又嚇死我, 幾驚佢推埋哥哥, 兩條友一隻飛左落去呀。

玩完出番去食野, 要踩馬路呀, 好驚呀, 係咁同自己講, 唔驚唔驚, 踩快d, 跟住迪迪, 同埋聽實後面有冇車黎咁, 條死仔又唔話知要轉出去, 等我又撞埋條柱到。食飽飽, 又話要踩返入去拎行裝, 還車, 又踩馬路, 但唔知點解, 心理壓力好大, 我真係唔想踩, 真係踩唔到, 連馬路都唔敢過, 呢邊條路有條大斜由山落黎的, d車係唔收油的, 仲驚, 真係一路踩一路想喊, 一路叫唔踩啦, 肥仔不斷同我講, 去啦, 唔好理d車,佢會避你的, 但係我好驚我一驚就扭, 撞埋架車到, 結果係有van仔, 大旅遊巴士, 私家車, 係咁在我身邊過, 過到去直路, ok, 又可以踩番好, 但係有條馬路仔要過, 對面仲有兩條柱, 我過唔到, 撞左埋去個欄到, 0個下尖叫係最大聲的, 嚇死哥哥即急?, 而肥仔又在我後邊急剎, 而我好最好就係識跳車或者係用腳落地, 所以無反車, 但係個心已經跳左出黎, 嚇到喊左出黎。而哥哥佢地就繼續踩入去, 幫我拎番D行裝出黎, 肥仔留低陪我, 跟手去還埋車。呢次旅程真係嚇死我啦。

還完車, 又行去馬頭坐橫水渡過長洲食野, 在船上, 食左碗好好味的豆腐花, 又實又滑, 好好味。過到去食左魚旦, 大大粒魚旦, 同埋芒果糯米茲, 走時仲買左盒魚旦返屋企, 仲買左D糕糕返去俾媽媽食。回程其好飽的, 但都決定返元朗食泰國菜, 好好食的咖啡蟹包, 蝦刺生, 豬頸肉, 同菜菜, 五個人三百幾蚊, 唔貴但好好食, 多謝哥哥。

三天消費每人都只不過百幾蚊, 結果我同哥哥, 肥仔包起, 請埋兩個細的。