年初三 - 見家長日

今日哥哥帶女朋友見家長呀, 本來諗住幾個飲茶算吧, 但點知姑姐又話入黎拜年喎, 結果一行十四人飲茶。

本來約左肥仔十一點出門, 幫老豆搵位, 但我差唔多十一點先起身lor, 勁呀, 呃左佢添, 哈哈。

十一點幾, 姑姐佢地來了, 招呼過後, 而我同肥仔去老豆到接力, 點知都要等左成個鐘先有位。

個女仔真係慘啦, 一見就要見十三個陌生人, 幸好佢都唔係怕醜的人, 都算係咁, 黑黑的, 大我兩年, 靚唔算靚, 正正常常咁啦。最好笑係, 我等位時, 又餓, 又倦, 好嬲, 好想發脾氣, 係咁係到打機, 結果我媽找去買左件三文治俾我, 塞住我把口, 費事我發脾四嚇親人, 哈哈。而佢兩老, 當然笑逐顏開啦。

飲完茶, 哥哥, 女朋友, 舅母, 肥仔與我, 諗住去林村一遊, 掟下棵膠樹麻, 點知去到勁塞車, 又無位泊車, 唔等, 舅母話再去入d啦, 入鹿頸一遊啦, 好靚架。去到鹿頸, 又確實真係靚喎, 唔怪得之d學校每年都來這裏觀鳥啦, 那個孤島, 我想候鳥回巢時, 會在那裏住的。這兒確實比起白泥靚, 紅樹林都比白泥靚好多。有個廟係附近, 我地又參拜一番。

再入去, 去左一間舖頭到吃豆腐花同埋西多士, 西多士ok啦, 好明顯呢間士多係行完山的人落腳點。吃飽就走啦, 出番去, 去伯婆到拜年啦。我覺得今年伯婆唔係太開心, 好似好多野憂心咁。

探完伯婆, 就同舅父舅母去左虹橋吃晚飯, 麻麻地又貴。女朋友真係慘啦, 一舖見哂我d親戚啦。