傷殘龜日誌

2009年7月28日 (星期二)

放工回程途中, 頭痛到爆而熟睡的我, 到達豐景園, 就快要落車了, 諗住坐返好, 醒下等落車之時, 就係呢一刻, 條腰突然扯住, 硬左, 勉強落車, 行返屋企時, 勁痛, 連右腳都扯住, 真係"吉"下"吉"下咁行到返屋企。諗住訓一陣無事啦, 但都係唔鬆, 結果即刻落左街看醫生。

2009年8月1日 (星期六)

過了一星期, 腰鬆了, 只係dup頭時, 會有點先痛。是日, 行左一日街, 目的都係為左新居, 先去旺角, 再去尖沙咀, 最後係九龍灣。整天都沒有事, 行得走得跑得食得訓得, 但點知, 返到屋企, 放下行裝, 只係同哥哥講左兩句, 條腰又扯住, 但今次沒有上次咁嚴重, 留待明天再看醫生。

2009年8月4日 (星期二)

這幾日頭痛到爆的我, 今天真的要冧廠了, 整天都是暈暈的, 完全集中唔到精神, 每人路過, 都一定看得出我病。剩番我一個, 無可能請到病假, 很辛苦咁過左一個早上, 個個同事都叫我走啦, 但點走, 得我一個, 諗住訓一個lunch, 會好d, 但沒有好轉, 又暈, 又反胃, 連我老細都叫我走, 後期老細去左開會, 我直頭趴左係到訓左, 佢返黎, 我話我真係頂唔住了, 早走了一個半小時。

2009年8月7日 (星期五)

慣常地, 蜷曲於梳化看電視, 之後去左沖涼, 彎低腰洗頭時, 一起身, 又扯住, 心知不妙, 拿拿聲沖埋個涼, 一路沖, 情況一路懷落去, 因為由腰扯到上頸, 好痛, 唔郁得, 硬哂, 諗住頂一陣會無事, 但真係完全郁唔到, 痛到眼淚一停留, 好驚, 坐在一陣, 決定去急症室。在急症室等兩個鐘係閒事, 肥肥趕來, 不停叫我放鬆, 但今次同之前唔同, 係一陣一陣痛, 好似抽筋咁, 坐係到痛, 企又痛, 行又痛, 後尾我連訓床都試埋, 發覺都係坐最好, 痛到在急症室喪喊, 真係好痛。

終於見到醫生, 唔需要超X-RAY, 佢話都係拉到肌肉, 打左支止痛針, 俾左消炎藥, 止痛藥。其實發生了小插曲, 幫我打針的姑娘, 剛俾人投訴, 我見佢預備針藥時, 還念念有詞咁同D同事講, 我邊有大聲同佢講野0者, 佢拎住支針問我打手定PAT, 我問邊樣無咁痛, 佢話你自己決定啦, 我話咁手啦, 我擰轉面, 諗住捉住肥仔, 佢已經拮左落黎, 打左啦, 好在佢無發脾氣0者, 都唔痛, 嚇死我。

2009年8月8日 (星期六)

今日約左舅公六點去佢到屋企做推拿, 諗住推返鬆D筋, 舅公一落手, 一按, 佢話你應該係坐得唔好, 由左脾筋骨引起的, 因為佢一按那個位, 我即刻大叫, 同埋佢話我D膊位呀, 好實, 全身筋骨都好實。舅公出手, 我按左成個幾鐘頭, 可以按的地方佢都幫我按了, 還用osim機, 幫我鬆, 震到我死, 開頭唔知乜機來的, 聽聲個感覺好似德州電鋸殺人王咁的, 按後的一刻, 確實地鬆了, 但我開始覺得對腳好yuen痛。今日做唔到對腳, 明天再續。

與肥仔吃飯時, 坐得真的很幸苦, 係超辛苦, 好想快d走, 好想訓下。返到屋企, 拿拿聲沖完涼, 貼藥, 成世女, 最憎就係d冬青膏味, 跌打味, 我成日話阿媽d油好臭, 點知, 而家自己間房沖積住呢d味。

整晚都訓得唔好, 基本上, 一個鐘起身一次, 因為訓到硬哂, 好唔舒服, 要起身行下, 坐下, 但係到左零晨五點, 突然間, 條頸又扯, 今次仲扯到上頭, 整個頭都扯住, 好恐怖, 又唔敢叫, 得兩老係屋企, 唔想嚇親佢地, 那一刻勁驚, 真係覺得自己會死, 好恐怖, 唯有只係記得肥仔叫我放鬆d, 我就坐在係到不停咁叫自己放鬆, 好左少少, 但眼見, 爸爸就快起身, 拿拿聲入返房, 訓返係到, 希望再鬆d, 幸好有好轉, 後期還訓著了。

由每一小時起身一次, 到後期半個鐘就起身一次, 一來訓得多, 二來訓得好辛苦, 七點幾, 起身吃了少少野, 飲左舅公的藥, 訓多陣又起身, 因為訓唔到了。

今日三點再推, 因為整晚都發低燒, 感冒還未清, 先飲一劑清感冒藥, 跟住一開始先針灸, 四支針拮在我的腳上, 然後今次舅公舅婆都有幫我推, 推完鬆了, 跟住就到大脾了。舅公按左幾下, 我已經大叫好痛, 跟住勁喊, 無可能頂得住, 結果舅公超勁快咁落左針再加埋拔罐, 因為無可能幫我按了, 幸好, 試按右腳時, 無乜野, 唔使推。

又由三點, 攪到五點半, 走人時, 條腿都係yuen yuen痛咁的。

2009年8月10日 (星期一)

仍然硬哂呔咁行, 慢慢咁行, 條腿仍然yuen yuen痛。

2009年8月11日 (星期二)

今日的情況not good, 成朝yuen yuen通, 已經搵熱水袋熱敷了, 但唔太work, 痛到行唔到, 老細叫我走啦, 我竟然係答我老細, 唔係我唔想走呀, 係我走唔到, 我好痛行唔到。食飯時, 連d同事都叫我走啦, 但我真係走唔到, 好痛, 好yuen, 文叔仲借埋佢個腰背墊俾我用住先。訓又訓唔到, 後尾實在頂唔住了, call左肥仔黎接我走。平時行去撘車, 很快可以到, 結果我諗行左半個鐘, 一個燈位時間, 我只可以過到半條馬路, 實驗證明左, 連阿毛都行得快過我。

一路行, 一路喊, 整程車, 斷斷續續咁喊, 媽媽打黎又喊, 爸爸打黎又喊, 好驚好驚, 以後都係咁。返到去搵靚仔醫生, 因為又有發燒, 真係可能感冒未清再加埋傷哂d筋骨, 咪又係食藥lor。

2009年8月14日 (星期五)

情況好點兒了, 但仍然是硬硬的, 已經比較好了, 覆診, 他說, 可能軟骨發炎, 再食藥。

2009年8月21日 (星期五)

過了多一個星期, 行得好了, 鬆了很多, 行得都快了很多, 其實可能係有食藥的關係, 無咁扯住, 但今天, 藥吃完了, 仍覺得後邊的背還有少少扯, 同埋兩邊小腿的肌肉扯住, 又再次去看靚仔醫生。這次他說, 可能有d軟骨突出來了, 壓著神經線那樣那樣。

2009年8月24日 (星期一)

再次覆診, 情況也是差不多, 結果今次轉介骨科了。其實己經可以提到腿同埋起到飛腳, 但都係有扯住。

2009年8月25日 (星期二)

返公司, 係到搵睇邊個醫生好, 搵開費安娜講開, 佢話佢之前看的骨科不錯, 在銅鑼灣, 唔太遠, 還樹boss唔係到, 叫我蛇出去看, 想著想著, 都是去攪一轉好了, 打電話, 醫生無乜人, 即刻起行去。

講左一個長故仔俾醫生後, 佢話應該係d筋腱未鬆哂, 唔使照, 跟住咪又係俾醫生話lor, 做多d運動啦, 咁後生連腳指都掂唔到, 行多d, 最好游水。結果食藥同埋去做物理治療lor。

其實講到尾, 都係積勞成疾, 坐得唔好, 成日hea 住咁坐, 家下買左張腰墊頂住條腰, 坐直, 同埋一d都唔敢蹺腿, 哎, 好番真係要多做運動先得啦