26/4/2011 (第一天)
由於中午機, 唔使天未光就起身, 仲可以去食個早餐才施施然撘車去機場。好唔慣跟團, 慣左自由行, 肥肥成日都提住我你跟緊團架, 你唔好周圍走呀。
由香港到首爾只係四個鐘頭的機程, 跟住拿拿林轉機去洛杉磯, 呢程機要飛起碼11個鐘, 好在機程都多戲睇, 同埋個位都闊, 好舒服, 只係唔係點訓到, 只訓到兩三個鐘咋, 全程睇戲, 睇左好多戲。大航機只係得一樣唔好, 就係個伴飯好難食, 其他野食都ok的, 同埋成日牛lor, 下次要mark定唔要牛餐。
架機飛得好快, 10個鬆d我地就到達啦。排隊等出關時, 發現個細喼爛左, 好在仲用到, 唔係唔知點算。等齊人過哂關, 跟住就上車, 直去拉斯維加斯, 車程要四個鐘, 沿途只係見到好多變型金剛咁的貨櫃車, 一片沙漠, 同埋一片片的山脈, 黃昏時好靚, 就係呢個靚鏡同埋搖下搖下咁, 就訓左啦, 約略兩個鐘後, 到達中途站, 食左個麥當當, 美國的麥當當真係好食d。之後再繼續行程, 跟住無乜點訓, 聽下個導遊講下野咁, 見到燈, 又未到, 等左好耐, 終於到啦。
第一個景點就係去左舊城區睇個天幕, 拉斯維加斯真係越夜越精彩, 好多人扮鬼扮馬咁去搵人影相賺錢, 但又扮得幾靚架喎, d性感女郎又企哂出黎跟柱舞, 街頭又有好多唔同的表演, 勁呀。睇完天幕, 就趕去睇水幕啦, 沿途見到的建築物, 真係好鬼靚, 全部都各有特式, 真係乜都可以影一餐。水幕, 都澳門永利差唔多的, 但澎湃好多, 佢用炸藥等d水射到好高, 但好鬼快就完左啦。跟住又去左間酒店睇下人地個花園, 係酒店入邊, 起左個花園, 全部用真花堆砌, 又新鮮又靚, 加埋佢d玻璃藝術, 好鬼靚。睇埋呢個就返酒店check-in, 預備明天去大峽谷了。
27/04/2011 (第二天)
晨早起身, 就起身去大峽谷啦, 今日係會跟個local tour的, 同埋班大陸佬一齊, 好在佢地都唔係好嘈, 但係佢地好鬼有錢, 又買野, 又成條大金鏈係身, 又ipad, 部相機都等於我成個團費呀。今日早餐又係麥當當, 但係豬柳漢堡, 暖暖地, 又好好味。經過個多小時的車程, 我地去到第一個站, 胡弗水霸, 巡例停低影張相就繼續行程啦。
下一站, 當然係去撘直升機啦, 首先我地要去左個地方磅重先, 我好好彩, 我坐到front seat, 即係坐係機師隔離, 好開心呀。跟住等左好耐, 等到訓著咁滯, 終於叫我地預備上機啦, 先撘一程車去停機坪, 跟住就架機黎, 會有工作人員協助我地上去扣好安全帶, 就全速前進啦, 真係好緊張, 因為我坐前邊, 係睇到腳邊的外邊的, 會見到自己衝落去咁架, 雖然恐怖, 有d位仲有d驚, 但真係好好玩。
經過數十分鐘的機程, 就到左谷底, 撘船啦, 好無聊的一程船, 其實只係俾你由下邊望番上去, 睇下有機震撼。遊完船, 又撘番機走啦, 返上去無咁開心, 同埋佢開得好快, 所以好快到, 個機師仲楂楂下, 拎部ipod出黎轉歌添。落機後, 就撘車去左U型玻璃橋行啦, 無得影相, 真係無乜人敢行出去個玻璃位到, 得幾個人行, 包括我, 我真係唔覺得有乜野喎, 係有少少驚, 因為真係好深, 但不至於行都唔敢行LOR, 肥肥就驚啦, 行左兩步走返埋去, 其實都係自己心理架咋, 又唔會跌落去, 你要相信佢的安全, 但如果係大陸那個, 就要認真考慮下。
行完, 就去拎我地個午餐啦, 都唔係太差0者, 仲有新奇士橙食。跟住就係附近影下相, 返撘車返去集合去那個什麼印第安人村, 真係把托, 臭到死, 係隻騾仔幾似"驢友", 仲好似笑緊最好睇。去完呢到之後, 就打道回酒店, 去食晚餐啦, 是晚係包的, 食BUFFET, 之但係那個BUFFET, 你要我自己俾錢食, 我寧願唔食, 唔係話佢唔好味, 只係填肚LOR, 成不蚊, 唔值。
食飽飽, 本來應該係返酒店的, 但領隊好好咁車我地返去睇埋其他免費SHOW, 一個係火山爆發, 一個係個海盜的水上表演, 呢個好睇呀, 睇完就同肥肥周圍去影下相, 影下巴黎鐵塔, 凱旋門咁, 真係真的一樣。跟住行過一間糖果屋, 好靚, 跟住入去睇下, 原來有雪糕賣, 咁就食左杯成五十蚊港紙的雪糕啦, 但好好好食, 好滑架。行到差唔到十二點, 就返酒店啦, 拉斯維加斯, 真係越夜越精彩, 十二點通街都係人。
28/4/2011 (第三天)
今日要離開拉斯維加斯啦, 一早起身, 吃過豐富的早餐, 個早餐係BUFFET, 但好似係BRUCH咁, 乜都有得食, 之後就出發去M & M 同可樂館啦, M & M真係好多野賣, D野好靚, 但好似買黎好無聊咁, 所以無買到LU。可樂那樹有點兒失望, 因為唔係咁大間, 同埋D野唔係太吸引, 都係影下相, 買少少手信算了。
之後, 就去FACTORY OUTLET啦, 最想去呢樹, 因為聽聞都幾多野買, 結果, 我買左件二合一褸, 肥肥買左TEE, 又係左CRABTREE俾阿妹, 收獲都唔錯呀。LUNCH係OUTLET 自已解決, 唔想食漢堡飽, 揀左兩餸飯, 唔知點解D外國人咁喜歡食兩餸飯, 好多人排隊買架, 之後都見到其他舖頭係咁。
買夠食夠就出返去LA啦, 又係撘四個鐘車, 又係在那個中途站等, 又係不停咁訓到LA, 到左後, 就去左間唐人街的中餐館食晚飯啦, 都未日落, 唔食得好多, 但其實幾好味的。最攪笑係肥肥未食前, 企係人地CASHIER個電視仔到睇NBA直播, 哈哈 。
食飽飽返酒店啦, 好早, 間酒店又係簡簡陋陋, 好在有電腦又有得上網, 唔係實悶死。
29/4/2011 (第四天)
今日係勁開心的一天, 因為我終於可以去到美國的迪士尼啦, 雖然唔係奧蘭多那個, 但係呢個係原裝架麻, 其實樂園唔係太大架啦, 但到左停車場, 都要撘一程車入去。領隊又好好咁, 帶左我地玩半日, 拎住張地圖帶住我地必要玩的遊戲, 邊D人多要玩先, 由於我地九點就入到去的關係, 開頭唔係太多人排隊, 但到後來就開始好多人啦。
美國迪迪尼, 門口其實同香港的一樣, 美國大街又係, 只係多左馬車同埋觀光巴士行。羅狗一早同我講左, 一定要玩INDIANA JONES, 而領隊都係咁推介, 同埋帶我地玩左先, 唔係越晏越多人。開頭我都以為係坐住架車係入邊行下, 點知係好刺激架, 有少少踫踫車FEEL, 係勁好玩呀。跟住玩魔盜王, 係坐船仔入去睇野的, 好似小小世界咁, 但係佢D造型勁似呀, 同戲入邊一樣架, 似到爆呀。之後去玩左小熊維尼, 但呢個係舊版, 架車唔同, 同埋好短, 唔係太好玩, 香港同東京個新版好玩D。
行過城堡, 呢個城堡勁唔靚呀, 好矮, 好唔GRANT, 唔童話架。跟住再去玩左巴斯, 都係同香港一樣啦, 射極都唔中。之後去左睇個3D SHOW, 係MICHAEL JASON打怪獸, 真係如果唔知係乜, 又有冷氣嘆, 真係唔好入去, 無聊到爆, 套野仲要係1986年拍的, 超老土。跟住再玩飛越加洲, 呢個又係推介項目, 都係3D的, 佢有三排位, 一開波就會全部升左上去, 再分高中低排, 我地坐第一行, 係升到最高架, 個感覺就係我係一隻鷹, 係加洲上空飛翔, 看加洲的日夜變化, 景色, 好爽, 好好玩呀。
玩完呢邊, 等到CALIFORNIA ADVENTURE PARK開門, 我地就過去玩啦, 一張票, 可以玩兩個樂園, 勁開心呀, 開頭仲同肥肥商量夠境去邊個PARK玩好呢, 點知領隊前一日話, 一張飛兩邊架, 即係唔使諗, 哈哈。
其實只係係迪迪尼呢邊, 行過對面就係架啦, 呢個PARK細D架, 一個圈, D遊戲係比較刺激的, 同埋係迪迪尼D 小角色擔當主角的。我地先去左玩蟲蟲特工隊先, 係4D SHOW來的, 開頭都以為係噴下水, 風咁, 有D野行過咁啦, 點知到左最後, 真係諗住完起身咁滯, 俾人係後邊"篤"左野呀, 好好笑, 個個都嚇一跳, 係扮蜘蛛"篤"我地呀, 呢野最勁, 最好玩, 真係估唔到。
玩完呢個, 領隊帶我地的行程完結啦, 我地要食自己, 所以先食飯, 再研究去邊D未玩的。今日食熱狗, 好好食呀, 我揀0個個, 肥肥那個就麻麻地啦。跟住去玩怪獸公司啦, 坐住架車, 睇下毛毛點救阿BOO, D境好靚呀, 佢真係可以做到D門係頭頂係咁飛, 我真係好似係間工廠到的。行過見到個跳樓機, 我唔敢玩啦, 因為佢好變態架, 佢停係中間時, 會開度門俾你風景, 跟住無啦啦跌埋落去。
基本上要玩的都玩哂啦, 差睇NEMO, 咁就周圍影下相啦, 見到乜就影乜, 再去排NEMO, 呢個排得最耐, 排左45分鐘呀, 係坐架潛水艇落去睇NEMO的, 雖然無聊, 但都OK的。跟住又去行下D SHOP同埋周圍影下相, 等夜晚睇激光水幕同埋煙火啦。
個激光水幕, 最初初都覺得OK的, 係幾靚, 但做左好鬼耐, 睇到有D悶, 佢一完SHOW即夜走人, 要跑返過去睇煙花呀, 因為隔左只係5分鐘架啦, 過到去已經開始啦, 都係煙花好睇D, 佢仲有個仙子吊係空中咁, 真係好迪迪尼的, 哈哈。
無食到晚餐, 因為諗住食酒店隔離間餐廳DENNY'S, 原來個個都好似我地咁喎, 結果成團人都去哂食, 呢個LATE DINNER, 食完都十二點LU, 但幾好食喎, 哈哈。
30/4/2011 (第五天)
今日都係要早起身, 因為要去環球片場呀, 又係期待的地方。因為頂唔順酒店的簡單早餐, 我地又去左DENNY'S食左個美式早餐, 真係勁好食, 好滿足。之後又驅車去片場啦, 又係九點去到, 無乜人, 乜都唔使排隊, 領隊又會帶我地玩半日, 入到去, 佢立即帶左我地去玩KING KONG啦, 呢個又係羅狗推介的, 連領隊都一齊玩, 你就知幾好玩啦。
我地先坐遊覽車去遊環球片場, 有個導遊講解的, 跟住一路睇荷里活D大片係點拍的, D場境係點樣做出黎, 其實只係一個個廠咁架啦。表演左D爆破場面係點拍, 入左個廠到, 眼下地震時, 地鐵站內會變成點, 真係迫真到爆, 又水又火, 跟住又睇下, 點樣無啦啦落雨落到山洪暴發, 簡真係目不暇給呀。當然最精彩係KING KONG啦, 我地只係帶左副3D鏡, 跟住入左個全黑的廠, 跟住就變左360度的場景啦, 係KING KONG打恐龍呀, 全場架車係咁搖, KING KONG又跳左上車頂, 超精彩, 好玩到爆呀。
跟住去左玩史力加, 又係4D的, 成面水, 但係又好好玩喎, 再玩返TERMINATOR, 好睇過東京那個好多。跟住再去玩SHIMPSON啦, 呢個又係一流, 排左好耐隊呀, 入到去好似卡啦OK咁, 分房, 跟住上左架過山車, 係咁搖, 係咁衝, 勁好玩呀。
玩完呢個, 就去左食午餐, 無野好食, 又係食熱狗, 好在都好食。要玩0既野都玩哂啦, 就周圍去影下相, 我想同隻吸血彊屍影相, 點知佢真係咬落黎架, 哈哈。基本上所有人物我都影齊啦, 係差獅子王咋。
集合後, 跟住就去左文氐戲院, 星光大道觀光啦, 行完就去左個農夫市場, 飲左支新鮮橙汁, 真係同細個媽媽渣的一樣架, 好FRESH。係到行下, 食下, 坐下, 訓埋, 跟住就要去機場, 結束呢個美國之旅啦。
2/5/2011 (第七天)
過左關, 我地好慢咁去拎行李, 因為我地知道咁早到市中心係無野做的, 出到機場都只不過六點幾。一路行, 一路去搵地圖黎拎下, 又搵個賣車飛的地方係邊, 買完車飛, 又要等一陣車, 跟住就撘巴士去酒店, 幸好呢邊d英文係拼出黎的, 同我地普通話差唔多的, 巴士d大站, 仲有普通話廣播添架。
到左新村車站啦, 落車, 先去酒店放低行李, 確實唔太遠, 落車直行轉右就係, 10分鐘都唔使, 超方便, 附近又有百貨公司, 便利店, 快餐店, 不錯不錯。放低左行李, 先去食早餐, 因為好肚餓。
晨早流流, 人生路不熟, 就是但食左個麥當當做早餐先, 呢到d人真係好喜歡飲咖啡, 跟餐都係咖啡的。個包唔錯, 係個咖啡難飲d姐。
咁早無舖頭開門, 就決定周圍行去, 熟習下環境先, 同埋打算近近地行去梨花女子大學。d人話基本十分鐘行到架啦, 我地行到去梨花站, 唔知行邊樹好, 我見到好多女仔向同一個方向走, 我諗應該0岩啦, 我地又跟住佢地行lor, 結果, 經過梨大shopping街, 過條馬路就到大學啦。
今日天氣好好, 涼涼地, 唔係太涷, 真係行得好舒服。間大學真係好鬼靚, 環境清幽, d建築物又靚, 花草樹木又多, 但係全部都係斜樓同埋樓梯lor, 唔怪得之韓國女子咁鬼廋, 行過d學生都無一個係肥婆, 日日咁跑返學, 乜肥都減到呀。
因為知道酒店係邊個方向, 同埋有現代百貨做據點, 我地就由另外一個方向走, 漫無目的咁走, 周圍去看看人家的舖頭, 還經過明洞教堂, 確實幾靚咁。
耐我地仲好似乜都行哂咁, 都未夠鐘食飯, 諗住今晚會食, 春川辣雞, 諗住搵定間舖頭係行, 費事今晚夜仲難搵, 點知朝早搵, 我地都搵左好耐, 行黎行去條街都無, 一條街都行左三四次, 終於俾我地搵到啦, 記住佢的位置, 我地就行去搵搵間部隊火煱, 真係行過左都唔知, 因為全部都係外星文, 問人又唔識問, 所以都係當d字係圖咁對啦。
入到去食野, d人又唔識英文, 都係俾本書佢睇我地想食乜, 跟住好在print左d韓文, 同埋本書個底都有, 起碼都拎到水黎飲下。呢個煱, 麻麻地, 唔係講到咁好食lor, 試過就算。食完野, 慢慢行去酒店啦, 好想沖涼訓覺。
沖完涼, 本來諗住訓一個鐘就起身去食野架啦, 點知肥肥札醒去廁所, 點解個天咁死0既呢, 原來已經夜晩九點架啦, 拿拿聲起身梳洗, 就出去食晚餐啦。
夜晚比起朝, 真係涼左好多, 但又不至於好涷, 呢d天氣真係好舒服。好在朝早搵定個位係邊, 我地好快就去到啦。
坐底叫左個煱, 著好圍裙, 姨姨落好哂d料, 我地就走去個自助沙律泡菜吧到拎野食, 跟住姨姨又會過黎幫我地炒, 最後落埋芝士食得。呢兜野真係好食, 唔係大辣, 但辣得黎好好食, 個芝士又香。
食飽飽後, 又慢慢行返去, 沿途舖頭都關哂門啦, 只係剩番d小販檔, 韓國真係好多小販檔的, 周街都係, 酒店附近大把, 唔怕無野食。
上房前, 係樓下買左士多啤梨, 同埋香蕉奶作為宵夜。
3/5/2011 (第八天)
去旅行咁多次都無試過訓到十二點先起身, 我諗真係jetlag的關係, 尋日訓晏覺都訓到九點, 今朝明明較左鬧鐘, 都訓到十二點, 超勁。拿拿聲起身, 又行返去大學區那邊, 搵左間日本咖喱飯醫肚先, d staff都係唔識英文的, 又係手指指攪掂。
呢到d麵豉湯好鬼好飲, 都唔知係咪心理作用, 我係香港係唔飲的。而泡菜又係必定任食的, 我叫的豬扒咖喱飯都好食呀, 又唔係太貴, 正。
食飽飽, 真正的旅程開始啦, 第一次去撘韓國地鐵, 全中文, 同埋d車站名都係國語拼音的, 所以只要聽實, 望實, 一定唔會落錯車。我地第一站係三清洞, 難得見到information centre, 當然係要拎番幅地圖, 定位左先, 跟住就開始慢慢行去啦, 其實路程唔遠的, 咪只係行錯左個方向, 兜左個圈lor, 但又會睇多好多野。三清洞, 簡單黎講係一條咖啡街, 條街唔長, 但超有特式, 間間舖頭的裝修就係一個景點, 全部都好靚架, 好突出佢間shop的性格, 係呢到行, 真係好舒服, 很喜歡呢個地方, 但由於剛剛食完飯, 無係到飲番杯野。
去完三清洞就去左仁洞寺, 其實只係對面馬路, 呢條街又係另一個特式, 整條街都係賣紙的, 好多唔同的紙張賣, 好多都好靚, 而商場中空設計, 唔需要電梯, 好似一個圈咁, 轉住落去, 而佢d舖頭都係賣型野的。
hea完就撘車去左明洞行, 其實呢到好似銅鑼灣, 但係行的感覺係由太子行到旺角咁。呢到真係乜舖頭都有, 我地主力係要幫佢同事買野, 入完貨, 又周圍行, 行夠就去左明洞餃子食啦, 講真麻麻地, 只係唔使食韓柴野咁咋。
食完又撘車返去梨大行下, 因為尋晚所有舖頭都關門了, 今晚終於可以一行, 結果在etude house失手, 我買左幾百蚊化妝品走, 鬼咩, 個sales又講國語又細心, d野又好鬼靚, 又平, 當然要買黎當手信同埋自用啦。買夠啦, 走人, 返左去樓下買左雪糕食, 就返酒店hea下啦。
係酒店有得上網真好, 無電視睇, 仲可以聽903, 正。
4/5/2011 (第九天)
今日唔敢咁晏起身啦, 十點到啦, 攪完一輪都成十一點先去食早餐, 自由行應該係咁的, 哈哈。
呢幾日見到通街都係coffee shop, 緊係點都要試下啦, 行左過去斜對面的ONE TREE HILL, 其實我之前已經睇中佢啦, 因為佢d麵包係有廚房焗的, 應該新鮮的, 一如我所料, d麵包好鬼好食, 而杯咖啡都好鬼好飲, 很喜歡。
食飽飽後, 又開始行程啦, 今日的目標係新沙桐, 一個稱為小法國的一條街仔。但結果, 去到唔識路, 閃閃書又只係簡介左少少, 地圖又無寫, 只係跟住書黎搵d地標, 結果我地應該係兜左個圈的, 入去d酒店, d人又唔識, 結果烈日當空下, 我地行左好耐, 都搵唔到, 想去鴨鳥亭, 點知又話好遠, 其間我地行左好多後街, 見左好多特別的舖頭, 最後結果我地自己靠自己, 根據書中的地標, 望住車睇的路牌, 因為係全中文的, 再定方向, 我地用左個半鐘, 終於搵到個地標, 終於似番個旅遊區, 有番d食肆, 入到去, 我都係覺得三清洞個感覺好d, 呢到全部都係賣名牌的, 高檔地方, 都係搵野食算。
去左間叫做school food的餐廳食野, 見佢有壽長同埋d似年糕的東西, 就叫左客芝士的, 同埋壽司啦, 已經叫1隻spicy的啦, 結果都係辣到噴火, 飲住冰水黎食, 連肥肥都話辣, 真係唔好隨便食d紅色0既野。
食飽後, 就撘車諗住去清溪川啦, 條溪係美化得唔錯的, 周邊就係東大門, 全部都係批發舖, 即係同深水埗無分別, 有心機真係可以執到平貨的, 因為太熱, 同埋無乜心理行, 都係入左d商場行算, 但眼見賣d野都係淘寶野, 都係行過算, 不過都買左頂帽, 雖然己經哂燶左, 但明天真係一定要用啦。
跟住又返新村食野啦, 因為唔知食乜好, 就是但搵左間食燒肉的, 都唔錯, 幾好食。
由於韓燒實在太好食, 而行行下, 又見到間再正宗d, 又再平d的, 決定明天再試。返酒店附近的超市行下, 睇下有乜賣, 搵到包紫蕃薯薯片, 好係好好食喎, 再加埋清熱號, 為一餐宵夜啦。
5/5/2011 (第十天)
今天的全日活動係參加"Hi Seoul Festival", 出發前係韓國觀光網到見到係呢個時段會有呢個節日, 呢個係一個非語言文化交流, 大致都係講韓國的文化, 同埋有不同國家的表演團體黎表演啦。而係網上又可以book位睇show喎, 見有魔術, 就book左呢個黎睇啦。
是日早餐, 食左第二間coffee, 呢間都係自家制的, 但係麻麻地, 連杯咖啡都係, 只係平d lor。今日無行錯路, 只係撘錯車, 早左一個站落, 結果行返過去, 好鬼甘, 真係行成半個鐘, 好在都準時到達, 拎得切飛。
拎完飛, 逐個攤位去望下, 見到好多韓國人, 一家大細在草地上野餐, 享受陽光的洗禮, 小朋友係個小池邊到玩水, 呢d先係放假, 個feel好到呢, 香港一定無。
夠鐘睇魔術, 會係一個帳幕到睇的, 無冷氣, 雖然熱, 但係真係好睇喎, 咁大個女第一次咁近睇魔術, 雖然唔知佢講乜, 但見到d韓國人笑得咁開心, 咁投入, 我估識聽埋, 應該仲好睇。睇完show, 好鬼肚餓, 但附近唔知有乜食, 同埋周圍無野行同埋睇的, 決定去返東大門搵野食, 夜晚再返黎睇show。
返到東大門都四點啦, 就試左韓國本地快餐店, 麻麻地, 但由於今日係兒童節, 佢派左個電筒仔俾我地呀, 韓國兒童節真好, 係公眾假期, 有假放真好。食完再一之行東大門, 通街都派波, 最攪笑係派橙lor。
行完就返去睇show啦, 呢個係一個外國組織的表演, 真係好好睇, 肥肥開頭話悶, 因為開頭都幾悶, 但後尾用吊機將d人吊係高空表演, 最後再放埋煙花, 真係不枉我花車錢返黎睇呀, 超好睇, 真係唔會有第二次睇到。
跟住返去新村食燒肉啦, 呢晚個燒肉仲好食, 係炭燒, 仲有好多配菜, 好好食, 仲平過尋晚0個餐呀。明天要走啦, 今晚要執好行李啦。
6/5/2011 (第十一天)
今晚最後一日, 都係掛住杯moca, 結果翻兜去食多次, 真係好鬼喜歡咁hea咁嘆早餐。
今日得一個行程, 就係行超市買手信, 結果又買左一箱野走。唔係咁肚餓, 係商場的food court攪掂埋, food court真係全日文, 指都無得指, 我地就影相俾個姐姐睇我地想要乜, 哈哈。結果又係辣到死, 真係唔好立亂食紅色野。
因為晏啦, 拿拿林走人撘車返去拎行李撘車去機場, 一路上都見到落雨, 好担心, 因為行去撘車係無遮無檔的, 好在返到新村無落雨, 拿拿聲拎行李走人啦。等左一陣車, 就上到車, 約一個鐘又到機場啦。
早左少少, 因為要退稅, 同埋諗住使埋d ron, 點知機場係使美金的, 頂, 我唔想唱散我d美金呀, 好辛苦先搵到間用得ron既, 又夠錢的。
一早知道, 韓國觀光局, 會有d小手作係免費俾遊客玩的, 剛巧見到有, 就玩左一陣, 多左一個手信啦。玩完行下, 坐下, 就坐飛機返香港啦。
十一日話咁快就過左啦, 真係唔係好捨得, 第一次無掛住屋企, 真係連打電話返屋企都係打得一次咋, 平時我日日都打的。我真係好開心可以衝到出香港, 同埋我未試過十一日廿四小時都見到肥肥lor, 真係十幾年都無試過, 哈哈, 最不幸的, 就係無諗到加洲的陽光真係咁猛, 我真係燶ed.
沒有留言:
發佈留言