一家五口珠澳遊

2008年10月26日 (星期日)

大清早五時五十六分, 已被兩老在外邊攪呢攪路嘈醒了, 還未到我預定的時間起身, 賴死唔起。六時許, 終歸都要爬起身, 原預定七時半出門到市中心撘巴士往中港城的, 但比原定早了半小時, 結果便打的往新墟坤記食早餐, 在粥店與肥仔會合後, 吃過早餐便往撘巴士了。

未到九點, 已經到達中港城了, 九時半才上船, 唯有過境後, 在等候室閒逛, 發現7-11與外邊賣的東西都不同的, 香口膠是可以整PAD買的, 當手信, 二百幾蚊盒架, 都唔平。上船過後, 船不滿, 與肥仔坐在一起, 倒頭便睡了。十時許, 便到達九洲港了。我們訂的酒店時在拱北那邊的, 要打的前往, 我與兩老一架車, 肥仔與哥哥一架車, 前往一間大家都不知道在那的酒店。BOOK這間酒店, 是因為佢新LOR, 見佢08年1月先開, D房間應該乾乾淨淨啦, 同埋D相的賣相都OK, 網上評語又唔差, 就BOOK左佢啦。

九洲港到酒店大約需要10分鐘車程, 都是20蚊人仔的車資。我們遇著的司機都應該沒有兜路, 因為他還問我們, 先前的是否一起的, 因為先前還在我們的前邊, 他還說有三條路前往酒店的, 我們行的是最快的了。到達酒店, 看見了大堂, 給我的印象都不錯, 很簡潔, 唔浮誇, 或者是一間商務酒店, 所以唔會咁誇啦。

在香港已經訂好了雙人房間及加床, 但職員跟我們說, 我們訂的房間已滿了, 將會UPGRADE我們的房間, 還問我們還需加床嗎? 我們當然說要加啦, 還樹都俾左錢啦, 我地訓唔訓一件事。上到房間, 都不錯, LCD掛牆電視, 一大床一小床, 梳化再加床, 基本上訓五個人都OK。再入廁所一看, 嘩嘩嘩, 好大個淋浴的地方, 只是一個淋浴的地方, 便是我家一個廁所三分二的的大小， 整個廁所, 大過我家兩個廁所加埋。還不特止, 還有曾在蛇口B&Q研究過的響頭頂的大花洒, 及似支咪的花洒頭, 一定要試試佢。

還未夠鐘吃飯, 跟據資料顯示, 周遭除了酒店的食店, 是什麼都沒有得吃的, 要出番去拱北中心位置, 大約需要行20分鐘, 我們決定行出去, 看看周遭有什麼事物。盲鐘鐘咁一定行, 在的士上, 我已經留意住大概的事物, 發覺我那架車行的路, 是比肥仔車行的路正常的, 經過的街都是比較旺的, 所以決定向那邊一走。一路上經過民居, 大型商場, 越行越旺, 也發覺珠海美化環境都不錯的, 行人路上都種滿大樹以作遮蔭用, 路燈都是別具特式的。慢行大概20分鐘, 真的到達市中心了, 肚子都餓了, 想找一間正正常常的酒家都幾難, 終見到有酒家了, 也是在酒店內的, 走了進去, 原來是吃川菜的, 小姐跟我說, 有辣有不辣, 那就這間吧。她介紹的不辣東西都很多, 還要很好食, 那個担担麵, 六蚊碗 (屋企食飯碗那麼大), 非常好食, 很出色, 吃了很多菜, 也只不過是二百三蚊到, 很便宜呢。

吃過飯後, 原定前往圓明新園遊覽, 乘公車前往, 在國內撘公車, 很清楚, 很方便, 跟台灣一樣。兩元五角空調巴士, 很便宜呢。但在巴士站前, 看到李寧版的專門店, 我此行目的之一, 便是要找到李寧牌, 買波鞋, 這間專門店很大, 有兩層半高, 一對波鞋最貴的都只是$3XX, 與香港相同, 其實我只是買來做運動的, 曾看NIKE, FUNCTION都是差不多的價錢, 但李寧牌的鞋, 拿起手輕到, 好似無野咁, 所以想一試。但還有旅程的麻, 決定還是去完回來買吧, 但殊不知, 反而我媽買左, 因為佢話佢對方便鞋著到腳痛, 還樹又想買鞋返工, 又看見佢想買的款, 便即買即著了, 一對都只是$1XX, 很便宜呢。夏裝還有七折, 我哥用百五蚊買了兩件TEE, 款是不差的。

SHOPPING過後, 便前往撘公車了, 到達後, 前往買票, 一看$120一個人, 老人都要$80, 即時打左個突, 還要今天的SHOW全停, 我想是CANON包左場, SHOW只做給她們看吧, 還有真的我們已在北京看過了, 或是將來再到北京再看吧, 所以我們決定打退堂鼓, 在門口拍照, 到此一遊, 便閃人了。撘番車去到關口落車, 行下關口的商場, 結果買左兩隻老翻wii, 那個商場全都是賣A貨的, 似足羅湖商業城, 但感覺起來比較無咁雜。下一站的目的地是華潤萬家, 在商場及大型超市來的, 近拱北關口。在商場及超市閒逛, 商場內的波鞋都不0岩心水, 我家下的心水是在前往安踏了, 因為在往圓明新園的途中, 我看見在李寧專門店附近的店舖, 全店買一送一。老豆死說是否買一隻送一隻, 我說不會, 點會咁架。逛超市後, 很累, 便找了一個COFFEE SHOP坐下吃一個下午茶, 食品不錯, 尤其是那兜沙律醬, 很好吃。坐夠, 吃飯後, 我嚷著要前往書城一趟, 見到書城唔買書, 對不起自己的。

這個書城, 來不及深圳的大, 書本種類也不算多, 起碼沒有那麼多我看開的"文學"小說, 但我都買了一本走。買書過後, 便前往安踏, 看看是否買一隻送一隻了。安踏股票, 沒有抽中, 便買對波鞋吧。老豆經過一番質問不同的STAFF, 證實了, 真的是買一對, 送一對的, 以高價錢的那對收費。便很雀躍咁試鞋了, 有一個STAFF幫助我們的, 鞋任試, 只要有碼, 還有新的, 五條友, 在這間舖頭逗留了個幾鐘頭, 結果買左四對波鞋走人, 平均每對$1XX, 著爛左算, 款都不錯的, 我覺得佢似ADDIDAS 的 FUNCTION鞋的。半日珠海遊, 五條友便買了五對波鞋, 真變態, 幸好, 肥仔將會明天提早返港, 先拿這些戰利品回港, 否則還有澳門手信, 點拎得咁多。

又SHOPPING完, 便找東西吃了, 找了很久都找不同一間心水酒樓或是餐廳, 結果落番去關口口岸商場, 吃一間有蔡瀾樣的餐廳吃飯算了。籠仔飯都不過不失啦, 竹筒飯好少少, 但蔡瀾推介的甜品...蔡瀾推介的食品真係信唔過, 都係信阿蘇好D。飯飽食醉後, 就撘打的返酒店了, 我們決定去按腳, 去到時看見, 按全身兩小時都只不過是$128, 按腳都唔貴得去邊啦, 決定一試, 否則明天行唔郁。但上房後, receiption打黎話我加床未俾錢喎, 中旅社咪收左我lor, 仲想收, 落去同佢嘈, 結果係內部問題, 低級職員同高級職員的分別。

哥哥唔去, 我地四條友落去按腳了, 店舖在酒店隔離, 落大堂轉彎就有門口入去了, 間野乾乾淨淨, 泰式風味很重的, 但一看便是正經的, 我地去到都只係剩番四個位, 一排位都坐滿了, 原來酒店客有88折的, $35/60分鐘, 抵。按腳後, 便回房試試那個花洒了, 真係幾OK, 好似淋雨咁, 但D水好似慢左D, 快D可能會打落黎痛, 那個咪型花洒頭, 我地曾估, 點沖呀, 好似好雞咁, 但又幾得喎, 淋浴區真係好大, 仲後好舒服。沖完涼, 哥哥都訓左了, 無啦啦老豆走黎話個電視點解睇唔到香港台, 又要老遠走去安頓佢兩老, 都話REQUEST CONNECTING ROOM架啦, 咪唔使走LOR。

整晚都睡得不好, 左右兩位的環迴立體聲, 攪到我無覺好訓。剛睡著, 右邊的那個便開始唱歌了, 制止右邊的那個, 又到左邊的那個開始, 頂, 兩個都唔知係咪夾埋的, 激死我啦, 張床好舒服架0麻, 好想睡一覺好的。

@我又去玩~~~

@酒店廁所

@周遭的環境不錯呢~~

2008年10月27日 (星期一)

八時許起來, 到酒店餐廳吃過早餐後, 就返上房間執野退房。退房後, 慢慢沿另一條路行番出去關口那邊, 沿途欣賞珠海的樹木, 環境, 珠海很細, 點行都可以到達目的地。尋晚我地已經鎖定了要去飲茶, 茶樓在關口再過少少, 叫做明星, 唔知同香港的有冇關係, 但食品唔錯, 又便宜, 佢都係在某一酒店內的。其實早餐都未消化時, 但都要食d野, 點心不錯, 很好食, 我又不停咁食排骨, 大陸食排骨真的很好。看著電視的新聞報導, 又是跌市, 我身在其中, 但心在玩樂, 看開了, 輸了又如何。

吃飯飯後, 就過關過澳門了。到達澳門, 緊係搵酒店車啦, 找了一輪, 終於在對面的紅色大樓找到了。是晚住宿假座回力附近的皇家金堡酒店, 我是經舅母訂的, 她公司的酒店, 員工價比較便宜少許, 加上會upgrade delux 房間的, 所以叫做便宜很多的了。我在很久以前曾經到過關閘這個地方, 但都是經過關到珠海便轉車往開平了, 那時還是早上七時, 關都未開便在等那種, 都唔記得咩樣了。

到達酒店, 先取房間, 放下行裝, 因為好重。receiptionist問我 : "do you have any registration receipt?", I said "No", 個receiptionist當場"o"咀, 咁我真係無呀0麻, 舅母叫我行入去講個名就拎得架啦, 之後俾個名佢check, 跟住佢即刻連張吉表都放低了, 拿了一個file出來, 資料已在內了, 此時, 突然間有個女子行出黎問我係咁"關小姐", 我說是, 她是一位PR MANAGER, 負責招呼我們的, 嘩...無人話我聽有此服務喎, 當堂受寵若驚, 她還給了我一封信說是大堂經理給我們的歡迎信, 還送了我們特飲餐券, 跟著便帶拎我們上房間去, 還幫我地開埋門那種, 還說有事可直接找她便行。wooo~~從未諗過會有此服務的, 仲要全程普通話交談, 幸好, 普通話我還可以的。

入到房, 房間很大, 很長, 但唔實用, 但那個廁所, 又係有一個大花灑頭, 今次仲要加埋, 有四個會噴水的圓圈, 好似好好玩咁, 今晚又要試下。坐下不久, 張小姐又打來問, 我們對房間滿意嗎?? 還有水果盤遲點兒送上, 嘩...服務真好。

享受完VIP服務, 便出發了, 決定先到"乙水"仔一遊, 在酒店行番出碼頭, 只是5-10分鐘的路程, 以前有間八佰伴係到, 會熱鬧d, 而家反而靜了。沿途看到11月份大賽車的準備, 開始set位, 整圍欄, 看台, 想當時一定很熱鬧了。目的地威尼斯人, 澳門塞車情況嚴重, 再加上四季酒店開業了, 酒店車需要經過她, 結果用了大半個小時才到達威尼斯人。

家中各人都未曾到過那裏, 驚見那樣的浮誇, 老豆見到老虎更是興奮莫名, 由他玩樂一番吧。今次我竟然找到蝴蝶袋舖頭, 價錢與泰國當然差d啦, 貴少許, 但比水貨平。臨走時, 見申請做會員無人排隊, 即刻申請番張先, 可以有免費船飛lu。日落西山, 由威尼斯人行番出去吃飯了, 因為肥仔要坐八點半船走, 我們便提早吃飯。因知媽媽的購買力驚人, 所以五時許便到達官也街, 看看現在的變化後, 便放她去買手信了, 我們決定買齊所有手信, 拿回酒店, 明天寄存, 那明天便不用大包小包行街了。除了買手信, 吃飯前當然要食番杯木康布丁先啦, 也不出我所料, 數十分鐘時間, 關太已經滿載而歸。

是晚吃蟹粥, 不過不失啦, 但係條鱔先有驚喜, 只係半條鱔咋, 好大舊, 好大碟, 但最勁係d肉係爽的, 彈牙的, 好好食。吃飽飽後, 便打道回酒店啦, 臨走都要買大菜糕回去做宵夜。返到酒店, 肥仔拎行李走人啦, 此時, 服務員又來問我們是否需要加夜床, 我想她以為我們會有五人在這裏留宿, 服務真好, 簡直有賓至如歸的感覺。

哥哥約左fd飲野, 我便帶兩老夜遊漁人碼頭了, 夜晚無咁熱0麻, 唔使咁辛苦, 十月都唔知點解咁熱的。我地先送肥仔去碼頭, 再選擇撘車去金沙, 由金沙慢行過去。一入金沙, 老豆又話要玩, 阿媽又話要看show。萬聖節的漁人碼頭跟平時不同, 就是成場都有d尖叫聲播出來, 同埋d燈燈無咁靚, 再加埋有d喪屍係到嚇人, 好鬼異。將近十時, 慢行回去了。回酒店後, 在lobby換購特飲, 普普通通的奶茶咖啡橙汁咁啦, 但行到咁熱, 有得坐, 有涷飲, 一樂也。

坐夠, 又走去酒店睹場行左個圈, 呢個賭場俾我的感覺係, 好似拍戲d非法睹場咁, 細小, 無老虎機, 只係睹, 但大細最少只係$50, d咁唔靚的睹場, 參觀完就算啦, 但竟然俾我撞到哥哥喎, 哥哥搵地方睹, 我就同兩老返上房lu。這時我緊係玩花洒啦, 澳門水力夠呀, 好玩好多呀。睇住阿so, 食宵夜, 一樂也。

2008年10月28日 (星期二)

八時許, 去又食早餐, 今日行程是在新馬路一帶遊。食飽飽好想眠, 結果又走返上房訓覺, 訓到大約十點零, 又收拾細軟退房了。落到樓, 已經見到張小姐了, 還有大堂經理, 兩位幫我們退房及寄存行李後, 我們便慢步走出去了。今天天氣睛朗, 天氣很好, 但很熱。我們選擇坐車在到新葡京, 開始參觀睹場一日遊啦。

在新葡京見識過後, 便到對面的永利了, 這是我一定要到的地方, 看過阿蘇介紹的吉祥樹, 真的很想一看。果然沒有介紹錯, 好震撼, 連老豆都話得。去完永利, 便過埋去對面的星際了, 唔知點解, 佢個酒店大堂, 會有一個女子, model身型, 短裙, 腳踏4吋高跟鞋在大堂與各遊人形相的, 眼見很受自由人人仕歡迎, 我覺得咁樣好似泰國看完人妖show咁, 供遊人拍照。

星際過後, 便往新馬路, 大三巴方向進發。去澳門, 點都要去大三巴一遊, 影張相架0麻。行完, 抖夠, 就決定往吃豆腐花了, 阿哥一路行一路問, 你點可以搵到間咁辟的舖頭架, 哈哈, 行到入去都唔認得點行番出黎, 無法啦, 好野係一定會記住的。吃豆腐花後, 行番去十月初五街, 食蝦子麵, 與同枱的婆婆撘舢, 了解澳門現在是怎樣的。

吃過中午餐, 唔知做乜好, 又行番出去新馬路遊, 去澳門, 緊係要去大三巴啦, 沿路較剪黨一個個咁埋身, 平日條街都咁多人的。去到大三巴, 天氣真係好鬼熱, 結果影左相後, 係到hea左陣先走, 跟住去食豬扒飽。其實我都唔知去邊到食好的, 新馬路呢頭喎, 好在突然間諗起, 曾在路途中看見勝利餐廳架喎, 跟住走返去十月初五街那頭找找看。每次去到這間餐廳的感覺就係, 係咪執左架啦, 因為個門口完全唔起眼, 看不到裏邊的本地澳門茶餐廳。呢到的豬扒飽並不是用煎的, 係吉列, 但唔油, 唔乾, 鬆化, 仲要咬落去仲有肉汁的, 連媽媽呢個唔太炸物人都話好食, 但無諗到個飽係咁大lor, 大約等於大家樂的兩個, 連埋茶都係$21, 抵到爛, 不過真係俾佢KO左, 好飽, 好滿足。係到坐左成個鐘頭, 抖夠後再出發。

吃飽又係散步時, 新八佰伴, 七層高的高檔商場, 並不是百貨公司, 價值係澳門的SOGO, 一模一樣的。行完, 英皇娛樂係對面, 又過去一遊, 呢間的特式係皇室FEEL, 有兩間金馬車係門口, 有兩條茂利, 外地人在扮皇室門口的士兵, 人地唔郁架0麻, 但呢兩個好八掛咁, 四圍望, 同埋入門後, 係腳踏金磚的, 地下透明玻璃下全部都係金磚, 真假就唔知啦。

係英皇又玩左陣, 就閃啦, 行返去新葡京那頭, 再行番去十月初五街食晚飽, 今晚食陶陶居。其實都係六點零鐘咋, 個豬扒飽實在太勁啦, 我還未肚餓, 但都照食。食品OK, 酒樓價錢, 都唔太貴, 比起食蟹粥平, 但個魚湯浸健康茶好食。食飽七點零, 行番去英皇拎車飛撘車返碼頭, 再返酒店拎行李。取行李後, 就撘番SHUTTLE返碼頭, 看看可否撘到八點半的船了。

過哂關, 其實即班的人上哂, 上緊STAND BY的了, 咪排隊看看可否上到啦, 結果我地係最後四個上到呢班船, 一上船就開船了, 船唔滿位任坐。

返到香港, 肚餓, 結果返屋企留下買番碗糖水食先滿足, 三日HEA之旅又結束啦。我同哥哥的結論係, 老豆唔行得咁多, 所以下次去旅行都係要跟團, 又或自駕遊, 點到點咁玩先適合。