由於九點幾機的關係, 要七點幾要到機場, 媽媽叫左哥哥車我地去機場, yeah。呢個旅程, 我本來都無諗過去台灣, 只係媽佢地請我去, 咁我先諗下。
check-in就去食早餐啦, 我地食左恒香棧, 有迪迪在員工價, 但正價我諗都唔係叫做好貴。食飽飽等上機, 點知等極都未得, 話等多幾耐幾耐, 先係派左水俾我地, 跟住又話唔得, 又等, 再派埋餅, 最後就貼埋張紙出黎話要維修, 估計十一點半可以起飛, 激死人, 兩次撘長榮都有d野咁。
結果我地遲左兩個鐘先到台北, 攪到我地司機胡大哥夠等啦, 我其實已經打左俾佢架啦, 點知佢已經去緊機場。
拎哂行李上到車, 胡大哥先車我地去酒店check-in, 跟住話帶我地去食小籠包, 佢話在中正紀念堂隔離, 還樹我都係諗住去架啦, 就去試試啦。
去到房，真的很不錯, 裝修及張大床, 我都很滿意。放低行李拿拿聲就去食野啦, 因為飛機餐唔好食, 所以好肚餓。胡大哥帶我地去那間叫做杭洲小籠包的, 佢話本地人好多時都黎呢樹, 平過鼎泰豐, 質素都拍得住, 確實地個小籠包又幾好食, 係唔知點解無醋, 只有豉油, 但煮過的, 都唔錯。
食飽我地就去遊中正紀念堂啦, 比我預定的時間遲了個多小時, 但還好天氣晴朗, 又有少少風, 起初我還擔心會落雨添, 因為過兩日會打風, 但好彩風和日麗, 還影到藍天白雲的靚相。
行完都成五點啦, 跟住我地就去淡水啦, 本來係諗住去睇日落的, 點知班機遲左, 攪到去到都天黑啦, 我知道舅父實喜歡這個地方, 因為佢由街頭, 真係牌坊下第一檔開始食啦, 檔檔都食下, 所以係呢條街行左好耐都走唔到, 同埋當然買左大量手信啦。
返到酒店都八點幾九點啦, 都唔知食乜好, 本來諗住FOOD COURT, 但係佢地又揀唔到野食, 跟住就上房放低野, 叫左迪迪打去問下牛肉麵收幾點, 話我地而家過去。好在打左電話, 老闆真係等我地, 實在太好啦, 佢仲煮定D麵等我地。
吃飽迪迪送佢地返酒店, 我同肥肥就去搵野行, 本來諗住行誠品架, 但十點幾就收, 周圍舖頭都係, 諗下諗下, 有個寧夏夜市係附近, 就去行下啦, 望住個地圖, 係個捷運站到兜黎兜去, 成個鐘都出唔返去, 結果都忍唔住行返出地面, 再跟車路再行, 行下行下行左成半個鐘, 終於都到啦, 寧夏夜市唔大, 同埋都幾地道, D野確實唔太0岩我地, 所以我地去左食豆花, 碗豆花都幾滑, 但我揀錯左花生, 所以又咸又甜, 都係食全甜的好。
行夠, 就返去酒店啦, 但惡夢的開始就黎啦, 就係個死人熱水爐, 由始至終我都知呢到D熱水爐係有問題的, 但無諗過我真係遇到LOR。D水一係勁熱, 一係唔熱, 是是但但沖完算, 因為都成十二點。
2011年9月25日 (星期日)
今朝CALL人上黎睇個熱水爐, 那個執房的姐姐都攪左好耐, 先有熱水出, 試左又真係OK喎, 咁我地算LOR, 出去食野啦。
今日去左排長龍店 - 阜杭豆腐, 真係好長龍, 龍尾真係排到後樓梯, 結果排左差唔多45分鐘, 其間同前邊那個姨姨傾計, 佢話呢間野平日都係咁, 一開門就排架啦, 佢都係駕左一個鐘頭車黎食, 都係假期先黎到。同姨姨傾計, 發覺基本上, 佢地香港的印象就係呃你去買野, 香港的旅遊業真係要檢討下。佢又提我, 天文台說過兩天會大雨, 因為有颱風來了, 不過我地都走, 應該沒有影響的, 台灣人真的很好, 真係好感動呀。
排到人家的制作工場, 應該排得值的, 見到那條油條, 同個蛋餅, 係咁整, 已經覺得好食, 最終也沒有拎我失望, 真的很好食, 蛋香, 油條脆, 第一次食咸豆漿, 古古怪的, 但還可以。
吃飽後, 就去國父紀念館啦, 呢D基本行程我去過哂, 我都係係到等佢地行夠走人, 其實家下都變了, 我諗拍左那套建國大業後, 呢個館都變為電影博物館了, 因為館內都放了很多劇照, 所以感覺麻麻。
跟住我地就沿路行去渡小月食午飯啦, 一條直路, 唔會走失, 途中仲買左粟子食。去到渡小月, MEAU不同了, 沒有了醉雞失望, 但幸好其他野都不錯, 但碗麵失色了, 轉成米粉好多, 滿足埋購物慾後, 就去下個站故宮博物館。
我地係又係士林站撘巴士, 家下台灣D巴士好了很多, 清晰了很多, 很易撘。呢個點, 同迪迪兩個坐係出邊等, 佢地又唔放過我地去食雪糕喎, 結果兩條友ON居居坐係門口等, 好在有位坐咋。行完就去左樓下間CAFE食個下午茶, 又幾好食喎。
之後再出發, 去士林官邸望下, 因為都近士林站的, 最近要有巴士到, 但落左巴士, 真係無一忽似, 結果都要問人, 佢指去的地方, 行到過去, 只係搵到個屋苑叫做士林官邸LOR, 結果再問人, 原來要再入D, 經過個停車場, 又真係另一個地方, 佢個花園好大, 其實都幾好, 不過俾人軟禁係到, 可能悶D LOR。
今日的重點係去天母區女娘的店食飯, 又一期待而又沒有失望的飯店, 好好食, 雖然大部份都係邪惡野, 但係好好食, 價錢又唔係太貴。吃完我同肥肥就先送老豆返酒店, 順便拎埋買左0既野返去, 再去士林夜市JOIN佢地。
士林夜市, 基本上都無乜人行, 我目的只係苦瓜汁, 同埋佢地未去過, 話要去下喎。行完就返酒店開西瓜食, 膠刀切西瓜都係第一次啦。
今晚個熱水爐又唔得啦, 搵左條茂利同我地攪, 佢攪左好耐都唔得, 最終佢都明天換過另一間房俾我。咁算, 我過左媽媽到沖涼算。
2011年9月26日 (星期一)
今天又係我期待的一天, 因為除左九份, 其他地方我全部都未去過, 所以呢日係我安排俾自己的, 今天全日包車, 很開心, 乜都唔使理。
是日早餐, 近近地食左個MOS BURGER, 除左杯野飲, 不錯, 仲俾我地發現左買鳯梨酥的舖頭, 明天早上入貨。
胡大哥確實係一個很好的司機, 準時又健談, 仲做埋我地的導遊。去到九份, 很開心, 沒有落兩, 真的很幸運呢, 一路行下停下, 結果我地決定先行到上頂, 落黎慢慢睇, 因為趁無雨, 可以影相, 從未見過咁清的九份, 不過一路影, 舊黑雲就飄過黎, 結果剛影完, 即刻落大雨。
好在一路行, 都有少少蓋, 我地只係買左少少手信就走啦, 落番李儀買太陽餅, 但家下佢D太陽餅唔好食LU, 薄左無咁好食。下一站我地就去黃金博物館啦。
呢到好靚架, 好多日式的建築物, 因為當年本來係起俾日本某一個皇帝黎住的, 但唔知點解, 無黎, 後尾咪執執佢俾人參觀LOR, 所以一入到園就被坤左入去睇間日本屋, 睇左套片, 之後就行左去搵野食啦, 因為都點幾啦。
我的目標係礦工便當, 食完個便當, 仲可以拎走埋個鐵盒, 筷子同埋塊布, 好開心呀, 最勁係, 竟然係好食架, 我地又揀左係出邊D屋仔食, 別有一番風味。
吃飽飽就一路行上山啦, 跟住又去參觀左間日本屋, 跟住就去體驗下做礦工係點啦。那個坑道叫做本山五坑, 係一個真實的礦洞, 我地要帶頭盔, 入去行的, 整條路唔係太長, 十分鐘到行返出黎架啦, 入邊有d公仔, 扮番當年d礦工係點樣做野, 你行到埋去, 又會介紹下咁啦, 入邊玩helloween0岩哂呀, 一定走唔到, 又黑又濕又寒寒地咁, 但都幾攪野架, 行完仲有張cert, 你可以去吸番個印, 留為紀念。
行完礦洞, 就行去摸金啦, 入左黎呢個區, 終於都黎到黃金博物館啦, 呢到個賣點係, 有好大舊黃金俾人摸, 唔知值幾多億咁啦, 滿足埋呢個摸金的心願, 就離開呢個金瓜山呢個地方, 向十分出發啦。
走時, 突然間勁大霧, 真係得0個十米到係睇到0野0個隻, 好仙境feel。上番車後, 胡大哥順路車左我地去黃金瀑布, 其實無乜水, 只係因為有礦物質, 所以d水係泥黃色, 其實好肉酸, 好似屎水咁, 但係名勝黎架, 但如果專登黎, 實搵笨實。
經過大約45分鐘車程, 就到左我好想去的十分啦, 一去到, 就見到架火車啦, 好開心呀, 真係好近好近, 又可以行路軌, 勁興奮, 只係越落越大雨, 呢下最唔開心, 但唔理, 唔開遮都要影相。胡大哥帶左我地去相熟的婆婆到買天燈黎放, 其實佢都無問過我地架, 不過都算啦, 無所謂, 間間都一樣, 不過環顧四周, 婆婆間舖, 如果自己黎, 係唔會幫襯的, 當幫下婆婆啦。
我地買左兩個天燈, 但係佢地係咁掛住買天燈仔, 無人有心放, 我地買左個七彩顏色的, 貪心d, 樣樣有麻, 而天燈仔, 女人就發揮左佢地的力量, 買左好多, 哈哈。
放完天燈, 買夠野, 就去靜安橋影下相, 但係超大雨, 跟住我地就沿路軌行去買車票撘下火車啦, 呢個站, 就似係日本那些郊區車站咁, 一個鐘頭先有一班車, 無車時, 可以行路軌, 車站好靜, 可能平日啦, 個感覺非常好。
當火車到站後, 佢會停低等一陣, 可能係呢條線都叫做大站啦, 火車只係得兩卡, 有一個司機, 同埋一個鐡道員, 係女仔黎架, 好型架, 係司機同鐡道員都落哂車, 我地就不停咁影相, 正。
我地會撘車去菁桐站, 一個最古老的車站, 全部保留木造的車站, 我地無去到平溪, 因為天都開始黑啦, 又落好鬼大雨, 經過半個鐘車程, 終於都到lu, 但落車好大雨呀, 所以都無乜點影相。之後就去左鐡道博物館買左名信片寄番香港啦, 我寫左好多張, 人人有份, 但企係到寫, 條褲濕哂lor。
攪掂好d名信片, 跟住就去搵番胡大哥上車走人啦, 鐡道之旅咁就完左啦。之後我地又坐45分鐘車去基隆食海鮮, 無任何idea, 叫胡大哥介紹同埋幫我地book, 我地d香港人, 真係成日都諗住會俾人呃, 點知會有驚喜的。胡大哥介紹的這間飯店, 名唔記得啦, 但我記得d野好大碟, 起初佢地介紹俾我地那個餐, 好似好少野食咁, 雖然價錢都唔貴, 但我地都係揀個多一個蟹的餐, 結果, 第一碟四式伴盤, 見到都嘩一聲, 船咁大隻, 係香港呢盤野都起碼三百蚊, 跟住刺生, 面盤咁大, 香港應該要成五六百蚊盤, 跟住其他野食, 又係超大碟, d野又新鮮, 碟碟都好味, 碟碟都有驚喜, 但埋單只不過係港幣千零蚊, 9個人喎, 抵到爛呀。 我地呢d香港人, 真係平時呃得人多啦, 如果好似咁食, 我諗無四五千, 唔使樓呀。
食飽飽, 胡大哥車返我地返酒店放低野之後, 跟住仲車埋我地去西門町先走人, 全日包車都只不過千幾蚊, 每人都係百幾, 唔使煩, 不錯不錯。
係西門町, 迪迪佢地去飲咖啡, 我地就去行左陣, 跟住搵番佢地就去搵家樂福買下生果食, 再次用膠刀開西瓜, 但今次個黃肉西瓜麻麻地。
2011年9月27日 (星期二)
起身後, 今日諗住買麵包返房食, 跟手買埋鳳梨酥上房pack行李。食飽飽, 本來諗住去總統府參觀, 但睇新聞話朝早有人自焚, 都唔知佢開唔開, 咁我地就決定退房去買左茶葉先啦。
今次真係最後一次黎呢間老舖啦, 因為收樓, 呢間八十幾年的舖頭都要搬啦, 真係要望多兩眼。我地今次可以慢慢飲慢慢食, 因為唔趕時間, 結果咪又放低左成千蚊lor, 港紙呀。
跟住就去買胡椒餅食啦, 因為好記得附近有一間的, 個餅真係好好食呀, 順便俾老豆坐下, 因為佢唔舒服, 幾驚呀。
買埋茶葉, 無野做, 就諗住去望下101啦, 行下商場, 書店咁啦。今日天氣又大風, 藍天白雲, 天朗氣清呀, 呢d天氣去旅行, 真係一流呀。
去到101, 影相下, 無無聊聊咁, 諗住行下sogo啦, 點知佢又裝修, 咁就轉去行誠品, 跟手係food court食埋個午餐, 就返酒店拎行李去機場啦。
胡大哥又好好咁, 車埋我地去買豬肉紙呀, 佢話好多客都要求要去, 咁我話順路就去啦, 原來只有佢賣豬肉紙架咋, 同埋得一間舖, 你叫我自己黎, 我實唔黎, 唔買lor, 因為都唔知乜地方黎的, 周邊乜春都無。
買埋, 就真係去機場啦, 同胡大哥道別後, 就執埋d野check-in啦, 我地check-in, check左好耐呀, 因為條白痴地勤偏埋d位騎騎呢呢咁, 迪迪要佢做過, 帶迪迪黎, 真係有好處。
仲有錢剩, 緊係搵野食啦, 食埋d錢佢, 哈哈, 跟住就去換台灣觀光局送俾遊客的禮品啦, 本以為係好普通無得揀那種, 但點知都幾多款揀, 同埋仲好大盒添。
揀埋, 就行去候機室啦, 終於可以影到hello kitty啦, 上次跑跑跑, 乜春都見唔到, 雖然唔鐘意佢, 但係呢到特式黎架, 點都要影影影。
話咁快, 個零鐘頭後就返到香港啦, 台灣旅程就結束lu。又一次帶團成功, 唔知仲有無機會有第二次呢?
沒有留言:
發佈留言