東莞荔枝團

2011年7月9日 (星期六)

又再一次出發, 今次是去東莞, 舅母家鄉, 目的是食荔枝。基本上我係一D荔枝都唔食的, 因為我怕有虫, 但是次竟然去摘荔枝。

由於係自由行關係, 唔使倒塔咁早起身, 去東莞最方便的方法係撘和諧號, 亦即係動車啦。好興奮, 因為第一次撘火車返大陸, 真係話咁快就到, 半個鐘多少少, 車箱很寬闊, 很舒服, 只係污漕左少少, 但我諗比起普通火車好多了, 只不過係佢太密, 清唔切垃圾, 但路途中佢會清的。

返到東莞, 已經有車黎接我地啦, 先去左舅母的舅母屋企食飯, 真係住家農家菜, 好好食, 菜甜雞香。之後, 就去左另一個家拎農家物, 有自種南瓜, 薑等等。

參加完鄉下屋, 就去睇下佢有錢表妹間豪宅啦, 兩層高, 四千幾呎, 前後花園大魚池, 再有埋車埋, 靚過碧桂園, 入屋後, 真係嘩嘩聲, 咁大個女都未去過呢D屋, 好似更上一層樓介紹0個D樓咁, 正到呢, 個樓底極高, 唔開冷氣都唔會熱, 咁大間屋都連埋地, 都只不過百零萬咋, 佢間主人房大過龍門居間屋, 佢個廁所係可以放到係舖頭睇到的雙人按摩浴缸, 誇到呢...佢個女間房已經係我成間屋啦, 痴線。

其實成條村, 都係佢地男家的自己人來的, 夾錢買塊地返黎再起樓, 鬼咩, 佢車住我地, 去到某一處就話, 呢間廠就係我地架啦, 前邊呢D舖, 由呢到到呢到, 都係我地的, 點解可以咁有錢架。

參觀完間豪宅, 就去摘荔枝啦, 一行共八架車, 最CHEAP我地架VAN啦, 其他全部都係凌治, VOLVO, 或者福士, 最型係, 我地行錯路, 去左某一個地方, 成條路得我地八架車, 一條直線, 好似拍戲咁, 都唔係最型, 最型係八架車一齊U TURN先叫型呀。

去到荔枝園, 我地以為只係可以摘棵既0, 點知係成個園任摘喎, 我皮膚敏感, 唔敢摘, 都係肥肥媽媽摘完, 跟住俾我地, 真係又大又甜又多汁, 成世女都未食過咁多的荔枝, 超好食, 咁多年QUOTA, 一次過食哂。

摘完荔枝都日落啦, 跟住又去食農家菜, 係食燒鵝, 即燒的, 但覺得麻麻地。

食完飯, 表姨車左我地去按腳, OK舒服啦, 麻麻地。之後又返去豪宅樹食宵夜啦, 是晚宵夜為鴨粥, 真係超好食, 剩係食粥都食兩碗呀。

之後, 表姨丈佢地就車我地返酒店啦, 返到去都十二點幾啦, 酒店係呢區最出名最貴架啦, 又係唔使錢的, 除左車費外, 由出門口到返酒店都無用過一毛錢, 因為全部都係表姨表姨丈攪掂。

2011年7月10日 (星期日)

今朝起身, 就去飲茶啦, 酒店茶樓, 基本上都香港無乜分別啦, 只係用料上的分別, 好過香港好多。

跟住我地就去左街市行下, 行左陣又返去村間屋到分野啦, 荔枝啦, 有雞, 有鴨, 薑, 真係又食又拎呀, 分完裝, 就去食飯啦, 又係0個句啦, 又係好好食, 最好食係食到東莞的糖不甩, 好好食, 真係食唔停都得呀。

食飽飯, 我地就撘車走啦, 諗住早少少返香港唔使同人迫麻。今次俾多五蚊, 坐豪華位, 又真係舒服D, 又闊D喎。埋單計, 呢個TRIP每人都係使左二百幾蚊, 真係抵到爛啦, 又食又拎。