愛●蘇梅曼谷之旅

2012年3月28日 (第一天)

今日五點就起身了, 因為要坐到六點半班B33, 所以六點要出門口, 七點零去到機場, 因為已經CHECK-IN左, 所以好快可以寄行李, 其實本來時間好趕, 但班機DELAY左半個鐘, 之後就去T2食早餐, 他他條條係T2食早餐, 跟住係0個邊過埋關, 真係好喜歡係呢邊過關, 因為無人, 令願行遠D, 都好過排長龍。

去到閘口, 都要等左一陣先可以上機, 今次撘國泰, 班機勁FULL, 好在都有窗口位坐。坐好後, 無電視好睇, 又唔係好訓到, 睇左陣書, 後尾都訓到, 但係突然又俾人叫醒左, 因為我份餐到, 由於叫左NO BEEF餐, 係比人早好多有的, 份餐, 當然唔好食啦, 好Q咸, 痴線。

十一點鬆D, 我地就到左曼谷機場啦, 好彩轉機的時間遲兩個鐘的, 如果買左跟住要轉機的航班, 就要跟住地勤姐姐跑啦, 佢地都好好, 其實係香港機場已經提左佢地, 跟住去到機口即係帶佢地走啦。而我同肥肥, 由於大把時間, 慢條斯理咁行去搵曼谷航空的COUNTER, 拎BOARDING PASS啦, 本來諗住拎完可以上番去行下機場, 點知我地係DOMESTIC航班係唔可以架, 跟住那樹係無野行架, 但又見到LOUNGUE喎, 行黎行去, 跟住我地就俾人逗啦, 話我地知過左關就可以入到去。咁拿拿聲過關啦, 咁有三個COUNTER, 得兩條龍, 咁我地咪排一條LOR, 又無睇喎, 差唔到排到, 先俾個哥哥仔招埋去, 話無人排呢個先係BANGKOK AIRWAY的COUNTER, 佢應該係睇到我地張機票呀, 哈哈, 好瘀, 排錯隊, 跟住過關都好順利。

入到去, 個LOUNGUE好細, 無乜野行, 食野又唔想, 咁就去左BANGKOK AIRWAYS那個候機室啦, 可以上網同埋食野, 飲野架, 唔使錢的, 可以HEA住咁等上機, 仲有好多蘇梅的地圖可以拎, 太好了, 但係WIFI, 我到差唔到要上機, 先研究到點用, 食野, 我又麻麻地, 但肚餓都食左少少。

去到上機的地方, 我地發覺全機人都係外國人, 只有我兩個中國人, 真開心, 肥肥不停話, 我地成日扮鬼佬, 講真心情真係好興奮, 我地撘的機係普通細機, 真係好想試下有羅旋槳那種呀, 正所謂又要驚又要撘。

上左機, 因為機程短, 好快就派餐啦, 三文治, 都OK, 起麻填補到我心寧上的空虛。食完一陣野, 就開始見到島啦, RESORT咁, 兜左個圈就到啦, 由於機場細, 同埋蘇梅機場係好有特式的, 佢係一個似RESORT多D的地方, 落機要撘車去入境的, 那架都唔係普通車, 係觀光車咁的, 坐上去好似去左迪迪尼咁的。

坐到去入境, 其實都唔係入境, 因為係曼谷已做了, 一黎就去拎行李了, 那個行李帶係我見過最短的, 同埋最田園式的, 蘇梅的機場係無冷氣的, 但都唔熱的。等行李都等左幾耐呀, 一路等一路見到D外國人不停咁卸下佢一身的打扮, 轉回短褲, 拖鞋, 唉, 後悔無係身添。

拎完行李, 就跟住行出去, 其實我都唔知行去邊, 只知見到MEETING POINT就行啦, 由於係香港已經BOOK左MR. WANCHAI車架啦, 一行出去就見到我地個名啦, 佢拿拿聲去拎車, 跟住就車我地去呢兩晚的住處IBIS SAMUI RESORT。

因為我仲經佢訂埋出島同埋CITY TOUR, 所以佢要等埋我地CHECK-IN埋,拎個房號, 方便車輛接送。

呢間酒店, 無任何特式, 佢只係一間連鎖式的平價酒店, 任何野都係STANDARD, 無乜花巧, 房間細細, 簡簡單單咁啦。返房即刻換行裝, 踼番對拖, 就行出去FISHERMAN VILLAGE啦, 其實係由酒店行出門口, 直行就到, 不過都要行20分鐘, 但就好過我地撘車出去咁貴, 見早, 行下出去都OK呀。

沿路其實無乜人, 同埋係車路側邊行, 夜晚無乜燈係唔OK的, 日光日白就無問題。經過一番努力, 終於見到個牌坊, 但原來係村尾來的, 但就無意發現原來想BOOK的HANSAR, 但係行過之後, 無BOOK係正確的, 因為好似我咁, 人人都可以行過, 因為佢係村尾, 條路係阿公的, 咁行過就會見到酒店房間, 同埋個泳池, 就係路邊, 你做乜都俾人看哂, 餐廳都一樣, 所以麻麻地。之但係我諗係沙灘食飯又唔同喎, 因為佢個BEACH SIDE DINNER的佈置真係好浪漫呀。

今晚由於係我生日, 所以我決定食海鮮, 係旅遊書已經訂左食邊間, 咁時間尚早, 所以係條街到行左陣, FISHMAN VILLAGE其實係BOPHUT區, 係唯一一條街集中有野買有野食的, 所以基本上住係樹的人都會黎, 餐廳勁多, 間間都有佢自己特式, 食0既野都唔同, 最殺食係無敵海景, 大部份都有, 雖然係黑麻麻, 但係吹住海風, 爽呀。

趁早, 又去搵埋過兩日想食的海南雞飯位置, 跟住就返去食飯啦, 肥肥唔想BEACH SIDE, 所以佢選左樓上, 結果得我地一枱, 全晚我地包場, 我地揀左個二人海鮮餐, 佢有得俾我揀KING CRAB定龍蝦, 我地緊係揀KING CRAB啦, 香港食好貴架, 跟住仲有蛽, 同埋魚蝦蟹, 但係魚蝦蟹唔好食的, 但隻皇帝蟹, 好好食, 佢係泰式炒的, 其實食完隻蟹已經有D飽, 跟住我地又叫左PHAI TAI, 結果飽到死咁走。

我的生日願望係去旅行, 跟住望住個日落食飯, 旅行, 同埋食飯就做到啦, 但係睇住日落, 就行過見到, 因為呢邊向東, 只可以見到落霞, 都算完成左啦。

食飽飽, 就諗住去BIG C入定呢幾日要飲要食0野啦, 因為問過酒店BIG C好遠的, 唔可以行, 所以就截左架TUK TUK車我地去啦, 真係好貴, 短短一程車, 都$200b。去到BIG C, 唔同BANGKOK那間一樣大, 但唔夠BANGKOK間好行, 我地主力買左D零食同埋杯麵就走啦, 都買左幾多下, 因為我地唔會再黎, 同埋另一間酒店係唔方便出入的, 所以入埋貨。

走時, 諗住截車走, 但係蘇梅黑蚊蚊, 真係幾難, 跟住又有的士逗我地, 咁問佢幾錢, 佢又係開$200b, 我地還價$150b, 佢又ok, 佢都話夜, 無車架啦, 所以我地上左, 其實真係幾遠路, 都ok啦。

返到酒店, 執好哂明天要用的物品, 就大覺訓啦, 雖然係普通hotel, 但張床都幾舒服。

2012年3月29日 (第二天)

今日全日都係出島, 今朝好早就起身啦, 五點幾, 因為六點半到, 車就會黎接我地去碼頭, 我地係酒店大堂等, 原來都有d住客同我地book左同一間公司呀, 所以一齊撘車去碼頭, 車程大約十分鐘到, 就去到個碼頭架啦, 首先去左報到先, 職員會同我地戴手帶, 派入場卷, 飲品卷, 同埋浮潛用品俾我地, 我地聲明我地唔會去龜島, 所以佢地綁少一條, 無0個條帶係唔可以去到龜島的, 因為我地研究過, 如果去龜島, 係由海中心跳落去浮潛的, 而我地游水唔叻, 其實係唔識游, 基本安全我地都係留係南緣島玩下好了。

攪完手續, 就可以食d野, 佢有免費早餐提供的, 其實我地係酒店食左d麵包架啦, 肥肥無食, 佢怕痾喎, 而我有食呀, 因為仲餓餓地咁, 其實個三文治幾好食。等左一陣, 齊人就上船啦, 我地揀左撘雙體船, 船程係耐d, 但係就唔係拋到嘔, 呢間船係返曼谷架, 中途仲會停帕曼島同埋龜島, 我地係第三個站先落船。

上左船, 坐左係冷氣倉, 當然係睇左佢d片, 跟住訓覺啦, 訓左一陣, 就停左一個站, 跟住都成個鐘, 先到第二個站龜島, 醒左訓唔返, 又餓, 跟住又拎野食, 哈哈。坐多大半個鐘到, 就到啦, 落船之後, 佢叫d人係到等, 咁我地又等啦, 但發現d人原來係轉船去龜島架, 我地咪問我地唔去點啦, 佢話咁入得去啦, 車, 總知唔等啦。

南緣島真係好靚呀, 可惜個天唔係咁藍, 不過, 我始終都係鐘意關島多d, 那種海天一色的感覺。

去到拿拿聲去搵張椅放低野啦, 一放低野係張椅到, 即係有人埋黎收錢, $100b全日兩張, 當然係即刻俾錢啦, 跟住準備好, 就落海浮浮浮啦, 見到好多魚魚, 我仲踩到海參添呀, 個感覺好核突, 浮左大約一個鐘, 我地就上水去食飯啦。本來諗住呢到d野食實唔好食啦, 但又過得去喎, d蝦片仲好好食添, 食飽飽後, 當然係唔好即係又浮啦, 我地曬左陣太陽, 因為d人去哂龜島, 所以其實大約得廿零三十人係到, 所以特別寧靜, 聽住海浪聲, 就咁就訓左啦, 點解會醒, 因為香港人lor, 第一句就聽到廣東話, d人一係龜島返黎, 就好嘈啦, 咁我地起身又去浮過, 係另一邊, 原來無咁大浪, 浮得舒服d, 同埋多魚d, 魚又係另一種品種, 佢地唔怕人, 成日係我"加拿大"經過, 好好玩呀。又浮左一陣, 又去曬返乾個人先, 一陣上船無咁辛苦。

夠鐘就去還返d裝備, 等上船啦, 我地決定左回程坐船頂啦, 因為可以吹吹風, 又係得我地兩個中國人, 哈哈, 好開心, 因為d外國人無咁嘈的。係船上邊, 個個都把握基會曬曬曬, 吹住海風, 好快就兩個鐘啦, 返到碼頭, 又撘返架車返我地酒店, 返到去都四點幾啦, 因為我地今朝發現左原來酒店係有車出去fisherman village架, 所以我地諗住book, 因為平一半呀來回, 跟住就返房沖個靚涼, 沖完個涼, 我就發覺我全身同肥肥全身都紅哂, 出事啦, 又敏感了, 開始痕啦。

因為架車六點半, 坐左陣, 跟住出發。去到漁村, 還早, 諗住行下, 但發覺唔對路, 點解咁黑0既, 一路行, 都係咁, 大約行左一半, d舖頭有電0既, 光猛返, 望返轉頭, 原來係大半都無電, 連街燈都無架。咁我地就行下有電的, 夠境有乜野食啦, 好在尋日食左海鮮, 因為今日佢無電, 那個staff好nice, 認得我地, 仲同我地打招呼添。本來想去食grill, 因為間野係到燒得好似好好味咁, 但人太多, 佢好似唔想做咁, 咁我地就搵左間有電又多人, 又大大地的餐廳食啦, 我地都係食左泰菜, 都ok好食, 最開心係, 我地係係沙灘到食架, 第一次, 雖然有人唔太鐘意, 但我好鐘意呀。

食飽後, 諗住去做腳仔按摩, 去到那間心儀的, 點知佢話要等半個鐘呀, 等唔緊要, 但係做完就趕唔到車麻, 所以放棄了, 無電都咁好生意, 即係我無揀錯啦。

無野做, 見到間係沙灘上邊飲野的bar, 我地就入去訓係沙灘大cusion上邊飲下野, 聽下歌, 數下星星啦, 見到人地真係好浪漫或者同朋友傾得好開心架, 但係我地就麻麻咁, 哈哈。

夠鐘又行返去等車啦, 早左, 係個牌坊到等左一陣, 周圍真係黑麻麻的, 但又唔係太驚, 唔知點解喎, 可能我覺得d人有錢過我, 因為我見到d的士佬, 成手錢, 仲多過我係身的, 哈哈。等等下, 我竟然等到漁村有番電喎, 街燈同埋牌坊d燈著番, 通電一刻, 仲見到個電箱有火花, 真嚇人。

明天要轉酒店啦, 期待。

30/3/2012 (第三天)

去蘇梅預備乜最辛苦, 除左錢之外, 就係酒店啦, 因為十妹d酒店真係間間都靚到爆, 各有特式, 靚d又貴d又over budget, 但又想住靚喎, 真係難揀到爆呀, 想位下villa, 有私人泳池, 但又怕好污糟, 好多蛇虫鼠蟻, 所以放棄左呢樣, 跟住就要有海景, 要拍得住關島先得, 又要有infinity pool喎, 當然又要平啦, 成千蚊晚我地都預左, 但係都唔好貴到離譜麻, 仲要係CHEWANG區, 因為方便行街, 真係好難搵。因為CHEWANG係主要區域, 所以間間都貴D架, 如果住遠D, 可以多D選擇添。

結果, 係最後係Hansar 同埋KC resort兩間揀, 係揀左KC, 因為俾我搵到佢有個HONEYMOON PACKAGE, 係3日2夜的, FIT哂我地住的日子, 兩晚保證全海景房, 兩位一晚DINNER, 兩位SPA, 機場來回接送, 仲有香檳送添, 都只係$15600B, 為番港紙$4000咋, 我地後尾計番, 佢個SPA都要$1600B兩個人, DINNER要成$800兩個人, 機場來回接送要$400B, 為番都係千零蚊晚房, 我上HOTEL.COM睇過, 呢種房起碼三千蚊一晚, 真係抵到爛, 所以商量過後, 決定BOOK。

講番今日, 朝早起身, 去食過早餐, IBIS D早餐正正常常咁啦, 跟住我地就去行左一陣沙灘, 行左陣酒店, 跟住就返上樓執野退房啦, 行出去漁村食飯啦, 沿路上可以認真咁睇下BOPHUT的環境, D人真係好優閒, 有D舖頭都幾靚, 第一日黎到戰戰驚驚咁, 無乜留意, 今日終於可以留意下。

行去漁村, 必經HANSAR, 真係無後悔唔揀呢間酒店, 佢雖然係新, 但實在太OPEN啦, 個INFINITY POOL真係係海灘條路旁, 我行過可以同佢地呃手, 房間, 低層的, 可以一望上去就望到, 甚至係路邊添, 佢雖然係靚, 但咁樣就麻麻地啦, 唯一我覺得最正係佢係沙灘SET左位食飯那個佈置, 真係好浪漫。

行到出去, 慢慢行, 都差唔多十二點, 又食野啦, 今日地道海南雞飯, 係路邊架咋, 但好多人都話好食, 咁見佢又平平喎, 當然要去試下啦, 確實地兩條友, 兩個飯+野飲, 都係$130B, 係蘇梅真係算係咁啦。食完, 死心不息, 心癢癢都係想去試下那間按摩, 嘻嘻, 結果傾好價錢, 肥肥就係腳底按摩, 我就磨皮+按摩, 由於我地只有一個鐘時間, 所以磨皮縮短左, 麻麻地, 之但係個按摩一流, 舒服到呢, 一來係舖頭仔, 無冷氣, 天然風+風扇, 仲有水流聲+風鈴, 真係爽過係房呀, 勁正。

按完拿拿聲返去啦, 因為約左KC那邊過黎接我地, 返到去已經見到司機等緊我地啦, 我發覺蘇梅D人都幾準時, 攪掂D野就上車走人啦, 架車好新, 好鬼舒服呀。

呢間酒店咁平仲有一個原因的, 因為佢係山上, 要行條大斜路先可以上到去, 交通不便係佢唯一的唔好處, 但就換來寧靜LOR。上到去司機幫我地放好行李, 就CHECK-IN啦, 係咁熱的天氣下, 一杯WELCOME DRINK, 真係爽哂。辦好手續, 跟住就撘GOLF車上房啦, 其實行都得, 不過上撘車好D。

姐姐同哥哥帶我地上房, 出到LIFT, 已經FEEL到好正, 好靜, 好似無人住咁, 樓底很高, 因為度門都好高, 一入房, 係廳同埋細廁, 落地窗簾下, 望到個海, 跟住行入去係床同埋沖涼房, 姐姐介紹完, 我地拿拿林拉開窗簾出去露台, 嘩, 無敵海景呀, 一望無際呀, 超正。廳同埋房都可以出到去露台的, 肥肥仲話, 如果唔係有人帶住, 真係嘩一聲叫出黎, 真係真係未試過住咁大間房同埋咁正的景呀。

擺好野, 換好衫, 我地就決定去玩下個INFINITY POOL啦, 個POOL無乜人, 其實我覺得間酒店都好似無乜人咁, 游完水, 我地就去做SPA啦, 真係好變態, 一天內做兩次, 無計啦, 我預左今日唔會離開酒店架啦, 我要享受下。

本來係THAI MASSAGE的, 但佢話驚我地痛, 所以叫我地轉SPA, 加$150B咋, 咁緊係轉啦, 推油喎, 我地揀左苿莉花, 好香, 間SPA房都好正架, 好鬼大間, 仲有水池浸架, 如果揀左浸浴的話。好快咁, 90分鐘就過左啦, 真係超快, 訓左乜都唔知, 哈哈, 但做完好舒服呀, 因為我SUN BURN左啦, 超紅, 超痛。

SPA完, 返房坐陣, 係FACEBOOK發現, 原來MONKEY同我地間酒店好近, 我地係山上, 佢係山腳, 但佢聽日走啦, 所以無緣再見。

坐一陣, 又係食飯時, 因為送的, 無任何期望, 全晚都係得三枱人, 呢間酒店D STAFF都幾爽。雖然係送, 但係呢個THAI DINNER又唔差喎, 都幾好食, 因為我地係唔知食乜的, 所以碟碟都係SURPRISE, 本來諗住係會唔飽, 仲買定杯麵, 但點知好鬼飽添呀。

食飽飽, 諗緊好唔好出去行下, 但係八點幾九點, 出去唔知有乜好行, 都係算, 他他條條咁係房到HEA, 結果我地HEA左一輪, 就用送的香檳黎送杯麵啦, 好奓豪呀, 哈哈。

夜晚本來想係露台看星, 享受海風的, 之但係一望, 出邊好多四腳蛇呀, 就咁望都兩條, 怕怕, 拉埋窗簾算。

31/03/2012 (第四天)

尋晚訓得唔好, 因為我個身真係好痛, 好癢, 半夜都要起身搽野, 先好少少訓得番。今早預左起身看日出的, 但係遲左起身, 太陽伯伯都出左黎啦, 其實都係遲左少少0者, 之但係一醒, FEEL到佢係出邊啦, 一拉開窗簾, 嘩, 太陽伯伯, 正一正望住我呀, 呢D真係訓係張床到睇日出呀, 作死, 即刻乜都醒哂啦。樓下VILLA都無我地睇得咁正呀。

影左輪相, 跟住就去食早餐啦, 呢到D早餐呢, 好多選擇, 又係望住個日出食架, 有海有陽光食早餐, 一樂也。

今日JOIN LOCAL TOUR, 大半日都係去下蘇梅的各個景點。九點架車又好準時咁黎接我地啦, 跟住再去接埋另一個鬼佬家庭, 就出發去那個ISLAND SAFARI啦, 我地又JOIN鬼佬團啦, 基本上全部都係鬼佬, 無香港人, 但都另外有4個中國人。齊人就開始啦, 第一個節目係去睇大象表演, 都OK, 真係估佢唔到咁大隻象可以倒立LOR。跟住就去坐大象, 我第二次坐, 肥肥就第一次, 好玩過第一次同哥哥坐, 其實都係行個圈0者, 不過呢次個象伕, 一路行一路織左頸練同埋介子俾我地, 同我地影相又無話要收錢喎, 不過我地後尾都有俾TIPS佢。

騎完象, 就去睇馬騮表演啦, 呢個, 麻麻地啦。玩完就去玩FISH SPA啦, 開初真係好痕架, 好恐怖, 但咬咬下又幾舒服喎, 仲有西瓜食添, 但係要付出架, 就係成百蚊港紙, 買張相啦, 算啦, 都影得幾靚, 無所謂啦. 哈哈。

呢樹玩完, 就坐車出去睇景啦, 第一站係去BIG BUDDHA啦, 無我地香港那個咁大, 但都唔錯。之後就去第二個景點, 就係view point啦, 咪就係一望無際的海, 係chewang同lami中間, 跟住再去睇阿公阿婆石啦, 因為似男人同女人的性器官而大受歡迎的。呢樹係lami區, 蘇海的唯一特產, 棷子糖都係係到買的啦。跟住有去睇一個僧人的乾屍, 佢真係保存得好好, 真係唔明點解無變架, 無做任何防腐劑, 只係風乾咁。跟住再去睇瀑布, 只不過係一條水柱, 哈哈。

最後就係去納通區啦, 最舊有蘇梅的旺區, 而家變左查汶啦, 所以呢區好靜, 無乜野行, 我地留下係呢樹食飯, 食完飯, 行陣就走啦。如果無租車, join local tour係遊蘇梅的最好方法, 因為d景點其實都幾遠的, 同埋發覺左, 佢地d景點, 每每都有一條街仔行入去, 沿途總有手信賣的。

返到酒店後, 我地拿拿聲又去泳池玩左陣, 跟住就去左酒店天台看日落, 跟手就行出去查汶食飯同埋行街啦。

今晚揀左意大利餐廳 PEEGO, 係蘇梅好出名的, 環境確實非常之好, 野食都不錯, 但我地都係覺得曼谷那間好食D。

由於早食, 真係由天光食到天黑呀, 入黑後, 查汶區就越黎越旺, 但比起漁村, 就無左份寧靜的感覺。之但係呢到D餐廳間間的裝修都好鬼靚, 又大間, 真係忍唔住要影下相的。

其實最主要的目的, 我地要搵香蕉PANCAKE食, 因為係蘇梅要食0既野, 終於都俾我搵到, 又不錯喎, 嘻。其實查汶係一條街來的, 由頭行到尾, 唔會蕩失路, 今日仲有一個目的, 就係要買AFTER SUN CARE, 因為我帶0個支唔夠勁, 要買多D, 唔係今晚無覺訓。

去埋超市, 我地又撘車返去酒店啦, 今次撘爽條, 好快又返到去, 就要執行李, 因為明天要去曼谷啦。

1/4/2012 (第五天)

尋晚訓得唔好, 成晚醒, 開初係熱到醒左, 因為聽到個冷氣開下停下, 開初都訓得番, 但後尾越諗越唔對路, 點解個冷氣一開一關咁, 跟住仲全房跳電, 黑哂, 好在好快著返, 但我勁驚囉, 我真係以為自己撞鬼, 因為出發前, 係forum有人話係villa見到, 間房又大, 我真係驚到心都離埋, 好耐先訓番。但個死肥仔, 係咁訓, 乜都聽唔到咁, 係成房黑哂時, 我尖叫, 佢先醒下, 激死。

但訓醒, 開窗望下, 出邊落緊大雨, 仲行緊雷, 咁我先無咁驚, 跟住起身諗住洗面, 但點知無水, 打去front desk叫人整, 等左20分鐘先有番水, 肥肥話, 可以劈雷, 攪到個pump跳左, 同埋所以尋晚跳電, 咁我先無咁驚, 因為真係超驚驚。
好在尋日睇左日出, 同埋今日走先落雨。跟手落去食早餐啦, 嘆完個早餐, 就拎埋d行李去check-out啦, 攪左一輪, 攪清楚條數, 俾好錢, 就係到等酒店車, 車我地去機場啦。加車超新, 超舒服。

好快我地就到左機場啦, 不過勁多人, 好在我地預早左的, 係蘇梅咁多日, 都無乜遇到香港人, 今日係機場係遇得最多的了。呢個機場真係好傳統, 因為得一條龍, 所以去到咁上下, 佢就會舉牌問, 某班機的乘客, 好明顯係夠鐘那種啦, 咁佢就會有一個counter做左佢地先, 跟住跑入去上機。

而我地大約都排左1個鐘頭先攪掂出境手續, 入到去過埋x-ray, 就見到機場的商店街啦, 呢個商店街, 全部都係舖仔, 一間間屋咁, 好似去左外國人家屋企咁, 好靚靚, 而行入d就係lounge, 有野食, 有野飲, 有網上。係呢到可以睇到飛機升降, 好得意, 不幸又無機會坐螺旋機, 但見到佢的真身, 唔知坐上去係點呢?

坐左一陣, 就撘車去去上機啦, 個個都掛位影相, 因為咁樣撘車去上機好特別, 同埋可以好近架飛機影相。起飛後, 又有餐派, 好快又去到曼谷啦。黎到曼谷真係好似返屋企咁, 因為熟哂路, 我地等行李等左好耐, 拎完拿拿林出去撘bts去酒店放低行李先。

今次我地位ASOKE區的TERMINAL 21, 酒店樓下就係BTS同埋MRT, 超方便, 但係家下由機場出去市區多左好多人撘, 而下下落都無LIFT, 唔太方便, 但兩條友撘的士又貴, 唯有搬搬抬抬啦。最攪笑係, 我係BTS站到俾個外國人問路, 唔通我家下似泰妹咩, 哈。

去到CHECK-IN都三點啦, 好明顯無房啦, 佢話遲D返黎先俾到房我地, 仲UPGRADE埋俾我地, 當然OK啦, 還樹我地要去行街食野, 夜晚先返, 所以放低行李, 佢話會幫我地拎上房, 跟住我地就出發啦。

第一站係去CENTRAL WORLD, 因為咁多次都無乜認真行過, 行出酒店門口就可以撘車, 唔使日曬雨淋, 很正, 但唔好處係人多, 無乜放假咁的心情咁, 不過曼谷係咁架啦, 都係趕頭趕命的。

去到CENTRAL, 先去訂左位今晚SHABU SHABU, 之後去FOOD COURT食飯先, 然後目標係買BRA, 牛仔褲同埋BB衫, 同埋主力行ZEN, 一入到玩具部已經嘩嘩聲, 因為真係好Q大, 而去到BRA區, 我足足留左一個鐘頭, 終於明白乜野係花多眼亂, 我真係有暈的感覺。我地發覺ZEN都唔係咁0岩行, 所以都係去返伊勢丹, 肥肥又係去番那樹買牛牛褲, 但今次唔係BIG JOHN, 而係另一個W字頭的, 為番都係三百幾蚊。 而我都係呢到買左裙仔俾靚姐個女, 我年年都買條裙俾佢, 靚姐話佢鐘意到爆, 因為平時都係著阿哥D衫, 所以我次次都堅持買條裙俾佢。

買完野, 就去食SHABU SHABU啦, 見到另外一間叫"信"的, 都係任食火煱, 咁就不如試下, 放棄那邊啦, 不過食完都係覺得食開那間抵食D同埋好味D。完成CENTRAL WORLD之旅, 當然係要去BIG C啦, 今晚主要係去買生果食, 因為都幾夜啦, 是但買左就走, 再行左陣夜街, 我地就返去拎房啦。

返到去, 一入去酒店就見到我D行李仲係好孤令令咁係大堂啦, 而個姐姐都唔知道無送到上房, 算啦, 無唔見就OK。上到房, 成間房都係白色的, 一入門口係左邊係廚房, 有洗衣機, 雪櫃, 爐及所有餐具齊, 好正, 跟住右邊係廁所, 有浴缸同企缸。

入到房, 因為有度門係中間可以關的, 所以真係入房, 佢有個小型卡位, 好攪笑, 床正常啦, 電視下, 有張好長的枱可以放好多野, 最正係個窗, 好大個好無敵, 個VIEW都唔錯, 好開揚, 加埋佢係用電動簾, 所以好有大銀幕FEEL。攪掂哂都成點幾兩點, 訓醒明天再行過。

2/4/2012 (第六天)

今朝起身去食早餐, 好鬼多人, 同埋全部都係香港人, 但係食物呢, 乜都有, 實食得飽, 好0岩香港人口味的。

今日朝早節目係去OR TOR KOR市場, 指定動作, 今年買左一箱芒果返黎, 今次熟得濟, 但好甜。又係去搵姨姨買手信啦, 姨姨又認得我, 同埋佢英文好左好多, 我今次同姨姨影埋相添, 哈哈。跟住又買左冬菇啦, 再買左蜜瓜汁飲啦, 又買左切好的芒果今晚食, 跟住我地去買左魚蛋粉, 燒肉同埋T字蜜瓜做午餐。

住呢間酒店, 就係可以撘MRT返去, 唔使行餐死, 拎到D野返酒店就開餐啦, 住SERVICE APARTMENT有好處係, 有齊餐具, 可以買野返黎食, 我地將D粉同湯, 倒埋一齊就食得啦, 好好味, 好滿足。

食完坐一陣, 就行去按摩啦, 唔使撘車, 開初以為唔記得點行, 點知一行到附近就記得點行入去啦, 今次又係去禪, 而上兩年我地入左會, 張咭有錢剩, 再加埋吸左10個印仔, 有一個鐘送, 所以無做磨紗, 只係做左OIL MASSAGE, 環境仍然係好啦, 但好似無上次咁正, 但係按完又爽哂。

跟住趁天未黑, 開始搵路去MANGO TREE, 落左車, 跟住個地圖搵地標, 但係地標就搵唔到啦, 唯有靠自己感覺啦, 後尾都搵到個方向, 搵到D地標, 但都行左好耐先搵到, 我地無BOOK到位, 好在我地早, 都有位。環境確實係好, 因為無乜香港人, 大部份都係外國人, 有室外同室內兩個地方, 仲有兩層, 黎到曼谷當然坐室內啦, 因為唔似蘇梅咁清爽的。呢到係百年老店, 價錢都算係中價啦, 野食都OK, 難得食番餐泰菜麻, 但都值得一試。

後尾我地發覺, 呢到好近SILOM的, 如果你識行, 我地問D STAFF, 佢地教我地行, 先行一條都幾黑的路, 我地見到有人行我地先行咋, 跟住一直行出去就係SILOM夜市啦, 我地見早就行埋呢個夜市啦, 都係一條街0者。而我地都買左最想買的太陽眼鏡啦, 當然有講價啦, 唔算係最平, 但見佢質量OK先買。

夜完呢樹就撘車返去BIG C, 勁SHOP啦, 一入到去, 見到D衫就買買買, BRA又買埋, 結果係呢樹都買左成十件衫走, 跟住拿拿聲去買零食啦, 又買買買, 我地足足係BIG C逗留左兩個鐘, 買左成四袋野走呀, 真係痴線。

買完諗住行下出邊啦, 但點知11點都收哂啦, 但係行左無幾耐就見到撞車, 架的士撞電單車, 電單車飛開左, 頭盔都甩埋呀，D小販拿拿聲拎電筒出去照住個地方, 同埋阻車, 唔好俾車撞到, 佢好好合作架, 呢個就係我喜歡的泰國。

返到酒店都成十二點啦, 食下野, 最重要係執埋D行李, 又成兩點先訓啦。明天要走啦, 唔想呀~~






3/4/2012 (第七天)

今日晏左少少落去食早餐, 但反而少人d喎, 舒服好多, 但佢d野食都係源源不絕咁出喎。食飽飽, 就走左出去行左陣robinson, 仲買多左bb衫仔俾嘉淇仔, 同雲妮b, 沿路再行埋去nana站睇下, 呢邊係酒吧街, 同埋呢邊d小販似廟街, 賣d性用品咁啦。

拎埋d野, 返酒店退房啦, 跟住就去行TERMINAL 21, 呢個新商場, 確實好多野行下, 好多驚喜, 因為佢每層都唔同主題, 影相都有排影, 同埋佢D舖細細間, 有平有貴, 但好睇得出人地係DESIGN過的, 最好係佢無乜名店, 呢個要俾個讚佢。另一樣好係, 佢分左主題, 每層賣同一樣野, 所以好好行。結果, 係呢到買左好多野, 打爆左我個旅行袋返黎。

係呢樹食左個葡萄牙餐, 麻麻地, 但試下麻, 之後再去食SWENSEN'S啦, 黎咁多次先第一次食, 等左好Q耐, 又乜都無, 總知係蘇梅食啦。食完野, 就返去酒店拎行李, 撘車去機場啦, 當然又係要搬搬抬抬啦, 同埋好鬼多人, 但無計, 平好多。

早左好多好多去機場, 因為怕人多過關, CHECK-IN時, 我本來網CHECK-IN左, 姐姐話轉左機種, 本來的二二位, 變左三三三位, 跟住話我地揀那個位係EXIT位, 話轉過第二個位俾我地, 我話我要返窗口位, 跟住佢請示個上級又話無啦, 佢話俾最尾那行, 咁ok啦, 諗住最尾可以將張椅退後。今日過關又OK喎, 好快就過到, 咁當然又係去食雪樣啦, 又係老地方, 食會跌落黎的泰國麥旋風啦, 跟住仲食埋冬甩, 行多陣, 就入閘啦。

上到機, 見到係新機好開心, 可以玩touchscreen, 但空姐走黎同我地講, 我地呢排位個電視壞左, 前邊十行都係, 咁架機唔滿, 有需要可以調位, 頂, 唔係呀, 算啦, 諗住訓覺啦, 但點知呢樹近pantry, d焗爐味攪到我唔舒服, 暈機浪, 仲走入廁所嘔。

成程機都好唔舒服, 飛機餐唔好食, 後尾空姐派左杯雪糕俾我地作補償喎。明明係架機到, 見到人地個電視寫左話幾號閘口, 但點知架機停低後, 機司話, 無位俾佢地泊, 跟住要泊去第二樹要坐車的, ok, 等, 泊好後, 又話條梯未準備好, 加車又未黎, 由於我坐機尾, 所以最後先落機, 但係就俾我地見識到商務倉係點。咁樣一攪, 遲左成個鐘先落到機, 灰爆。

返到屋企都十二點幾啦, 今個旅程真係好開心, 蘇梅真係好正, 無試過去旅行係想移民過去的, 我地連做乜都諗好架啦, 就係專幫香港人book local tour, 轉做香港人生意, 哈哈。