由於我未去過廣州, 所以我地決定先去廣州住一晚, 跟住第二日夜晚入長隆睇馬戲, 再住長隆, 第二天遊動物園後走。
因為未撘過火車去廣州, 所以我地又揀左撘直通車, 都唔錯呀, 都坐得幾舒服, 同埋幾快就到。到埗後, 即刻撘地鐡去酒店放低野先。我地今次住上下九街的假日酒店, 雖然唔係近地鐡站, 外表又唔靚, 又殘, 但係間酒店入邊好唔同的, 房好大, 真係大到六個人住都得, 好得呀。
拎左酒店, 我地就左陶陶居食午飯啦, 麻麻地, 唔係太好。食飽就去行街街啦, 周圍行, 先去左睇大教堂, 間教堂又真係幾靚喎, 係中國地方見到, 都幾得意, 同埋我第一次真正入教堂入邊睇, 人地仲做緊D禮儀添, 真係好莊嚴架。
之後我地就行左去個商場到行下啦, 其實教堂附近, 周圍都係批發商場來的, 入到去, 就好似去左淘寶咁, 而我地行那個商場, 賣家品雜物的, 好有翟度翟FEEL架。
之後我地又沿住河邊行啦, 去搵晚飯食, 本來有目標的, 之但係個目標似乎麻麻地, 所以決定搵左間飯店食, 食品都不錯呀, 食飽飽就繼續沿住河邊, 夜遊珠江橋啦, 好多燈燈, 都幾靚架, 河傍FEEL都唔錯。
返到上下九街, 又係食的時候啦, 去旅行宵夜當然唔少得啦, 之但係我食左碗薑汁撞奶後, 就出左事啦, 個肚開始唔舒服。
食飽飽就上樓啦, 個肚肚唔舒服, 食左藿香正氣丸, 好D啦, 但都無乜胃口啦。
第二日我地起身, 諗住去廣州酒家飯茶, 點差知好鬼多人, 痴線, 又多規矩, 結果我地去食粥, 腸粉, 我地又叫到成枱野囉, 因為細細碟, 又樣樣想試, 但最正係個牛腩麵囉。
食飽飽又去行街街啦, 我地決定去沙面影相, 呢個地方係好多人黎影結婚相的, 因為佢有好多歐州建築物, 仲有D係以前大使館, 而廣州政府保留同開發左呢個區, 真係好似去左第二個地方咁的, 好靚靚架。
行夠就返去食野啦, 今次試蓮香樓, 我們一坐低, 就落雨啦, 仲要係落狗屎那隻, 好在係酒樓入邊, 但等陣仲要拎行李去長隆架。我覺得蓮香樓好過陶陶居, 可能0岩食D。
行去地鐵站都係落雨雨, 唔開心呀, 希望明天睇動物唔好落雨啦。
去到長隆站落車, 要轉免費巴士入去個酒店的, 好期待長隆酒店呀。去到酒店, 真係俾貴少少都值呀, 個櫃枱已經好正, 跟住SERVE我們的人都唔錯, 起碼我覺得我真係去左間渡假酒店同埋五星級酒店。由於係星期日, 又唔係長假期, 雖然我BOOK左普通房, 但我又多口問下佢有無得UPGRADE, 點知, 哈哈, 當然得左啦, UPGRADE左去野趣房, 高左一個GRADE。
入到房, 嘩嘩聲啦, 真係好有渡假FEEL, 房大廁所大。放低行李, 我地就出發去睇馬戲啦, 由於住係長隆入邊, 係唔使撘巴士架, 行過去就得, 但係仲有少少雨呀。
入到場, 都唔係好多人, 住長隆, 另一個好處係, 可以坐前D, 因為有酒店席的。
好耐無睇過馬戲啦, 我諗都有成十年, 呢個馬戲同十年前的唔同的, 但同樣精彩, 連肥仔都喜歡, 我仲得到一隻公仔添呀, YEAH。
睇完就撘車去左祈福食野啦, 是但搵左間仲開的飯店, 由於肚肚都唔係咁舒服, 之但係D野又好好食喎, 結果食食下就肚痛啦, 死忍, 去到後邊我要叫佢地食快D, 我要撘的士返去啦。但係的士又搵唔到, 但又搵到兩架白牌, 見佢咁新, 個樣又唔衰, 試試佢啦, 個司機又好鬼建談喎, 話咁快就返到去啦, 拿拿林去個廁所, 好在去到, 去完舒服哂。
早D訓, 明天去動物園啦。
一早起身, 去食個早餐先, 同白老虎食早餐係長隆酒店的特色, 但係我無諗過個酒店早餐可以咁大咁多野食, 我未試過係酒店食早餐食左個幾鐘, 痴線架, 真係好多野食, 又好味, 推介。
之後撘巴士去動物園啦, 真係好多動物, 好多都近距離可以望到, 星期一人唔多, 好好行, 又無雨, 仲有D熱添。呢到連熊貓都郁架, 同埋無玻璃阻住架, 同埋我地仲見到會跑的樹熊呀, 好活躍, 好攪笑, 其實好多動物BB, 好近距離就見到架啦。
睇完動物, 我地今朝決定左由長隆呢到直撞撘車返屋企, 今朝買好車飛, 我地係動物園返到黎, 就去彩蝶軒食晚飯, 係長隆食野, 最平都係呢間架啦, 香港價錢啦, 但都唔錯, 碟頭大, 好味。
食飽飽就拎行李走人啦, 呢間長隆酒店真係推介呀, 真係值得住呀。
沒有留言:
發佈留言