地位

由細到大, 我的地位已經係卑微, 其實應該讀點排都係最尾。

而家頂頭加左兩個細路1個阿嫂, 卑微既地位更加顯注。

每年做節都係開開心心, 熱熱鬧鬧咁, 點知今年媽想話自己各自分開做, 原因係, 朗朗認人, 另外兩個又無地方玩。其實最終個原因就係驚阿嫂唔鐘意, 又話返到去訓唔到, 又食唔到。佢真係CARE阿嫂講咩, 最怕就係阿哥夾響中間, 點講都係偏心囉。

好似今日咁, 又係講做節, 我都係做發號師令嗰個, 好似係哥話做節, 唔係又話我, 其實已經當左係我。跟住又係到話呢話路, 一年見得幾多次D親戚, 似前可以一個星期見一次, 佢再攪落去一年可能見一次架咋, 嗰D仲要係佢親細佬黎, 講真我都唔知佢乜心態, 舅母已經怕左佢, 無野都唔揾佢, 揾親又話唔得閒又呢又路, 都唔鬼揾佢。

講講下話星期六過去睇朗, 又無得抱, 掂都無得掂, 本能反應咪話咁你咪唔好鬼去睇囉, 點知又俾人食住上話, 我唔好似你99咁, 就咁擺低個孫係到乜都唔理, 求人做野, 費事俾人話, 我即時唔出聲, 費事再俾人有位入, 講真個心勁唔LIKE, 你識得話阿哥會夾響中間, 點解唔調轉諗下, 我都會呢。

講真阿嫂話阿媽買左好好味既桃去佢到, 我真係唔LIKE架, 我都無得食, 我仲要買返個$30既水晶梨俾返佢食, 我條氣真係唔順, 個心UN住UN住咁, 不過我邊有得SAY呀, 我呢D地位賤過地底泥既人, 都係自食其力吧啦, 我無父蔭無母蔭架啦。

其實我有諗過, 夠竟如果樂樂唔係佢湊, 會點呢, 星期六會唔會過黎睇樂樂, 定係每星期日等我帶佢返過去算呢。

同自己講, 每次LA野都係一個教訓, 對自己好點, 唔好再對人咁好了, 唔好做咁多吃力不討好的事了。