尋晚成四點先訓, 今朝八點幾就起身啦, 因為要撘十一點半那班大船, 很喜歡撘大船, 又平又舒服。去左大興join埋舅母撘車出中環, 去到碼頭剛剛好。睇電視見到碼頭人山人海的, 超勁多人, 但黎到又唔係見到咁多人0者, 係d警察圍到排隊的地方兜幾個圈先入到碼頭。入到碼頭就迫人啦, 香港人就係咁, 慌死上唔到船咁。上到船, 搵住坐定定後, 隻船又真係爆喎, d人要周圍搵位坐。在船上, 當然係搵周公啦, 好好訓, 雖然無冷氣, 但坐坐下都涷添呀。
十二點半到入到長洲, 當然係非常多人啦, 個碼頭, 沿路去拎key, 同埋行入去間屋到, 周邊都已經有人擺哂位lu, 我地都無諗到在那看飄色好, 只係一路聽到一點半封路, 所以快d想入到間屋到, 跟住出番黎食野。一路行到天后廟, 呢到係個總司令台, 即係表演台, 但係反而天后廟呢個轉彎位無乜人企係到等喎, d人迫哂響碼頭, 北帝廟那邊。我地今次間屋好遠, 沿天后廟還要入好多, 我地搵極都搵唔到個門口, 好在多口, 有個伯伯話我地知, 要落番山, 唔使行咁上, 就係見到架啦。結果入到屋都成一點啦, 放低野, 就拿拿聲行番出去海邊的餐廳搵野食啦。
後來入左一間叫做"離島式餐廳"的, 拿拿林來個午餐, 因為超勁肚餓, 一路食, 一路發覺海邊沿路都滿了人群, 唯獨這幾間餐廳的門口, 沒有人敢阻住人地做生意。餐廳老闆話, 你地等陣隨便出去睇啦, 佢封左路, 無客入黎架啦, 本來我地都唔開的, 因為呢幾日好多人, 差唔多賣哂d野啦。最正係我直頭坐正在門口那枱, 基本上我係唔使行出門口就可以看到了。不過, 我當然會行出去趁下熱鬧啦。大約兩點, 就開始啦, 差唔多到兩點半到, 遊到去我地樹, 我其實食飽晨早就行左出去等啦, 媽媽, 哥哥舅母怕熱, 唔出黎住, 咪一個人在等lor, 睇住d人越黎越多的, 不過後尾佢地都間唔中出黎看下, 倦就入番去, 而我就企足全程。大約四點半到完lu, 都幾特別, 我又唔迫, 天氣又唔太熱, 睇得好舒服。完場後, 又走番入間餐廳食埋個下午茶先走, 順便等出邊d人散咁d先。我發覺左, 唔係只係食齋架呢日, 我一黎到食就雞扒啦, 其實只係有小部份餐廳酒樓會跟隨架啦, 因為做生意要緊呀, 確實間餐廳d野又幾好食
食飽飽後, 就去買野返去準備晚餐啦, 因為出邊太人多關係, 好難搵住食飯, 所以決定食公仔麵, 其實係有媽媽就會有人煮架啦, 哈哈。結果我地八掛行去望下碼頭有幾多人排隊, 真係超多人呀, 排到去消防局。我地行到去北帝廟先看看個包山, 再行番出去, 見到廟那樹有平安包賣, 俾香油錢就可以, 咁咪買左兩個今晚食, 試下lor, 跟住我地去超市, 街市買哂餸後, 就返去lu。
返到去看到電視, 四川發生大地震, 有成七點幾級, 好似好嚴重咁, 舅母仲諗住六月去貴州旅行, 貴州就在四川附近, 立即打電話問下佢d朋友點算。長洲魚蛋加公仔麵作為晩餐都唔錯呀, 仲有d齋都幾好食。吃飽看夠電視, 就慢慢行出去睇搶包山啦, 本打算就咁在球場外望下就算啦, 因為佢九點幾就派飛啦, 點會咁早行出去呀, 但點知, 行到去球場, 個警察姐姐話我知, 佢話你行去消防局那樹啦, 仲有飛派的, 咁就去左拎飛入球場睇lu, 人唔多, 可能我背住個台啦, 無所謂, 包山向高處看的0麻。等到十一點幾, 開始做儀式同埋有舞獅表演, 好精彩, 十二點就開始搶包山啦, 都幾刺激, 睇住d人上上下又滑番落黎, d包又係咁飛出黎, 諗番想當年, 無安全裝置其實都幾危險。
睇完都只不過係十二點三到, 又行番入屋啦, 其實都幾遠, 都要行成三四個字, 不過沿海邊行幾舒服。返到去食埋個平安包, 沖埋涼就訓覺lu。四個人住一間二千呎的屋都幾爽。
@入長洲時人頭湧湧
@等候看飄色的群眾
@表演飄色的小朋友
@北帝廟外祭祀的包山
@未被攻冚的包山
@二千呎的大屋
13/05/2008 星期二
各人未去過坪州, 所以今朝決定去坪州一行。慢吞吞咁起身, 十一點幾出發, 先去搵野食, 又去番好食的魚湯米線餐廳, 先來一個早午餐先, 跟住撘一點橫水渡過去。到左坪州, 大約45分鐘到, 在船上睇左陣報紙, 訓左陣又到。其實一路以來都有人講過坪州係無野玩的, 同埋行完整個坪州只係一個鐘頭到, 我地落船後, 漫無目的咁行, 見路就係, 係舖頭到穿插, 但原來行穿插舖頭就係行咁家樂徑啦, 好攪笑。我地一路行, 行到海邊, 雖然烈日當空, 但係好舒服, 望住個海, 在涼亭坐在一陣, 吹著海風, 好爽。
跟住我地沿住條家樂徑行, 出番去, 家樂徑沿路就係民居啦, 好容易誤入左人地屋企的。其實行左一陣就已經行完啦, 可能係平日, 無乜人, 舖頭又無乜開, 所以靜英英的, 但見到裏邊居民真係簡樸, 好悠閒的。無野行, 又無野好食, 就入左惠康行, 全個坪州最大的商舖了, 佢地連銀行都係隔日先開的。結果買左梳蕉一路行一路食, 好攪笑, 因為無野行, 結果坐在係公園的涼亭到等船, 涼涼的在看報紙, 好阿伯的感覺, 但又確實幾舒服。
三點終於可以撘番船出長洲啦, 在船上好快就訓著左lu, 有少少太陽哂住, 又涼涼的, 真係超勁好訓, 訓到埋岸都唔想起身。跟住我地去食左個下午茶先開始買餸, 個餐廳都唔錯呀, 我地發覺, 在長洲基本上, 是但行入一間餐廳d野食都唔會差的, 又唔係太貴, 可能做開街坊生意啦, 所以好用心做咁。
跟住就買野BBQ啦, 今晚兩個舅父放工先入黎, 雞翼豬扒我地已經醃好拎入長洲的, 而其他野先入到黎買, 但又叫左泉舅父, 佢個倉有乜, 拎埋入黎燒。等到八點幾, 佢兩個終於入到黎啦, 開始燒野食, 呢間屋可以邊看電視邊燒野食, 而泉舅父又拎左一盒大蝦入黎, 手臂咁長的, 不過食一隻都應該飽了, 我地又買左蜆, 好甜好好食。燒完野食, 就食泰國空運到港的芒果同埋一早煲好的腐竹糖水啦, 真係飽到嘔呀~~
聽朝泉舅父就出番去返工, 而我地都要十一點交屋出番去LU。
@中午的坪州
@黃昏的長洲
13/05/2008 星期三
九點零起身, 預備十一點交屋, 出番去啦, 幾鐘意呢間屋, 夠大, 可以俾我跑跑跳跳, 但個感覺, 好似梅窩間好D, 集中D, 呢間好似太空洞咁。同埋唔明點解會有熨斗而無風筒LOR。
交屋後, SHOPPING團開始, 即刻去搵番尋日個阿婆買蝦乾, 因為佢最平同埋最靚, 尋日買左俾泉舅父, 今日到我地買, 結果幫襯左阿婆買左好多野。之後又番去買開那檔買埋其他野, 就去同舅父行左個圈, 搵埋佢想搵的平安包鎖匙扣, 而我就買左NDS筆, 哈哈。買完野就去飲茶啦, 看見報紙上的報導, 四川大地震的狀況, 真係無陰公, 睇份頭版, 都睇左成程船咁滯。
返到香港, 分道揚標, 先返歸, 在車上仍然抱著鴨仔訓到死豬咁, 因為其實未回氣。夜晚, 就去左新墟大排檔食晚飯, 好耐無見肥仔啦, 終於見到肥仔了, 呢個星期, 係咁食, 真係肥左好多呀~~
沒有留言:
發佈留言