飯局

今晚約左伊中的工友食飯, 佢地一早過左去打牌, 唱k, 佢地d老歌, 基本上我地呢d後生, 聽都未聽過的, 但佢地唱得好陶醉架, 仲要加埋那個年代的唱腔, 勁頂癮。佢班友打牌又勁, 行開一陣, 又一舖架啦, 快到呀。

BILLY SIR又一新LOOK, 次次見佢, 個LOOK都唔同, 今次玩藝術家LOOK, 鬈毛加羊咩鬚, 再加黑框眼鏡, 潮爆呀, 佢又黑喎, 攪,到個樣烏烏糟糟咁啦, 之但係佢教美術的, 如果係教理科的, 完全係做錯左個實驗, 攪到咁0既樣呀, 哈哈。

我都唔知今晚妹妹會黎添, 如果唔係買定玩具俾佢啦, 佢好得意, 好好玩呀, 開始大個女, 無左之前甜似小新LU。不過佢越黎越惡死呀, 玩玩下, lin住我隻手, 整痛人呀, 個樣仲要攪到面容扭曲, 震哂咁, 起肉緊的, 出盡全身氣力, 慕求整痛你咁。佢行得好得意架, 但我抱佢, 佢會喊走的, 佢只係跟肥佬架咋, 肥仔佢又跟, 光叔佢又跟, 可能佢老豆係二百磅肥佬啦, 好肉地先會跟。

BILLY SIR同妹姐, 兩條友, 由頭飲到尾, 我諗佢地由六到點開始飲架啦, 先黎紅酒, 飲左一支, 之後開始飲啤酒, 我諗佢兩條友, 飲左成半打大啤架啦, 可能唔止添呀。我發覺, 原來師奶係玩得顛過d後生的, 聽佢地講, 聖誕抽禮物, 係會買紅色底衫褲黎抽0羅, 仲要即場著住(外邊)影相添, 佢地真係顛架。