婚宴

今日我好叻, 我推左一單飲宴, 做少一單人情。事緣呢期, 金豬年確實好日, 其他部門的兩位舊同事, 即曾在我部門工作的同事, 不約而同分別在十月及十一月結婚, 而這個消息, 又被我的八掛老細無啦啦撞破, 結果, 攪到我。

我老細一知道呢兩個同事結婚, 有日放工就走埋黎同我講:
老細: 今年金豬年喎, 幾時到你呀,？
我: 下, 咩金豬年呀? (我仲未知有人結婚的事)
老細: 好年, 結婚呀, 好耐無喜事
我: 下, 結婚, 無錢呀。
老細: 要幾多呀, 我幫你借~~
我: 借左係咪唔使還呀, 何況結我都無諗住擺酒。
老細: 都叫你搵個有錢架啦。
我: 有錢又點, 家下現代女性, 唔使靠男人生活架喎
老細: ??!!???!!!??

佢煩左我好耐, 我好難先打走左佢, 後尾聽瑪姬講番, 佢話好耐無喜事, 好想沖喜下, 好想嫁女, 頂, 咪玩啦, 雖然我好想結, 但係都唔係為左你結呀, 低能, 我仲有好多技術性問題未解決到咋。

點解唔去飲, 一來唔係全部我section d人都請, 全部請的都是老餅, 又會講d陳年舊事, 實悶死我, 二來我老細係必定去的, 我更加唔想去, 成枱人, 得三個人未結婚, 一個四十幾歲搵唔到老婆, 一個廿幾三十歲肥婆搵唔到老公, 剩番的目標又係我, 唔好啦, 咪煩, 人地問到如果請, 去唔去, 可以揀的話, 所以我咪揀左唔去lor, 等人地唔好派帖黎, 呢d同事先叫做識做架0麻, 唔好下下飛張帖埋黎, 又唔係同你熟, 條氣唔順架0麻。