中秋節

25/09/2007 (中秋節)

今日中秋節, 選擇左出街上堂, 上一堂極之無聊的堂, 九百幾蚊堂, 公司俾, 但係值唔值? 咁係唔值, 講埋d野, 我都會去做, 但實際呢, 做到嗎, 這個世界好多野會限制住你的。上堂過後, 難得早食飯, 就落左中環同雲妮 & unique食lunch。今日去左"triple o's"到食, 個包好大, 等於兩個麥當當咁大, 加薯皮及汽水。五十蚊一個餐抵嗎, 我覺得抵, 因為好食, 同埋真係好大, 唔似麥當當, 食完無幾耐會肚餓, 而呢個餐, 我足足頂住起碼五個鐘。

吃過飯後, 返灣仔返工, 遲到, 但無理, 填e-site填到無遲。hea下 hea下咁係到等放工, 今年無切餅同埋生果, 因為生果太早黎, 食哂, 而月餅, 切左都唔會有人食, 所以成個晏晝都好靜, 我地只係劈左個籮柚食。準時四點半閃人, 我真係閃得好快, 因為我要去趕船, 趕五點四班船入長洲。未夠五點去到中環, 見早, 就行左入IFC經CITY SUPER出去, 見到CITY SUPER D生果同埋菜, 俾人搶哂, 而排隊那條龍, 由街頭排到街尾, 痴線。

五點零五分到達碼頭, 終於有一次係唔使跑去碼頭追船。剛遇到慢船一班, 真開心。一上到船, 搵個位坐好等開船, 突然發覺, 越來越多人, 後尾D人要周圍搵位坐, 很少見。經過四十五分鐘的船程, 終於到達長洲了, 落船時, 已感覺到長洲好似會陸沉咁, 因為好鬼多人, 原來我班船坐滿, 係三層坐滿, 連樓下放貨那層都坐滿。

六點零到達, 先去渡假屋放下行裝, 我好叻, 識自己行去搵間屋, 唔使人接。入到屋, 嘩嘩嘩嘩, 間屋好大, 四間房四個廁所, 一個廚房再加一個大廳。我同媽媽間房仲係套房添, 無人同我爭廁所啦。未人齊, 訓醒又肚餓, 不停咁係到食薯片, 仲有美味的芒果糯米糍。悶悶地, 同媽媽出街補給薯片(因為俾我食哂), 行去消防局那邊, 沿路見到勁多人, 還看見有兩隻快船, 一隻大船等埋岸, 痴線。沿途見到迷你消防車, 消防電單車同埋救謢車, 由於車細, 消防員叔叔換衫, D手要伸哂出車外, 好攪笑的。

八點幾, 終於人齊了, 就拎野出去燒野食啦, 由於間屋樓下係電站, 所以要出去租爐, 一早已經搵人訂左爐, 而泉舅父尋日已經在倉到拎左D墨魚丸, 牛排, 羊排, 雞翼, 蝦返黎, 今朝的先頭部隊, 就係負責運食物入黎啦, 點解要運食物, 因為我D屋企人怕呢到D野貴, 又饒咀, 同埋自己醃食物係好食D的。佢地連醬料都運埋入黎, 勁多野拎左入黎。而我地個爐係在天后廟那邊的, 其實即係在天后廟前燒野食, 呢個位係非法的, 但今日係中秋節, 又在長洲, 邊有人理呀, 因為沿住個海邊, 成個天后廟空地都係係到燒咁野食, 超多人, 勁好氣氛。

結果是晚勁多野食, 除了牛排, 羊排, 雞翼, 墨丸, 腸呢D野外, 還有, 青紅黃椒牛肉粒串, 牛油金姑秀珍姑, 蕃薯, 牛油粟米, 燒蜆, 燒大蝦。D蜆, 係臨時加插的, 因為同媽媽行街時買的, 很新鮮的。唔使落任何調味料, 燒熟, 連埋那些海水味食, 超好食。而大蝦, 又係力作之一, 唔使落調味料, 很香, 很甜。而我燒完腸仔, 墨魚丸後, 就用竹籤拮住黎食, 好街邊FEEL, 所以特別好食。咁多野, 咁係食唔哂啦, 很尾將D牛粒串掉哂, 因為試左兩條, 燒熟左D椒, D牛肉又老哂喎。而個個又飽到死咁滯, 所以放棄左佢。

跟住我地就拎住我地D燈籠, 一路行番去渡假屋, 很多年無咁樣拎住個燈籠行街啦, 我專登買左個楊桃燈籠入黎玩架, 我想對上一次玩燈龍, 應該係中三那年了。而我地一家大細, 真係好耐好耐無咁樣過中秋節啦, 係差我老豆LOR, 唔肯入黎, 激死人, 唔係就齊齊整整架啦。我想都應該有廿年無咁過LOR。

今晚個月亮又圓又靚, 雖然有時有舊雲飄埋黎, 但係好快就會走左, 月說一路在我們的頭上, 一路伴著我們燒烤, 風也很大, 很舒服, 但係成日吹熄我個燈籠啫。返到渡假屋, 唔使爭沖涼, 同時幾個人沖都得, 係無咁多洗頭水啫。之後又食生果, 同埋飲糖水, 零晨兩點幾係到做埋D咁既野, 痴。玩左舖波子棋就去訓啦, 超眼訓, 但係無帶到鴨仔又訓唔著喎, 都唔知幾點先訓著。

26/09/2007 (追月夜)

今早唔知幾點訓, 但係七點幾開始俾人嘈醒, 泉舅父開始起身落街買報紙刨馬仔，訓番無幾耐, 結果八點幾就起身lu, 因為個太陽好耀眼呀。梳洗後, 就係間屋到遊蕩, 睇下報紙, 食埋月餅做早餐。之後就去左哥哥同肥仔間房玩大長碌, 碌醒肥仔, 那兩張單人床, 拼埋都幾好碌的, 好好玩, 嘻嘻。等齊人起身, 十點半到就交屋走人lu。入黎咁多野, 出番去又係咁多野, 一樣咁重, 都話拎架車仔入黎架啦。泉舅父突然有part time開工, 即閃人, 而我地就沿路行左去北帝廟那邊, 看看北帝廟, 跟住就轉頭搵茶飲啦。喝過茶後, 就開始買手送啦, 再入長洲, 媽媽話要去上之那舖買番條咸魚, 佢話好好食喎, 結果同舅父兩個滿載而歸。之後再買埋魚旦後, 就撘船返歸啦。今日真係好熱呀~~~

真係好怕撘快船, 拋到我想嘔, 都係慢船好, 搖下搖下好好訓。大約三點返到屋企, 立即沖過涼, 而肥仔就打機, 後尾我按耐唔住都訓左陣。大約四時半, 又出發入大埔探婆婆啦, 今日婆婆好精神, 非常精靈, 仲無啦啦講野添呀, 當然係那些 "係", "無"呢d啦。

探完婆婆, 就去左火炭大排檔的德記雞粥食飯啦, 那窩雞粥確實好食, 但係要分開黎計的, 粥很滑, 雞新鮮, 走地雞feel, 因為雞皮有彈性, 但好明顯分開煲的, 粥無雞味, 但隻雞真係好好,食。跟住仲食左乳鴿, 蜆, d蜆當然無我地燒的咁好食啦, 辣酒煮東風螺, 好香, 好食, 但很辣。仲有其他野食, 九個人都係五百幾蚊, 好抵, 是晚泉舅父請客, 因為晨早留留起身刨的馬仔中左, 但係影相都係輸左, 贏少左好多錢。 今天的月亮還比昨天靚, 又圓又清呀, 還可看到月球的表面添。

這個中秋就係咁, 熱熱鬧鬧咁過左啦, 真係好多年無試過咁lu, 真開心。