小龜龜 : 導遊兼領隊, 八年前曾跟鴨仔團遊台灣, 對任何歷史的認識為"0", 道路認識為"0", 方向感更"負數"。
哥哥 : 年紀最大, 年前曾自由人遊台灣, 但所有團應去的地方都無去, 由朋友領住, 住人地屋企, 對台灣道路認識一般, 只對曾去過的地方有印象。歷史認識必比我多, 再加上在中樂團浸淫多年, 聽故仔多。
迪迪 : 年紀最小, 沒有遊台灣的經驗, 但有遊雲南自由行經驗, 看地圖為強項 (只限旅行時用, 香港係蕩失路的), 方向感為"正數"。歷史應比我們好, 因為離開會考時間不太遠, 而佢歷史成績都唔錯的。
ling ling : 曾有三次遊台經驗, 第一次為訓練, 只在酒店與練習場之間遊歷, 第二次跟團, 第三次自由行, 但所有事物依稀記得, 對書畫大字最有興趣。
前傳
由於迪迪同哥哥係未曾遊歷過台灣各項景點, 所以今次除左食, 溫泉, 就會去埋d團會去的景點, 作到此一遊。我地會用捷運作為我們的交通工具, 因為實在太方便, 所有景點都到達, 而我們的酒店也在捷運上的。同埋各人都帶備了後備旅行袋共三個盛載手信, 因為長清單頗長, 全部都係各父母要買回來的東西, 好像務求要我們半喼去, 滿喼返 。
1月6日 第一天
香港國際機場→台北桃園機場→台北凱撒酒店→台北車站→國父紀念館→忠孝敦化站→忠考復興站→台電大樓站→台北車站
晨早八點起來, 梳洗過後, 作最後行李檢測, 天氣很好, 有陽光, 決意涷死把就, 只帶一件抓看外套前往, 真係涷, 去到先買衫 (旅行咁係要消費下架啦, 咩呀)。九時許, 撘車去碼頭坐船去東涌再轉巴士去機場, 點解唔架車, 因為一架車車唔到四個人, 四個喼LOR, 又無可能兩架車架, 停車場費貴, 所以要辛苦下。
到左機場, 搵埋迪迪, 佢地仲早, 我出門打俾佢, 佢架巴士已經在東涌到遊咁啦, 佢兩個都有帶二合一的褸, 結果最怕涷的著最少衫, 帶最薄衫, 大佬呀, 天文台個天氣報告RANGE係16-26度喎, 點帶厚衫呀。到長榮櫃位CHECK-IN, 無人, 咁早咁係無人啦, 十點咋, 我撘十二點機呀。寄埋行李, 就去左TERMINALS 2食早餐啦, 那邊真係多好多選擇呀, 唔使食黎食去都係大家樂。結果我地去左一間餐廳到食, 唔記得佢叫咩名, 只係記得佢每張卡位都有部電視係到, 一路睇叮噹, 一路食早餐, 叫左個原價係三十六蚊的一個早餐, 但哥哥有機場PASS, 所以折實兩條友都係四十八蚊, 平左成十蚊個早餐, 又好食, 尤其是那個奶油脆豬仔飽, 好食到震呀。
食完野, 提款就行番過去過關上機啦, 三十幾號閘, 又要撘無人例車。過到去等左陣, 就上機啦。班機大約只有三份一到坐滿啦, 勁多空位, 我一個人坐一個窗口位, 勁爽呀, 好有一個人去旅行FEEL。睇左半套刺青, 食左兩啖好難食的飛機餐 (真係幾難食, 佢基本上係用黑椒汁去蓋哂所有味道), 就到左桃園機場啦, 落機時大約點零鐘, 過埋關, 拎埋行李, 就撘國光巴士去台北車站啦, 車程大約一個鐘頭到, 架車好舒服, 好好訓。
大約三點零到, 就到左台北車站啦, 基本上酒店就在台北車站對面, 我地望住間酒店, 望住張地圖 (台灣通街都係圖的), 結果都係捐捷運站過去最快最方便, 事關6號出口上去直達酒店。到左酒店CHECK-IN, 間房比預期中好, 張床好舒服, 係D裝修同設施比較舊, 但都大, 舒服。我同LING LING一間房, 我立即放番我隻鴨仔出黎, 等佢都舒服 (無錯, 我又帶左鴨仔去旅行)。
放下行李, 就出發去第一個景點啦, 但去之前, 先去買一張捷運悠遊咭, 類似我們的八達通, 面值四百蚊台幣, 一百蚊按金, 但只要三日後, 用唔哂, 按金全數可退還, 最重要係撘捷運有八折架。買完咭, 就撘車去國父記念館站啦, 到左國父紀念館, 看到到換兵的儀式, 只看到最後佢地返歸的那一刻, 失望, 無可能等多一個鐘架。國父個像還建在, 仲有兵守住, 但係佢裏邊的古董車呀, 用過的東西呀, 全部唔見哂LU。所以只係拍過照就走人。見時間還早, 仲有腳骨力, 就決意行去忠孝敦化站, 距離大約旺角行去太子咁上下啦, 只要搵0岩方向, 一條直路好易行。一路由國父紀念館公園行返出去, 沿途見到好多人放狗, 但又見個地方好乾淨架喎, 唔使留下大小二便在街上, 台灣人都幾有公德心, 同埋佢地真係好鐘意養狗的, 多數都係細狗, 同埋係玩具貴婦狗。沿路行, 那一區的舖頭基本上同香港沒有分, 一路行的舖頭都係香港都有的, 當然有平有貴啦, 但家下行街唔會有D電單車無啦啦係隔離飛過0羅。
到左忠孝敦化站, 就搵我想食的冬甩舖頭 (MISTER DONUT)啦, D旅遊書推介架, 好似好好食咁, 咪去食當TEA羅。一個冬甩大約為三十五蚊一個台幣, 大約八個幾一個啦, 但好食過香港由澳洲黎那間呢, 無咁甜。食完TEA都係五點到, 行去台北巨蛋到睇下啦, 點知行到去無野好睇的, 到此一遊, 但佢個外圍幕場電視真係好巨。
去完巨蛋, 又行番轉頭去搵我地的晚餐啦。食晚的晚餐係度小月, 台灣夜晚的街道不遜於香港的, 都係五光十色, 錢櫃仍然都係咁大間。黎到度小月, 咁係食擔擔麵啦, 佢個擔擔麵係最出名的, 煮都係在一個車仔檔到煮的, 都幾特別。佢有分台南味同台北味, 我咁係試台南味啦, 佢原本係台南美食黎架0麻, 迪迪話台南味真係好食D喎, 個湯濃D, 但我食唔出。而那個服務員又推介我地食醉雞, 又確實好好食喎。其實可能太多香港人去啦, 基本上好多台灣人都識聽廣東話的, 我諗日文佢地都識的。
係咁二食完度小月, 咁係要行下啦消化下, 等下餐啦, 就由忠孝敦化站行去忠孝復興站啦, 行咩, 咪SOGO同埋地下街LOR。SOGO都係到此一遊下, 因為台灣好多SOGO同埋三越的, 而地下街, 係貫通兩個車站的, 會有商舖, 但係佢令我好失望, 因為D商舖好唔掂, 買D師奶野, 佢做唔到日本咁, 咁旺, 好靜, 真係直行, 行過就算。
終於行完, 就撘捷運去台電大樓站的師大夜市宵夜啦, 師大夜市, 呢期好興, 我覺得比士林好, 佢其實係一個十字路, 四邊都係商店同食舖, 基本上乜都有得食。我地食左鹽酥雞, 同埋一大碟鹵水, 好誇張的, 但係佢個汁好好食。行完野, 行左一陣, 買埋口罩俾泉舅父, 就撘車返去酒店啦。酒店個花酒水力好夠呀, 沖涼勁舒服, 爽。
明天行程都係以觀光食野行街為主, 所以唔使咁早起身, 九點啦。
1月7日 第一天
酒店→中正紀念堂站→士林站→古亭站→市政府站→西門站→台北車站
九點morning call, 十點準時落街食早餐, 一路都無諗過食乜早餐, 本著台北車站是市中心, 實有野食啦, 唔去諗, 每朝先算。一落街, 是但行個似有野食的方向, 我地想食d地道台灣早餐, 一路行都係一d外賣細店, 但我地又想坐低食喎, 一路行見到邊間多人, 邊間個樣ok就入去食。結果我地揀左一間唔起眼的, 食三文治, 蛋餅, 蘿蔔糕的舖頭, 其實一路行都係食呢d野的舖頭來的, 只係呢間好似有d位坐, 同埋都幾多返工人士買咁, 就入去食lor。晨早流流咁係保守d好, 叫左個腿蛋治加柳橙汁, 一到手, 嘩, 正, "哄"底的, 仲有少少果醬加埋青瓜絲沙律, 好好食, 係杯橙汁普通d野, 又食左蘿蔔糕, 又係超好食, 四條友都係百三蚊台幣, 為番港紙十蚊都唔使, 又好食又抵。
食完早餐, 就撘車去中正紀念堂啦。一出車站, 公園一個, 看看地圖, 咁係先去看看"自由廣場"牌坊啦, 影張相留念下, 可能馬英九當選會變番"大中至正"呢。看完後, 就一路行過去中正紀念堂啦, 家下蔣生, 好多紙鳶陪伴住佢, 攪到不知所謂, 所以我都係影左幾張相, 懷念下八年前係到影左好多相的過去, 就繼續刨地圖啦。其實周遭環境唔錯的, 天氣超好, 藍天白雲, 但好氣, 好在帶左薄衣, 但都成身汗。影完相後, 時間還早, 又未肚餓, 就去埋故宮博物館先。先撘車去士林站, 跟住再轉公車到博物館, 去到都成十二點啦, 去到人煙都無隻, 幾驚佢休息呀, 好在唔係。首先去睇棵白茶同蟲先, 跟住頭一層仲有興趣咁行, 玩下蓋印, 跟住的下一層, 我已經無任何興趣了, 對我來說, 藝術, 文物, 全部都係一堆爛銅爛鐵, 可能知佢的歷史背景會好d的, 奈何我的歷史係"0", 結果每層我都係在門口玩哂佢d蓋印, 係咁意入去行個圈, 就坐在外邊, 研究下等陣食野的地方點去。我真係發覺我好似導遊, 哈哈。
結果去到兩點半, 我頂唔順啦, 其實仲有層半, 但真係好肚餓, 同埋大家都好倦, 同埋無乜心機行啦, 除左迪迪, 所以都係走啦, 撘番公車再轉捷運去古亭站食永康牛肉麵。到左古亭站, 要行成十五分鐘先去到間舖頭到, 倦到嘔, 去到都成三點半啦。間舖頭跳左電, 修理當中, 我地就在黑暗暗的舖內, 靠著天然光來開飯。立即來一個粉蒸排骨, 好味, 再黎小吃, 再吃牛肉麵, 基於我唔食牛肉關係, 我食左紅燒牛筋麵。好好食, d牛筋多到食死人咁滯。食到最後, 突然間"pop"一聲, 見到冷氣後冒煙, 原來連雪種都爆埋, 好在我地食完lu, 埋單走人。
出門見到對面小學的學生在掃街, 完來係每個學生都要掃的, 除左學校裏邊, 連校外的街道都要清理, 很好的學習呀。我地沿住條街另一個方向, 去看看有什麼好看, 結果入左間又係幾層樓的書店行左陣, 就搵公車返酒店抖抖先。方到酒店又被樓下的雪糕吸引了 (其實尋晚已被吸引), 入到去二十幾蚊港紙一杯啦, 同香港差唔多, 但佢個雪糕好大啦, 同埋係香蕉味, 好滑好好食。返上房食完雪糕, 坐左陣, 又出發啦, 去誠品行書店。
市政府站一出就會見到一棟大廈寫住誠品信義旗艦店, 共有六層樓高加兩層basement, 共八層, 有食店, 有商店, 連agnes b, porter都有舖。決定各自修行, 我由四樓精品開始行, 嘩d咭靚到, 好想買哂返香港, 唔平架, 廿幾蚊港紙一張架, 但係買黎都唔知做, 睇下算。一路行落去, 四周圍都係書架, 個個都差唔多, 攪到我行行下都蕩失路, 行極都好似行左咁, 是但拎本書, 坐低睇左陣, 又繼續啦, 結果停留最耐的都係旅遊書啦, 一來看一看本地台灣旅遊書, 看看明天溫泉位置, 點去。跟住發現係超多日本旅遊書買的, 勁詳盡, 好快就七點啦, 外邊黑齊了, 夜景很美。
我們遠觀101大樓, 朝著佢的方向去搵我地晚餐的地點, 我地今晚食sabu sabu, 係ling ling家姐介紹的, 原來間野係在new york new york隔離的商場, new york new york想當年黎過架, 同個迷你自由神像影過相的, 家下那邊好繁了, 晚間好多燈燈好靚。呢餐sabu sabu為港紙百零蚊一個人, 但係任食的, 牛肉豬肉蔬菜菇菇任食, d豬肉好好食呀, 切得好薄, 好似牛肉咁一滾就熟。食左一個鐘到, 已經飽到上心口啦, 最後還有一個咖啡味的果涷做甜品。
八時許, 食飽後, 就慢慢行番去捷運撘車去西門町行行下, 沿路行番新光三越穿番過去, 呢間新光三越共四座building連貫著的, 看旅遊書, 誠品總面績係10萬平方米, 而呢間三越, 係100萬平方平, 痴線, 點行, 我只係穿越佢底層的店舖, 只看見買首飾, 俾我真係會乜都買唔到, 眼花撩亂, 多選擇到呀。一路行, 街頭又會有d演藝者係到扮野, 唔郁那些呢, 好似歐洲街頭表演咁, 你放錢落, 佢會轉post。
去到西門町, 九點幾啦, 比我上次黎少左好多人, 但仍然係聽到好多廣東話lor。其實去呢到目標都係行下, 唔食野啦, 因為覺得鴨肉扁同麵線都麻麻地好食, 另外目的就係去黑橋牌專門店買肉醬罐頭俾泉舅父。之後再到古怪得意糖果屋買糖果做手信。佢d包裝好靚架, 有d就攪笑的, 有姨媽巾啦, condom啦, 仲有大乃飽同埋膠布啦, 結果佢地選購左好多, 都話要去架啦。
買完野, 就返酒店啦, 明天要去泡溫泉, 八點要起身啦, 要早d訓。
1月8日 第三天
酒店→新北投站→淡水站→台北車站→劍潭站→台北車站
八點準時起身梳洗, 尋晚已經執好了今天泡溫泉的東西, 九時出發食早餐。今日早餐都係漫無目的的, 但行左酒店的另一個方向, 但點知行行下都係返番去尋日那條街, 但今天我地搵了另外一舖, 大d坐得舒服d的, 但當然係檔口仔啦, 所以早餐貴左幾蚊, 哈哈。今日我都係食三文治, 佢地仍然都會係哄底的, 正, 哥哥食漢堡包, 迪迪就試蛋餅, ling ling食厚多士, 蛋餅其實係蔥油餅加蛋架埋少少餸一起煎的, ok好食, 但唔喜歡。而ling ling那個厚多士, 好香, 佢話好好食。
飲飽食醉過後, 就撘車去北投站再轉車到新北投站, 車程大約二十幾分鐘就到。這兩個站之間的車程只是三數分鐘, 車卡比平時捷運的短, 只有三卡車, 還有坐位不多的, 車途中, 行駛很慢, 或者因為與民居極度接近的關係吧, 但慢速, 可以看多點兒風景, 雖然到處也是建築物, 但其實我們已到達郊區的了。到左新北投站, 十點幾, 看旅遊書說, 佢話會有shuttle bus的, 但望極都無, 係有條路行上去, 行要三十分鐘的。問左那個交通警, 佢話shuttle要提早打去約佢的, 所以我地決定左撘的士上山。大約五分鐘到, 就到左春天酒店啦, 間酒店都ok架, 住一晚都ok, 但係貴lor, 所以我地只係黎享用露天溫泉, 但天氣好熱lor, 廿幾度泡溫泉, d水溫全部都係三十九度至四十度。
俾錢後, 拎左個籃就去換衫啦, 行過男更衣室好流, 好唔掂, 好在行番去女更衣室, 外表同裏邊都ok, 係個locker流左少少0者, 但又唔易俾人開架喎。換過泳衣, 就開始泡溫泉啦, 時間還早, 唔係好多人, 多數都係一group人霸一個池, d池邊個牌牌寫的個池的效用, 寫到好英架, 包括可以美容, 減肥, 又咩減血壓, 最勁係可以修身的。夠竟點先可以修身呢, 咪水力按摩lor, 係咁俾佢打, 確實feel到d肥膏係到震呀。仲話坐在池中, 遼望天空, 可與大自然融入一體的感覺。
浸完一個又一個, 跟住去左訓下d熱石黎休息下, 即刻退入想睡眠的狀態。起身再浸, 浸到咁上下又訓左係池邊的太陽椅到, 今次真係訓左, 太陽伯伯又好努力喎, 突然間被照醒, 即刻叫醒哂身邊三隻野, 唔係燶哂, 我好醒呀, 訓時已經搵毛巾蓋埋塊面同全身。十二點半左右, 換衫閃人啦。台灣溫泉咁係唔同日本溫泉啦, 都係覺得日本溫泉唔著衫浸得開心d, 或者加埋天氣涷感覺才好呢。
一點走人, 本來諗住撘shuttle落番山, 但如果撘shuttle落山, 就會去唔到ling ling另一推介食肆喎, 咁循例問下reception滿足下唔想行落山的人感覺啦, 結果係天意, 一點十分開的班次已經爆滿, 下班時間為一點半。呵呵, reception說, 落山都係行30分鐘, 咁家下又精神, 行得郁, 等車都要等三十分鐘啦, 所以都係行落山。落到溫泉區入口, 見到ling ling家姐所講的溫泉拉麵店啦, 叫左溫泉蛋, 溫泉豆腐, 正正正正正~~~, 那個排骨都好好味, 再加埋一碗叉燒拉麵, 嘩, 好好味, 爽。
食飽後, 就繼續行落山啦, 途經好多幾靚的建築物, 仲有一間介紹台灣土著的博物館, 入去影過相後閃啦, 出門時見到一對男女在自拍, 對面馬路的一個台灣女仔, 竟然跑過馬路想幫佢地影相呀, 台灣人真係好熱情。兩點幾離開北投, 撘車去淡水啦, 車程都只係二十幾分鐘到。
到左淡水, 個車站都幾特, 係紅磚屋來的, 其實每個捷運站都不同的, 會用番那個地區來配合的, 好似北投咁, 全部用天然光。踏出淡水車站, 向淡水老街行, 第一橦建設局就會見到四層樓高的startbucks, 痴線, 使唔使咁大, 但係地標來的, 以佢來分方向。一路行入去淡水老街, 我無來過的, 好少人, 行得好舒服。路過見到一間賣condom的舖頭, 嘩d套包裝得超靚, 完全睇唔出係套來的, 但係好鬼貴lor。 繼續行入去, 就去出名食魚蛋的舖頭食魚蛋, 個湯好清, 魚旦彈牙, 仲有一粒超巨型的墨魚丸。
吃飽後, 一路行去搵目標, 淡水魚酥同埋鐵蛋, 都係落哂order的手信。之後再去搵巨無霸雪糕店, 佢個軟雪糕可以拉到好高的, 但其實唔係雪糕係雪巴來的, 但唔好食的, 都係烤魷魚好味d。黎淡水目的係看日落, 所以就再撘船去漁人碼頭那邊了。經過十分鐘船程到達, 一個碼頭, 其實咪一條橋lor, 但係那個海濱長廊又確實幾靚的。我地坐在舖頭的椅上休息食蝦片時, 遇到一隻超可愛的小狗仔, 佢太細了, 上不到樓梯, 但佢嘗試上去時的樣子超攪笑。四點幾五點, 日落了, 但天氣不好, 雲遮檔了陽光, 沒有咸蛋黃, 失望, 但如果同愛人去又望到咸蛋黃又確實好浪漫架。
五點幾, 無靚日落, 走人啦, 返酒店放抵野先, 返台北車站要大約九個字車站, 我地咁係訓足全程啦, 好好訓, 台灣人撘捷運多數都係看書的, 同埋好少大聲講野, 好有文化的, 所以好靜。返到車站, 訓醒好爽, 得哥哥話要返去抖, 結果同迪迪, ling ling三個人去搵太陽餅同埋蜂蜜蛋糕啦。太陽餅, 跟據網上的資料是在台北車站地下街, 但係行左成條街都搵唔到, 失望之時, 決定去搵蜂蜜蛋糕算了, 但點知由台北地下街沿站前地下街咁去搵那條街最近的出口, 竟然在我們差不多到達出口之時, 搵到我想搵的太陽餅舖呀, 超開心, 立即買了, 那個叔叔好熱情, 送左三個芋頭酥俾我地食, 叫我地試下, 試0岩再返黎買。貪小便宜的我們咁係話好啦, 但我地一路行一路食, 又真係好鬼好食, 因為係熱的, 超好食, 所以我地決定搵完蜂蜜蛋糕返轉頭再買。點知我地搵極都搵唔到間舖, 都成八點啦, 唯有返轉頭買左芋頭酥先啦, 跟住多口問下個叔叔, 佢話那間舖執左啦喎, 下~~~~, 咁又多口問佢仲有無第二樹有得賣啦, 佢介紹左第二間俾我地, 叫做"一之鄉", 佢d半喊淡廣東話, 我地聽到"一支香", 咁大吉利是, 哈哈。佢好人到仲即刻上網幫我地搵地址, 可由酒店行過去的, 所以明天朝早去搵。
買完野, 拿拿林交人啦, 見都成八點幾啦, 就決定一野殺落去士林夜市掃街啦, 還樹都未肚餓。在師大夜市那天, 已經見到有人鉅扒啦, 鐵板燒上的, 好似好好食咁, 今天還樹未食晚餐, 決定一試, 點知又真係幾好食喎。再食埋鹽酥菇, 雞翼, 同埋最重要, 最掛住的白苦瓜汁, 仍然好好飲。士林附近有條街, 成條街都係小食同埋賣衫的, 忍不住買了兩件tee, 都係一百蚊港紙, 都算平啦。
飲飽食醉, 咁係返去訓啦, 明天都要八點起身呀, 因為最後一日手信衝刺日, 買唔到唔使返香港的。行左一日, 最辛苦士林呢段路, 行到腰骨痛, 我諗早上那些水力按摩, 唔係打散左我肥膏, 而係我條腰骨呀, 哈哈。
1月9日 第四天
酒店→圓山站→龍山寺站→台北車站→忠孝復興站→台北車站→機場→香港
晨早八點MORNING CALL, 因為今天最後一天了, 要努力買哂那張清單上的手信。九點鐘, 準時落街, 又係唔知去邊到食早餐, 咁還樹都要行去中山路那邊搵那間"一之鄉"蜂蜜蛋糕店, 就邊行邊搵啦。一路行, 發覺原來那邊都幾無舖頭食野的, 行左一陣, 終於見到間食肆啦, 仲要有搵左多日的豆漿飲, 立即坐底食, 今日呢間食肆有餐的, 一個餐$50台幣, 三日黎最貴的早餐, 但有蛋, 火腿, 蘿蔔糕, 薯餅加一杯大豆漿, 又坐得舒服, 仲有台灣版蘋果日報睇添。俾錢時, 事頭婆仲問我係咪黎旅行的, 我話係呀, 由香港黎, 可能呢頭真係好少香港人會踏足, 因為呢邊唔係旅遊區, 又無酒店, 佢奇怪我地點會黎到呢到食早餐掛。
食完早餐, 一直行, 行行行左好多條街, 一路數住D路牌, 行行下, 終於見到郵局啦, 立即入去買左郵票寄名信片返香港, 其實日日都搵咁架啦, 終於遇到。買完郵票, 行多陣, 過馬路時, 我踩左落去人地未乾的石屎到呀, 我真係在台灣留下左足跡呀, 哈哈。又見到人地D交通警的電單車, 香港的駕寶馬, 人地駕綿羊仔架咋。終於行到"一之鄉"啦, 間舖頭裝潢很精緻的, 貨品的PACKING都很精緻, 好靚架, 一入去立即周圍睇, 仲睇到師傅整咁蜂蜜蛋糕, 勁香呀。結果我地除左買左蛋糕外, 仲買左啫喱, 曲奇, 因為好靚, 好似好好食LOR。買完就返返去酒店CHECK-OUT啦, 其實我地一路行, 行左咁多路都只係行左去台車站的另一邊, 今次途經孫中山的公園, 有間和式的屋, 好靚, 又走入去影相一番。返到酒店十一點到, 落車站誠品拿拿林買左張勁LEUNG的名信片, 係中正紀念堂來的, 上房拿拿聲寫好地址, 執埋行李, 退房LU。
退左房, 寄埋行, 就出發去圓山站, 搵維格啦, 但我地發現我地唔夠台幣買野喎, 諗住去銀行唱啦, 又費事行番去酒店, 點知入到銀行, 佢話要收$100台幣手續費, 同埋個RATE唔係咁好, 咁我地咪諗住行番去酒店啦, 但又遠啦喎, 結果我下結論, 撘左車去圓山先算, 咁大個地方唔係銀行都無間呀。但結果真係沿路都無銀行喎, 咁咪去到維格睇下有冇得簽咭啦, 由圓山站, 行去維格都要成十分鐘路程的, 但台灣D路好易行, 地圖又多, 所以都OK的。去到維格, 我地問那個人可否簽卡, 佢話佢地收港幣的, 嘩, 勁呀, 那個人台灣人係講廣東話的, 0個然係香港人必去的手信店, 攪到連佢都識講啦。我地咁係選購啦, 雖然數量無當年買的那麼多, 但都好重。最好的係佢收港紙找台幣, 我連手續費都慳埋, 正。
行番去圓山站, 再撘車去龍山寺站啦, 去龍山寺站都係一個目的, 就係買指定舖頭的八仙果啦, 仲要係大量那種, 我地總共買左35包呀, 無辦法, ORDER實在太多, 連地址都可以俾埋那隻, 實要走水貨咁走啦。其實俾左地址, 我地都傻下傻下咁搵, 因為那個地址, 我地在我地的地圖搵唔到的, 在車站內的地圖, 又沒有號碼顯示, 所以分分鐘一出, 要行百幾二百間舖的。幸好, 在那條街出口, 第一間舖已經二百二十幾號, 我地所要去的, 是一百八十七號, 只係二十幾間舖到, 好快就到, 一去到, 同店員講要35包, 她就跟我們說, 你下次可以打電話黎訂, 我地可以送去你酒店, 但我地心想, 打電話俾你, 仲貴過我撘兩個車站去搵你呀。
成功買埋八仙果後, 路經街市, 八掛下走入去行個轉, 扮下"蔡蘭逛菜欄"。入到去, 發覺那樹同新墟街市差唔多, 只不過佢係一條直路來的, D人會踩住單車, 同埋綿羊仔入去買餸的, 唔使落車架, 好很意, 又唔會話人車爭路喎, 好得意。我地又發現, 台灣D雞, 隻腳係黑色架, 唔怪得之那天食醉雞, 撘的那隻雞腳係黑色的, 我以為係由第二隻雞到切落黎, 原來係本身係咁的, 幾攪野。行完街市, 返酒店再寄行李啦, 因為車在太多太重了。本來仲要買台灣士多啤梨的, 但係LING LING那天在西門町食過, 佢話唔好食的, 超甜, 浸過糖水的, 因為見到好多PACKING都會包糖水的。如果有時間, 應該去遠少少地方, 有個農場可以採士多啤梨的。
返到酒店, 寄埋行李, 就去左忠孝復興站的太平洋SOGO食鼎泰豐啦, 其實台灣有三間的, 只係呢間唔使行, 哈。超勁多人, 但姐姐又話等二十分鐘就OK啦喎, 咪等LOR。在那層的舖頭行左轉, 好多野食賣呀, 好精緻, 見到有師傅整咁燒餅的物體, 好香, 好似好好食咁, 決定等陣食完飯就買。二十分鐘後, 果然有位喎, 等位開始已經俾左紙TICK野食, 所以入去已經可以入單了, 我們叫左水餃麵, 小籠包, 蟹粉小龍包, 炒菜, 同埋炒飯, 小籠包我覺得無乜特別的, 可能我唔識食啦, 但個炒飯一流呀, 好好食。俾錢時, 先發現, 有張舊版台幣唔可以用架啦, 要去銀行換番, 激死。食飽閃人, 去左買那個日月燒食等陣食。
跟住我地就撘車返去台北車站那邊啦, 目的就係要去幫基哥哥搵隻高雄中樂團出的CD啦。在尋晚搵蜂蜜蛋糕之際, 見到一間叫做"琴園"的樂器舖頭, LING LING同迪迪即時尖叫, 嚷著今天一定要來, 佢地估呢到一定有這隻碟。返到台北車站, 分道揚標, 我同哥哥去搵銀行兌番張錢, 迪迪佢地上去搵住先。但我同哥哥去到銀行, 那個職員又叫我地要去"台灣銀行"先有得換喎, 咁咪搵LOR, 佢話直行會見, 咁行到真係見喎, 但只係見到係櫃員機的, 無櫃台, 那條女人老點我地。咁咪問下人LOR, 好在那個哥哥話, 你過多兩個紅綠燈就會到。哦, 咁又行啦, 但行行下諗到死啦, 台灣一個紅綠燈可以很近, 可以很遠架喎, 大獲, 好在好快就到, 仲去埋人地個總行添, 頂癮。
換完錢, 又快快腳咁行番去搵迪迪啦, 點知突然聽到有個女人尖叫, 望下做咩啦, 原來有隻生豬綁左行條街到, 個女人上的士睇唔到佢, 佢去聞佢呀, 好攪笑, 原來台灣人做牙用生豬拜神的。上到琴行, 見到佢兩條友坐就在係到, 似等咁D野咁, 佢兩個話, 一上到去, 都見唔到有得賣, 個店主咪問佢地想要咩, 佢地話左話要那隻CD, 跟住那個人話, 我呢到無架, 我問下人係第二到拎過黎啦。原來打電話的這個店主, 原來是一位做笛很出色的師傅, 佢D笛好貴的, 因為全部由佢手做的, 三千幾蚊一支的, 普通買大陸一支, 最靚都只係數百蚊, 佢收ORDER先會做一支的。呢個都未算厲害, 原來佢打電話叫的那個人, 係那隻碟的作曲人, 佢咁係有貨啦, 佢叫左那個人專登拎黎俾我地呀。當然係迪迪佢地有撻到朵啦, 講左佢地屬新聲的, 老師係邊個, 而店主同佢地老師都認識的, 同埋作曲老師又是新聲的雇問, 呢個世界真係好細呀。
等待老師來的期間, 店主請我門喝菜同埋芝麻餅, 佢話呢兩個係絕配來的, 但確實那杯菜真係好好飲, 佢話係高山烏龍茶, 太好飲了, 立即問佢在那裏買, 佢話好近咋, 落樓轉右再轉右的百年老字號茶莊。作曲老師來了, 佢地一路喝茶, 一路談音樂, 嘩, 好鬼有詩意咁, 我都未試過的, 原來文人真係咁架喎。三點半到, 我地話要走啦, 因為我要返酒店拎行李, 同埋趕飛機, 臨走咁係要拎埋親筆簽名同埋影相啦。跟住店主帶我地去買埋茶葉添, 其實都幾貴架, 但財哂人安樂, 買埋我使剩$127台幣, LING LING使哂, 無剩。
返到酒店, 拎番行李, 我地好似自由行咁, 在酒店大堂開喼執野, 無計啦, 真係要放D入喼, 唔係個袋唔夠大, 結果四件行李去, 六件行李返, 仲要係全喼爆滿。拎住D行李, 行過去新光三越過馬路就到車站啦, 好唔開心的係, 佢地掛位談音樂, 我無得行新光三越呀。四點半開車, 好肚餓, 但架車實在太乾淨啦, 唔敢食野, 唯有訓覺啦。
去到機場五點半, 咁七點機, 五點半到機場都唔係好過份0者。但係入到機場, 望極個水牌都望唔到我地班機, 只係看到六點幾那班機。咁算啦, 去六點機長榮的COUNTER到睇啦, 諗住佢一個COUNTER0者。點知行行下, 聽到迪迪大叫話班機取消左喎, 下唔係呀, 我又剛埋到COUNTER, 個職員叫我去團體票那邊, 行到埋去, 大大隻字寫住我班機CANCEL左呀, 問那個職員咁點, 佢話我快D俾PASSPORT佢, 立即幫我地轉去第二班機, 唔係遲D就要撘下一班港龍。佢攪咁果時, 又有一對情侶跑到, 又係同我地一樣買團體票的, 佢地又係要轉機, 不約而同, 大家係到講, 如果佢轉我地去撘中華航空, 我地唔撘架, 當見我地唔到啦, 我地遲D再黎辦手續撘港龍。
結果咁係轉左我地去六點十分班機啦, 拎到BOARDING PASS都五點四十分啦, 去寄埋行李, 個手提行李我的6.9KG, 迪迪的6.8KG, 剛剛合乎規定7KG內呀。寄埋行李, 拿拿聲跑去過關, 再跑去入閘啦, 上到機六點, 但點知, 我個位同人地DOUBLE左呀, 問空姐, 空姐又話我那張BOARDING PASS係去程的, 唔係呀, 望清楚原來唔係我的, 係另外那個同我一樣位的人的, 咁跟住發覺真係DOUBLE左架, 另外有個男人同我一樣, 但佢已經坐左去同埋D朋友一齊, 而我那個位其實係同哥哥佢地分左的, 好奇怪。唔理啦, 我結果坐番去哥哥佢地到, 即係中間那四個, 坐低後, 又聽到後邊鬧交啦, 又係位的問題, 那個空姐仲要黑面添。後尾都係我地香港人自己攪掂, 是但坐左, 等架車飛左先算。六點十分準時起飛, 起飛後, 仍然覺得很氣憤, 基本上應該係我原先那班加班機, 收唔夠人, 結果將班機取消左, 調哂我地去這班機, 成三十幾人架, 結果咪大混亂LOR, 個地勤都唔知點做野的。
飛定左啦, 派餐啦, 又發現我那邊全部人的電視都睇唔到, 好灰, 問空姐, 佢話架機BOOT咁, 以為只係我那個有問題啦, 但後來發覺唔係喎, 我呢邊全部人喎。我問佢第二次, 佢話架機再BOOT咁, 我話唔係我一個喎, 你望下係呢邊全部人喎。結果當然係乜都無得睇啦, 問過佢點解無電視看的乘客全部都送番一副啤牌俾我地。但我呢, 咁係唔止咁簡單啦, 我問佢拎意見書, 佢好似如臨大敵咁, 拎張表俾我, 問我有乜要反映, 我一五一十用盡哂我所有國語同那個黑面空姐講, 佢答我, 其實台灣機飛得好密, 好多時都有呢個情況, 解釋完後, 最後係問, 咁小姐你仲需唔需要這張FORM呢, 我話我需要喎。
拎左張FORM, 我無即刻填到, 返屋企先慢慢填。講番那個飛機餐, 超難食, 今次係用薑味黎蓋哂所有味道。好在我一上機食左個日月燒0者, 好好食呀, 紅豆架麻薯味。臨落機前, 那個空姐又再出現, 問我需唔需要KEEP 番張BOARDING PASS, 我咁係話要啦, 俾左你我咪死無對証, 我搵唔到另外那個男人咋, 唔係拎埋佢0個張影相存証, 結果, 佢拎住張名單, 問我坐咁的那個位係咪我的名字, 我話唔係, 跟住佢抄番我BOARDING PASS上的資料, 俾番我, 我就落機啦。其實架機的空姐服務都唔係咁好, 咁混亂, 個阿姐都唔出現, 空姐又唔理, 只係乘客四四六六拆掂佢。
落機差唔多八點, 拎埋行李, 八點幾去撘車, 撘船, 返屋企拎車再入元朗食壽司, 無計啦, 個餐基本上我無食, 真係好肚餓0麻。
後記
台灣曾經給我印象唔係咁好, 所以七年幾都無一次返轉頭, 但今次再去, 印象不同了, 其實台灣人很有文化的, 書店, 咖啡店成行成市, 佢地成日坐響咖啡店看書的。同埋街道非常清潔, 基本上無乜垃圾, 雖然周圍都無乜垃圾筒, 真係好鬼難搵的, 但都乾淨, 實在難得, 香港通街都垃圾筒, 但條街污糟到死。除左看書外, 佢地真係好有功德人的, 撘咁多日捷運, 捷運有兩個位叫做博愛座的, 即係讓俾老人家, 殘疾人士或者帶住小朋友的人坐的, 我地發覺, 呢兩個位真係無人坐的, 就算架車企左好多人, 佢地都唔會去坐呢兩個位的, 而我地呢d香港人, 咪死去坐lor。同埋在車上, 沒有人大聲講電話的, 你聽到大聲的人, 一定係講咁廣東話的香港人, 真係失禮哂。還有在車上沒有人打nds的, 多數的人唔係訓覺就係看書。而且真的沒有人食野的, 我地坐車上食左粒糖, 落車有個姨姨問我地係咪香港來的, 我地話係呀, 佢提醒我地在車箱唔可以食野架, 要罰錢的, 嘩, 我地平時在車, 真係杯麵都出埋啦, 唔怪得之人地d車箱真係超乾淨啦。而佢地的街道牌, 政府整的好好的, 每間舖中間都會有牌寫好幾多號, 統一的, 唔會見唔到, 搵地方很方便。
去左四日旅程, 見到人地國家雖然唔係一個經濟唔係咁繁榮的城市, 但人地有的是文化, 香港人, 唉, 真係失禮哂。下次有機會再遊台灣, 我真係想到阿里山, 雖然在飛機的宣傳片中看到的蒸氣火車沒有了, 但裏的風景確實美麗。朋友們, 想想吧, 剩係去食野, 倒亂, 都ok好玩架。
但後來我發現買唔夠手信lor, 連鳯梨酥都無買番屋企, 公司又買唔夠, 真失策, 結果咪在肥仔到偷d俾媽媽食啦, 哈哈。
沒有留言:
發佈留言