十點起程, 因為約左堂大佬十一點在深圳飲茶, 佢剛好在深圳做野, 咁咪約佢飲茶, 跟住佢就返響下拜山啦。我地行左去畔溪飲, 就佢在那頭撘車走。畔溪d野幾好食, 但成張點心紙都只係得一個小點, 哈哈, 好在頂點都只係15蚊0者。我地食左好多野呀, 當然有蒸排骨啦, 一碟唔夠喉, 仲要叫多碟, 返大陸唔食排骨, 唔安樂的。六條友, 食到成枱野都只係三百幾蚊咋。
送左堂大佬走後, 我地就去左萬象城行啦, 出邊勁大雨呀, 咪呢係商場行LOR, 睇下大陸的貴價商場, D野真係幾貴, 哈哈。行到差唔多四點, 又撘番地鐵去世界之窗轉巴左落蛇口啦, 原來在世界之窗撘巴士非常方便, 巴士站牌非常清楚, 好易睇。
去到蛇口, 又係落咁雨, 先去左花園城中心, 飲左杯野, 去左一間類似許留山的物體到飲野, 我好肚餓, 食左件芒果千層餅, 但佢地D芒果係同香港唔同味的, 但好大件, 真係好鬼多層。再食左個似B仔涼粉的物體, 唔記得叫乜名啦, 但係唔係涼粉底, 係啫喱底。唔知係咪食滿幾多錢呢, 佢送左件熊仔公仔俾我呀。
食飽飯醉, 又未到晚飯時, 行左陣花園城中心, 再戰B&Q, 去玩左陣"隨意門", 買左個花酒頭, 再行埋沃爾瑪, 就去食飯啦, 返去花園城中心頂層的勝記到食。因為出邊勁落雨, 所以近近地就算, 唔落雨或者會行出去的。但都幾好食喎, 環境招呼都唔錯, 係拎位時同個姐姐玩左一輪LOR。
知客姐姐 : 小姐, 會唔會坐房間呀, 我們的房間沒有最低消費的, 沒有XXXXX的, 立刻有位 (國語）
(我重覆左俾我D屋企人聽, 佢講乜啦, 咁我地係到諗咁的時候..)
我 : 坐房間, 沒有最低消費, 還有什麼? (國語)
知客姐姐 : 坐房, 喎地無最低消費的, 食野同出邊一樣的, 同埋即刻有位 (半咸淡廣東話)
我 : 哦, 即係坐房, 無最低消費, 仲有無D咩話 (純正廣東話)
知客姐姐 : 無最低消費, 同埋無特價小菜 (半咸淡廣東話)
我 : 哦, 無特價小菜呀, 咁我等出邊要等幾耐呢?
知客姐姐 : 五分鐘...
我 : 哦, 五分鐘咋, 咁我坐出邊啦..
知客姐姐 : 咁你去對面拎位啦
我 : 好呀 (立即行過對面)
＿＿＿＿＿＿＿＿＿＿＿＿＿＿＿＿＿＿
我 : 唔該五位呀
對面的知客姐姐 : (俾左張飛我), 38號枱呀
我 : 有位啦???
對面的知客姐姐 : 有啦, 你直行就得啦
頂, 攪咁耐, 跟本都唔使等位, 係那個姐姐想我地坐房咋0麻, 十幾廿人就話0者, 五條友坐乜鬼房呀, 後尾發覺, 在房D小菜係貴10至20蚊咋每碟, D大陸人, 見到香港人就會叫佢地坐房架啦, 我就係聽唔到佢講仲有D乜無, 所以先同佢拉剧左咁耐咋0麻, 精明消費者, 哈哈。
結果, 我地五個人, 叫左九個餸, 肥肥形容為食極都唔飽的餸, 我飽呀, 係佢唔飽咋0麻, 埋單四百二, 都OK啦, 都幾好食, 算係咁啦。 後來仲俾我地發現左, 原來花園城中心, 係有SHUTTLE BUS來往深圳後口岸的, 拿拿林埋單, 去追尾班車返香港啦。
全日使費, 都只係使左千一蚊到, 下個月再戰。
@就係呢隻熊仔係送架啦~~
@間似許留山的舖頭, 應該叫做水果撈的, 我唔明點解會用"咬我" LOR
@冰鎮芥蘭
沒有留言:
發佈留言