設靈

今日係婆婆設靈的日子, 早上舅父先去接婆婆出院, 之後我地就去左季季紅飲茶了。發覺左呢到平日飲茶超平呀, 叫左好多野, 八條友都係三百蚊到咋。

之後就出去紅磡了, 先去正善坐陣, 因為要等個場攪掂先過去, 係正善無乜好做的, 就係到玩貓, 貓貓真係好得意呀~~

到左三點幾, 可以過去了, 今次的房間選左沒有設置售賣東西的檔口, 門口會多左位置放椅子。等到堂倌到了, 著好衫, 就入去見下婆婆先, 她像縐起眉頭睡著似的, 並不是不安詳, 只是沒有公公那樣自然吧了。之後就開始摺金銀, 我地個個坐哂響靈堂出邊, 俾個堂倌叫番我地入去坐, 守下靈, 無法啦, 出邊涼d0麻, 今次的堂倌無咁好玩的。

到左四點零鐘, 就做了一場法事, 之後又各就各位埋位繼續摺金銀, 五點零鐘, 開始有親戚到了, 不停地謝禮, 有時就去燒野俾婆婆。六點零鐘, 齋菜到, 都唔錯呀, 係個飯唔好食0者。基本上我, 係不斷咁行行企企的, 因為裏邊好煙, 又焗, 攪到我喪咳, 所以通常都係門口的坐位同埋counter逗留, 到後期, 再做一次法事後, 再看看外邊, 嘩, 好多人呀, 包括埋肥仔剛剛黎到。之後, 就教肥仔坐埋響counter摺下野, 收下帛金, 同埋幫手入去燒野咁啦, 因為當我們要出去做法事時, ling ling要守住counter, 肥仔要幫手燒野0麻。

後期, 超勁多人, 再場坐滿, 我想坐都搵唔到位坐, 結果基本上企左成晚, 企係counter附近摺下野咁啦。但後尾摺摺下, 突然間見到隔離房熄左燈, 同埋又聽到d瓦片聲, 即係閃左過去同隔離房門口分隔的柱邊到, 企定定等睇"破地獄", 我未睇過架, 而婆婆打文齋, 無的, 所以走左過去睇, 個個都好奇怪我做乜企左係個咁的住置, 好攪笑, ling媽話有排嘈啦, 而我就繼續企定定咁睇, 之後泉舅父, 一路食野一路走埋黎, 望下我呢個傻妹做乜, 哈哈, 其實那個位都係睇到一半架咋, 好過無啦, 但係睇左少少後, 就落左街燒野俾婆婆啦, 一路燒, 一路叫婆婆收野, 沒有上次公公的悲傷, 佢地同個堂倌研究下人地個爐, 點解一路燒一路有兩條水喉洒水, 燒錢俾婆婆時, 我又同個堂倌研究下d金價。

返上樓後, 剛好還看到最精彩那一幕, 我問ling ling其實件衫係咪特制的, 唔會燒著, 佢話唔係架, 會燒著架, 只係唔會逢一聲狂燒, 而係著左個尾一路燒, 我又問有冇試過呀, 佢話有架, 噢, 俾我睇到又會勁笑了。之後入左去燒野俾婆婆, 今次很多人幫手摺野, 所以勁多野燒, 係源源不絕的, 所以好豪咁係咁掟入去, 熊熊烈火, 燒左一陣, 頂唔順, 紅哂返出黎, 超熱, 個堂倌仲話我, 你無油再蒸啦喎, 你仲走入去, 真係要出黎透透氣。人群逐漸散去, 終於有位坐啦, 坐左一陣去數錢找數, 我今次沒有數錯錢了。

後來親戚陸續散去, 我地再食埋d齋, 十點零鐘就換衫走啦。整個過程沒有公公那次的傷感場面, 或者大家都知道婆婆病左好耐了, 所以都沒有甚麼。