公公婆婆住在一起了

一早起來, 九時許需要到達紅磡帶婆婆去玄圓學院啦。迪迪舅父先到玄圓學院, 而我們就到荃灣買祭品, 每次買祭品, 見到d煎堆, 牛脷酥, 好鬼開心, 因為實會買黎俾自己食。

上到玄圓學院後, 一個字"等", 因為今日好日, 而呢兩個鐘又係最好時辰, 所超勁多人做同一件事, 要等人黎拆碑, 然後將公公婆婆放番埋一起, 再封碑, 呢個過程都等左成個鐘, 之後又等師傳黎開光, 又等多半個鐘, 好在最後都在十一時攪掂件事, 公公婆婆終於住番埋一齊啦。 等候期間, 同媽媽去裝下d位, 因為過幾間, 有d位未賣的, 但係好鬼高, 要用梯先裝到柱香, 一係就好低, 在最底, 如果中間或者中間偏下的, 賣哂啦, 又好鬼貴, 要成十幾萬一格架, 計番, 如果好似樓咁計, 每平方呎, 真係天文數字呀。如果再有新位的話, 真係要搵阿ling媽諗諗啦, 早d買定, 等老豆, 老媽子百年歸老有得用, 呢d位真係難求, 同埋只會越來越貴, 唔會好似樓市咁跌價的, 如果可以後生d買, 真係為自己買番個長生位, 保值呀。

做哂儀式後, 咁係食野啦, 食左d祭品佢, 其餘的就留番今晚食, 之後就入番屯門飲茶啦。飲完茶, 媽佢地去買餸, 我就返屋企hea左陣再出番去學車, 再入返舅父到食飯, 全屋人一齊睇獎門人真係好開心的。

食飽飯, 我一路係到睇電視, 佢地就埋單計數啦, 之後再拎埋婆婆公公d家當出黎分, 雖然唔多, 同埋唔值錢, 當留作記念吧。在家當中, 搵到d三十年前的金舖單據, 嘩, 好似博物館睇0個d咁, 一粒字都睇唔到佢寫乜。而我, 佢地俾左條佢地都唔知婆婆幾時買的金鏈, 佢地話呢個係你的嫁妝架啦, 唔好再問我地拎了, 嗚~~哈哈。條鏈好幼架咋, 但係有三個吊咀喎, 一條印有lucky的鎖匙, 一個葫蘆, 一個印有幸福, 而後邊有一隻馬的牌牌。見到鎖匙後, 我即刻問, 係咪有個寶箱架, d戲係咁架喎, 無啦啦有條鎖匙, 跟住去d保齡球場開locker架喎, 跟住我迪迪話, 咁個牌係地圖黎啦, 個葫蘆係線索, 叫我慢慢去搵啦, 哈哈, 呢個gap好爛, 呢家人好無聊。