晨早六點起來, 見到天朗氣清, 心情當堂醒哂。八點要出到太子, 跟師傅再行番轉。到試場, 師傅見到d官, 佢話你地好彩啦, 幾個都係好的考官, 仲有d係我d fd添, 所以你地如果無乜大錯, 唔記得打燈呀, 都唔會有事。我八點九, 我的同學仔先考, 佢考完到我。我在試場後方, 見到所有車每三架泊在一起, 那個感覺真的很像賽車一樣, 我還跟師傅說笑, 只差一個美女在中間fing旗便更像了, 一路心情都沒有緊張的感覺, 只在差不多九時, 雲開始厚, 我還問師傅, 我諗我應該唔使學開水潑架呵, 佢話唔使, 唔會落雨0既。
見同學仔回試場, 我就去報到了, 師傅將車剛泊好, 教官便出來了, 我拿拿林上車, 連心情都未調教好, 就開車了, 我小心翼翼咁駛到預期方格的旁邊, 沒有泊得好開, 我覺得好靚的, 預備泊位了, 一切順利, 係有少少緊張, 本來泊得好靚的, 但衰貪心, 踩多左腳, 上左膊一下, 哎, 咁就衰左啦, 個心即時一沉, 沒有心機再考落去了, 仲以為個官會落車唔使再考添, 但突然想起, 路試分開架喎, 所以先無踩行油片落去, 我時常記鏡的位置, 我都記得望鏡, 出去的位置, 像平時一樣, 泊滿死車, 好在無盲毛行出黎。
轉完灣, 去到小巴站附近, 見到有一架抓泥車圍起泊在兩線的中間, 那一刻真的不知如何是好, 落緊斜架0麻, 又在班馬線前, 我夠竟應該由左還是右過佢呢? 那個工人指示我由右邊過, 都好, 前邊右邊就是沒有整路的路段了。用一個S字型過左後, 在班馬線停車後再前進, 在讓路口, 等左好耐, 因為好鬼多車, 見架小巴上緊客, 我都唔開, 我決定等埋佢上埋客先出車, 死都等到無車先出。轉番出去, 個官叫我直去, 即係平時我行的路段, 很好行的. 行大圈, 沒有那麼多的死車, 沒有那麼多盲毛的, 一路都仍然順利, 但開始有雨水, 同埋個心仍然好灰。
到轉返入市場, 都相安無事, 死車仍然成排咁泊係到, 個心時常想著, 唔好咁近右邊的車, 心中又想著師傅的說話, 要騎線行, 但就係諗住呢D野, 騎線騎多了, 當我發現時, 我的手已經想轉番右邊少少的了, 但就俾個官快過我踩停了我, 仲話我沒有留意左邊的道路情況。心情即係灰到爆, 即係肥哂啦, 即時想落車唔考啦, 或者如果有一斜, 立即踩油片落去, 硬著頭皮駛回去, 斜路停車, 從未試過停得咁真架車, 再硬著頭皮做埋窄路調頭, 再回方格中停泊, 仲停得好靚, 但停咁靚做乜呀, 都肥了。
返去等叫名拎成績, 多TICK到爆, 不過佢要肥你, 實要TICK多幾TICK架啦, 拎俾師傅睇, 佢仲話, 我見你泊得好靚架, 仲以為你OK添, 我仲拎番轉頭同人地傾計啦, 點知你多腳, 踩多野。我話, 無計啦, 唔合格點0者。跟住就跟師傅車返太子, 我同師傅講, 前邊整路呀, 當我地行到去那個位, 架抓泥車竟然唔見左呀, 頭先明明圍住架, 成架無左呀, 頂, 個同學仔都話佢頭先無。個天又開始落雨, 唔通真係連個天都唔鐘意我。
其實我真係好唔開心的, 因為我真係幾有信心的, 因為最後的練習時, 一路兜都無乜大錯, 又無俾師傅話, 非常之順利的, 只擔心落雨問題, 而前一晚, 泊一個比起試場更斜的位置, 我都泊到, 其實在試場泊位, 我只試過一次咁大把, 其餘都只在相似路段練習。但點知, 最後所有事情都非我所願, 太小心反而令到自己肥佬, 我真係超唔開心, 個心un住un住咁, 師傅幫我再排期, 唔知又排到邊同幾時呢??
沒有留言:
發佈留言