檢查

今日無返工, 請左假去抽血同埋照心電圖, 咁大個女第一次抽血, 一個連血都未捐過的我, 好怕打針。入到房, 即問姨姨痛唔痛架, 佢話少少啦, 你望0個邊, 唔好望我啦, 抽高衫袖望下先啦, 佢拍左兩野就話, 你d血管好易搵0者。一野拮入去, 少少痛, 之後佢拮住抽血的時候好怪, 總係覺得支針係條條fing的。到照心電圖時, 好似俾隻八爪魚夾住哂d脈搏位, 係夾住, 而唔係好似電視咁貼塊野的, 好古怪。

之後入番屯門飲茶, 之後就去左睇「梁球琚中學二十五週年校慶」, 哥哥同迪迪這些校友中樂團團圓有份表演。一開場當然是各種沉悶的儀式, 跟住先開始睇表演。雖然唔係在這間學校就讀, 但令我諗番起想當年讀中學時所參加的朗誦比賽, 及每年的班際歌唱比賽。諗番起都幾攪笑, 因為年年都係在聖誕節前比賽的, 所以總有幾天要晨早返學校, 天未光要出門口, 趕在上課前練歌, 又或是放學五點半天黑先走得, 那時總覺得呢d日子係勁灰的, 攪咁多野為乜呀。但家下諗番, 想當年應該參加多d呢d活動, 會留番好多回憶的。只怪當年的我, 並不熱衷任何課外活動, 悶人一個。

另外, 又拎我想番起我在伊中做野的日子, 這時日子, 同事們必定非常忙碌, 而我, 由於並非做那種工作, 所以並不繁忙, 但個心又好想去睇學生表演, 因為家下學生的表演真係好攪笑的, 好多你想不到的東西, 他們也會想到。

睇完表演, 夜晚去左泰味村食泰菜, 那間野在新墟近景峰的村屋那樹, 六條友, 食左好多野, 總覺得食泰菜唔應該在高級菜館食的, 還是大排檔好。