一個"金都"的婚禮

今晚做左乖乖女陪左阿媽去飲, 係阿媽想當年結婚時的伴娘嫁女, 阿姨佢由細睇到我地大, 家下嫁的人又係哥哥的小學同學仔, 所以一行三人無聊聊咁去飲。其實預左悶架啦, 但都唔使悶成咁架, 成枱人, 都係佢友愛邨的麻雀腳, 四個女人嘈到, 唔明點解唔可以坐埋一齊, 係都要打對面坐。好在我地醒, 七點幾八點入席先到, 影過相, 恭賀完一番, 就坐。

點解係一個"金都"的婚禮, 只不過係一個形容詞0者, 全晚無野睇, 咪睇d衫lor, 新娘+新郎+外母+伴郎+伴郎的服裝, 一看便知出自金都或是其他元朗舖頭的貨色。我好慶幸上次做伴娘時那套衫唔係好睇得出由金都到借出來的。全晚基本上係女家話事的, 大部份都係女家的人, 都係一句好嘈。

酒席開始, 例菜有一段片, 那段片, 一式一樣, 到到睇都係差唔多, 只係主角不同, 主人家用左陶喆+蔡依林的"今天你要嫁給我"作為背景音樂, 唯一得的地方。

進場, 例菜又係花炮鳴響, 咁窄的場地, 三十幾圍, 點解仲要拖尾呢, 邊個睇到。家下興註冊儀式在酒席到做埋, 我其實好反對咁做, 完全無哂那種感覺, 無feel, 叫枱下d人靜d, d師奶仲係不停咁講野, 頂, 無哂莊嚴的感覺。個律師又求其, 好似是但講d野簽個名, 咁就袋幾千蚊走人。

註冊完, 咁係做埋d其他儀式啦, 跟住就上菜啦。我同哥哥討論咁, 夠竟酒席會唔會加價呢, 呢期無豬喎, 咁如果唔用豬, 可以用d咩黎代替呢? 而隻豬點解要閃燈呢, 但我好鐘意隻閃燈豬喎, 夠竟點解要閃燈呢?

美心大酒樓最大特色係彭彭聲上菜, 半個鐘頭四道菜, 務求令你食到嘔。菜一路係咁上, 我只好不停咁食, 野食味道一般啦, 一概美心集團的味道lor。

去到翅, 咁係開始敬酒啦, 我同哥哥係到計, 三十二圍, 每圍一分鐘, 咪成半個鐘!?!? 哥哥話應該三十秒一圍到啦, 都十五分鐘啦, 頂。敬酒無野食架0麻, 乜差都會停哂, 咁我做乜好喎。

敬完酒, 佢無啦啦調暗燈光, 我幾驚佢玩遊戲呀, 玩親實好耐的, 好在係落幕播接新娘的片段。其實個片頭同呢d片, 用movie maker做到架啦, 如果有時間可以自己慢慢整。

睇完片, 無啦啦新郎唱歌俾新娘聽, 唱左城城的"愛的呼喚", 本來唱歌ok無問題, 但個新郎只係對住個mon自己係到唱卡拉ok咁囉, 嘉賓完全唔投入, 佢有佢唱, 仲要甩哂key那隻, 我地有我地食, 新娘, 我都係在佢唱完先搵得番的, 有幾冧呀, 佢只不過對住個mon唱咋喎。

全晚無女無仔昅, 唯一有兩條友可以吸引到我視線的, 一個係著住鮮粉紅色low cut, 短裙 (到大脾中間位置) 的肥師奶, 我真係無野可以形容到佢, 我只可說一句, 師奶你好勇敢。另外一位係人兄來的, 佢竟然著住件花恤衫, 糖心風暴常在德那種呀, 不過佢淺色d, 都係咁花咁啦。我想佢係兄弟團的其中一人, 佢個樣仲要有少少常在德的後生版咁, 細十年到, 無肚腩那種啦, 但都人到中年架啦, 又係那種扣少粒紐, 露露地, 見到佢, 不過將視線離開佢, 佢真係好爆。

飲完, 閃人, 一場大龍鳯, 金錢交易的宴會就結束左。我想將來可以的話, 我絕不做呢場大龍鳳, 人又多, 難服侍, 順得哥情失嫂意, 無謂啦, 我兩家人都唔係d咩交際能手, 呢d場合點玩。我開始潛移默化咁關太, 外遊結婚的好處。

席間還不斷咁同哥哥吹水, 哥哥話最好都係那次在朗豪酒店, 野又好食, 場又好, 我話還樹都九千蚊圍, 不如洲際啦, 你得0既, 豪起佢把啦, 佢話咁不如Excelsior啦, 都係九千蚊圍, 我話不如Grand Hyatt啦, 等你個妹買套靚衫去威下好喎, 好啦咁你Grand Hyatt, 我去關島啦, 講到興高彩烈的時候, 阿媽撘舢話, 佢連女朋友都無喎, 你講到好似真咁, 噢, 即刻掃哂興, 咦.......媽媽呀, 發下夢都得掛。