是晚夜機先去關島, 本來諗住拖唊返工的, 但係拖唊又著唔到便服, 唔掂喎, 又本來諗過返半日的, 但半日後需要舟居勞動咁返歸, 唔多想, 又加上已預計到, 這天返工, 沒有好結果的, 因為公司會在假期會換電話系統, 我老細實發顛, 行黎行去, 所以決定唔返工。
我好乖咁, 十點幾就起身啦, 因為怕在飛機到訓唔著。起身後攪呢攪路就開始執房啦, 執左個幾鐘, 都差唔多成點, 落街買野食, 食完之後就開始執行李啦, 唔知點解執下執下都執成個鐘, 我連鴨仔都放埋落去, 都未滿, 但個唊好重。
執完野, 都係三點幾, 悶悶地, 就開始釣魚啦, 釣左個零鐘, 同阿媽落街買野, 買完野, 就沖涼等去機場。肥仔成五點先走得, 佢屋企無水, 要拿拿林拎哂D野去我到沖。老豆媽子開飯, 我又肚餓喎, 係咁食食食, 佢一路開, 一路食, 食到佢地埋位我先停手, 無計啦媽媽煮我最鐘意食的雞雞喎。
六點半, 出發去機場, 撘船去碼頭再轉船, 每次撘呢隻船都好開心的, 因為代表旅程的開始。七點零就到機場啦, 約左佢地八點, 未到, 我同肥仔就周圍行, 周圍睇野。
八點鬆D, 主角到啦, 十四人的旅行團, 就開始check-in, 第一次同人地屋企人見面, 古古怪怪咁, 但係我呢d乜人都傾得一餐的人, 絕對無難度。Check-in完分頭搵食, 我地去左食Burger King, 唔知係咪食得麥記多呢, 我都係鐘意食麥當當多d。
九點八, 可以上機啦, 旅程開始啦, 我未試過撘夜機飛出香港的, 十點半準時起飛, 架機好窄, 坐得唔太舒服, 無計, 無得揀, 得一條airline去關島, 香港的夜景真係好靚, 很吸引。
上到機無野好做, 因為無獨立電視, 佢今次係播Johnny Deep海盜第二集, 咩都無得揀, 而佢又會熄哂燈, 唯一可以做的就係訓。開頭無訓架, 好在有帶MP3, 聽住歌等食, 一個鐘頭到宵夜就到啦, 係生果同埋火腿芝士麵飽, 個飽唔好食, 我只係食左火腿同埋生果就無lu。
之後訓著左啦, 但訓左一個鐘頭到, 就俾肥仔批爭, 成個人彈起, 醒左, 頂, 人地仲訓得好冧架, 俾佢整醒左, 訓左好耐先訓得番, 無幾耐就落機啦, 第一日行程就咁過左lu。
30/06/2007 (Saturday) - Day 2 關島機場 → LOCAL TOUR→ PIC RESORT
關島時間比香港時間快兩個小時, 經過四個多小時的航程, 到達關島已經是早上大約五時, 我們在機上看著月亮掛在空中與我們一起航行。外國的月亮真係特別圓, 特別大。關島機場, 比我想像中大, 因為一個荒島何需那麼大個機場呢。過關時, 需要再一次掃指模及拍照, 唔知係因為香港人太快, 還是關島的人悠遊, 我們共用了成個鐘過關, 過完關, 太陽伯伯已經出來了。而行李還需要再過一種關口, 交表後簽核後才算完成。
出到去後, 有當地旅行社員工接載我們關始三個小時的當地遊。坐上車上, 見到日光初照, 藍天與白雲, 不禁呼叫起來, 個天好靚呀。我們乘坐一架好美國感覺的巴士, 其實有點兒爛銅爛鐵FEEL, 而我們的導遊是一位年紀比較大的男士, 我想他大概有六十歲吧。經過十數分鐘的車程, 我們就來到第一個景點了, 唔知乜差石頭, 歷史對我來說確實有點兒難道, 總知看過便算, 不會再細心去聽去理解。我反而很喜歡馬路, 寬敞的馬路, 無乜車, 行車又慢, 感受到佢地的悠遊自在。每到一個國家, 我都喜歡去影馬路, 同埋走去馬路中間影相, 唔知點解, 呢個習慣確實變態。
由石頭之後去到一間朱古力屋加埋咩西班牙之類的古舊建築物, 那個什麼西班牙建築物, 咪又係用瓦片做屋頂, 如我們中國的建築有任分別呢, 只不過過是大家都經過不同年代戰火的洗禮吧了。那間朱古力屋, 直頭無聽到佢講乜, 我還在享受咁陽光的猛烈照射, 我就往教堂的方向去了。這間教堂周邊, 有一個草原, 有椰樹, 另有其他的大棵樹, 再加上日光初照, 仲有好多蚊, 但那個草原, 那些樹, 那張石椅, 令我聯想起阿甘。白色的教堂, 在陽光照耀下份外明亮, 真係好靚。
跟住去左一個好多大炮的地方, 我真係唔知係邊到黎的, 只係知道自到大部份關島的地方, 但超勁多蚊, 臨走無野好玩, 連自己個影都玩埋, 無聊。之後去左看自由神像, 關島屬美國的屬土 (明明屬土, 點解由LA過去會仲貴過返香港的), 當然會有自由神像啦, 細細個好攪笑, 拍照留念後, 就四處走動, 各人的目光都不放在自由神像身上, 反而是外邊的海灘, 有一家人在垂釣, 晨早留留八點幾在海邊釣魚, 真係爽。
再之後就去左個叫做情人崖的地方, 要俾錢先可以上去一看, 不值, 就在下邊看看海, 拍過照, 但這裏後多"金鳯", 係咁向我們衝過來, 撞埋黎仲好痛添, 而有一隻更差點兒飛入全全的衫內, 好可怕, 後來各人立即左閃右避咁極速走人。經過兩個多三個小時的半天精華遊後, 再嘗試返酒店check-in, 但辦不到, 決定放下行李, 再帶我們出去食早餐。第一個美式早餐, 就在一間叫做King's的餐廳進食, 間餐廳的架局很美國, 以往看OC時, d餐廳都係咁的, 但差左出邊個海景0者。薯餅雙蛋加蜜糖腸, 都不錯呀, 除左個薯餅。
食過早餐後, 又再返酒店試check-in, 但仍是辦不到, 只可以辦到check-in一間房作為我地的基地。上到房, 不奇然大叫, 嘩, 個view好得呀, 一望無際的海, 藍天白雲, 正。本來決定落水玩的, 後來又改變主意在酒店視察環境先, 立即換過鞋, 帶上太陽眼鏡, 就去同陽光玩遊戲啦。行經泳池, 真的很想跳落去, 但奈何未有房間, 又休息不足, 還是忍一忍吧。再到沙灘一遊, 嘩, 浮潛, 好想玩呀。結果四條茂利, 三條佬走左去打籃球, 而我咁係坐埋一邊影相, 喝杯冰水抖抖啦。跟住佢地轉打網球, 而我肥仔就轉打羽毛球, 好耐無打啦, 球技還未算生疏。
玩夠後, 大約十一時半, 再回大堂集合, 試試再check-in, 都係未得, unique一家決定外出duty-fee吃中午飯及行下, 而阿志同全全決定留守等候他的家人, 而肥仔基於共同進退的原則下, 也決定留守, 咁我可以點呢, 咪留守lor, 其實有點兒不滿的, 其實我想出去玩呀。結果, 四條茂利就咁坐左響大堂到等, 而我仲訓著左添。後尾又如何呢, 佢兩個決定唔走, 我兩個走lor, 但出到佢, unique竟然還沒有等到車, 結果八條友, 坐左的士出去, 唔使錢的, 去duty fee就得架啦。
出到去未諗到食乜, 在JP行左陣, 過左陣冷河, 基本上關島可以買的手信, 呢到都搵到, 但d野食有點兒貴, 唔值得買番去俾d同事食。跟住我地去左縢一番到食拉麵, 其實呢間香港都有的, 那個炒飯很好食的, 但呢到無, 只係有麵, 但係都好好食, 仲好大碗添, 價錢同香港差唔多。食飽後, 就再返去duty fee撘車返去, 睇下可唔可以check-in啦。
返到去, 終於拎到房啦, 返去搬行李回房, 跟住執下野梳洗下, unique再黎問下點分配房間, 撞到全全, 阿志同佢細佬去完玩滑梯返黎, 而我地決定等佢地去完briefying返黎先去玩, 而我地就小睡片刻。我基本上沒有睡, 辦理完各項事務, 沖過涼, 肥仔已經訓了, 我沒有睡意, 坐在露台望住個海, 好舒服, 但最後都係眼訓, 呢番去皮籠小睡了十分鐘。較左鬧鐘五點起身, 確實有野響過, 但係我地發覺可能係個電話, 而唔係個鬧鐘, 哈哈, 算吧啦, 一場誤會下, 五點幾先可以出到去玩, 都係得四條友, 因為全全響極電話都唔醒, 無人聽, 算, 放棄佢。
咁大個女第一次著三點式, 先在泳池浮左陣, 發覺d水開始涷, 再去海灘看看環境, 本想借用具浮潛, 但係夠鐘, 無得借, 明天請早。再返去泳池玩過, 佢地係咁係到玩滑梯, 阿志無論點上水都係帶住副超的, 佢地又擺出任何的post去扮型, 笑死我, 他與肥仔還像一個大細路咁不停走上走落去玩滑梯。我同unique按不住誘惑, 去試左條短梯, 但係我同佢都差d拋左上樹咁滯, 可能我地輕, 加上有張野的關係, 好拋, 離心力好勁, 好在後尾都無事, 好驚lor, 我諗我地好有儀態咁落黎掛。但見d小朋友好勇敢的, 細細粒著住救生衣就黎, 但係d大人, 一到水即刻的起佢lor。
玩樂過後, 就返房沖涼預備出去晚飯啦。是晚在一間叫做sam choy的餐廳食飯, 佢係在underwater內的, 所以有條鯨魚尾在餐廳內, 個頭, 咁係在餐廳外啦。是晚晚餐豐富, 但d人好慢lor, 同埋問乜都唔拎黎。而個waiter, 都幾靚仔架, 同埋勁nice, 佢係咁介紹d野食俾我地, 幫我地計分量, 但佢係咁講seafood pasta, 我同unique搵極都搵唔到邊樹有pasta, 後尾落完單, astley先話俾我地知係邊個, 那個字唔係pasta黎的, 而係一個我地無人識讀的字, 自此以往, 我地見到唔識讀的字, 就叫做pasta啦。d野食都ok好食呀, 日本啤酒又好飲, 而我地玩個龍蝦蚶都玩左好耐, 無聊到死, 但係一班人去旅行就係咁無聊架啦, 唔係邊好玩。
飯後我地決定散步返去酒店, 夜晚的關島, 又有另一份感覺, 很寧靜, 見到d人架著部開逢車, 聽住歌咁開駛, 好爽。而d司機又好好, 見你想過馬路, 係會就咁停車俾你過的, 香港, 唔踏油或者boo死你算奇蹟。返到酒店都成十點幾十一點啦, 梳洗過後, 預備好明天要用的東西, 就睡了, 因為明天約定了0700起身, 0900準時去游水。
01/07/2007 (Sunday) - Day 3 PIC RESORT → St. Maria Arena Chapel → PIC RESORT
七點半起來, 沒有再賴床, 因為看見外邊的藍天與白雲, 很想往外跑, 我要同陽光玩遊戲。八時, 準時CALL全全落去食早餐。其他人沒有我們那麼早, 或者我習慣想做便去做吧, 所以我會知醒的。我們住的酒店, 是可以足不出戶咁玩的。吃過早餐後, 就開始我們的活動了, 先去報名玩人魚共泳, 酒店將一個池改為像海中一樣的生態, 讓住客可以不出海也可以看到珊瑚魚。他們先出發, 各人都可以浮出去, 但我做不到, 係咁入水, D水又咸, 頂唔順放棄左, 但我都浮左幾下的, 看到一群魚魚。我後邊的日本女子也是做不到, 佢還比我快放棄。後來聽他們說, 去到中段很深的, 佢地都有點兒熬底。而我在這兒整損了腳, 洗過傷口後, 細佬JOIN埋我地就去玩獨木舟啦。
完來玩獨木舟好好玩架, 有人不斷跟我說, 不如在泳池那個練習下先啦, 但係我唔理佢, 同行友人更不會理會佢, 加上有救生衣, D水又淺, 怕什麼呀。點知, 原來有人在之前的活動還未驚完, 所以撐得很差, 不停俾我鬧佢唔郁, 我一個人係咁撐, 好倦。只怪我不夠細心, 基本上有得玩, 老豆姓乜都唔知, 我真的不知道你還在害怕的, 對不起。
玩完獨木舟, 就去玩浮潛啦, 因為聽過頭先教練的指導, 我很快上手, 還沒有入水呢, 很勁。魚魚勁靚, 尖咀的透明長魚魚不停咁在身邊游過, 加埋下邊的魚, 尤如置身在海洋公園海濤館當中。我地又教識uncle玩, 佢好開心呀, 因為佢同我一樣唔識游水架, 但係玩浮潛, 會令到自己好似識游水咁的。水一路咁退, 去到浮波都只是心口的水, 不停咁圍住珊瑚轉, 追住D魚魚, 又玩埋海參, 新鮮的海參好滑好核突架。我地玩到大約十二點, 就回房間梳洗準備前往觀禮。
LUNCH, 因為太熱, 沒有行太遠的地方, 只在ABC SHOP買過食物, 返左全全房一起吃, 跟住玩左陣NDS, 又返房換衫準備出發啦。佢兩兄弟不約而同咁準備左裇衫扮型, 而我只係簡單化左個妝, 畫大左對眼就算。準時在大堂出發, 好緊張呀。
去到CHAPEL還未夠鐘, 見到佢地兩個在影相, 拍MOVIE, 任由擺佈, 我地就不停咁指指點點, 唔記得左講乜LU, 但各人很開心, 很期待。其間見到個黑超特警組咁0既人, 全新衣不稱身的黑西裝, 黑超, 無笑容, 企在第二棵椰樹下, 烈日當空下咁等候, 我們還猜著他是誰, 原來是接載他們的長橋車司機, 佢真係好攪笑的。
我們可以落車入去CHAPEL啦, 去左個休息室到等候, 我們各人互相幫助咁扣襟花, 再聽從工作人員的指示。終於可以入去CHAPEL啦, 好靚呀, 同個網頁一樣咁靚呀, 真係無呃人的, 證明佢D相無執過。分開男女家坐, 仲要分幾行, 扮到懶係多人咁, 開頭唔敢郁, 靜靜地等, 因為張野寫唔可以踏紅地毯的, 唔準影相的。後尾工作人員見我地呆呆的, 就話家下可以影相的, 個個即刻拎機出黎, 係咁影, 真係好靚, 背景個VIEW, 只可以用藍天白雲, 椰林樹影, 水清沙幻去形容。影到咁上下, ASTLEY就入黎啦, 見到佢, 覺得好好笑, 佢個樣好認真, 又好似好緊張喎, 但又要扮震定咁。
儀式即張開始, 收機, 神父到達, 見到佢同個肥女子走入黎, 唔知佢係乜水, 著到咁夏老威, 以為佢係路過添, 點知原來佢就係女高音呀, 失敬失敬。儀式開始, 保持安靜, 兩位媽媽點蠟燭, 個感覺好古怪, 而等候開門的一刻, 真係很緊張的。一開門, 阿嫂好靚呀, 嘩嘩嘩, 跟住個女高音唱歌, 好TOUCHING, 鼻子有點兒酸, 好在之前佢俾過D片我睇, 我有心理準備。進場, 有點兒失誤, 見到裙開始下滑, 很危, 見她不笑, 想提她, 但又唔望過黎, 激死。
整過儀式, 曾經有留心過神父講乜, 但聽聽下分神了, 因為後邊的沙灘有人玩咁水上電單車, 同埋降落傘, 好吸引, 嘻嘻。每次女高音一唱歌, 真係扣人心絃, 簡直係整個儀式的靈魂, 正到爆呀。儀式完畢, 望住佢地行出去影相, 神父, 女高音, 同埋琴師走過黎恭喜我地, 同埋傾計, 佢地好NICE呀, 個神父一同我扼手, 問我係咪妹, 我話唔係, 係FD, 佢話希望下次的會係我, 我頓時唔識反應, "O"左咀, 定神後, 答左句"I HOPE SO", 哈哈。
跟住我地呢班臨記就走出去等候拋花瓣啦, 第一次咁玩, 好好玩, 好靚, 好開心。跟住再去沙灘影相啦, 佢一開門, 我就第一個走左落去, 呢個沙灘仲靚過我地酒店那個架, 好正。不停地影相, 不停地玩, 原來今天有成三十八度咁熱, 唔怪得之啦。日本靚姐姐仲問我係咁好熱, 我個胭脂位紅哂, 哈哈, 成隊crew好nice架, 好日本, 好好禮貌, 其實佢地仲辛苦啦, 著住套suit, 又跪又剩去幫佢地。要撘車走啦, 佢地仲用好日本式的歡送, 揮手揮到我地架車走左為止。
返到酒店, 立即換衫落妝去玩啦, 本來諗住同全全三條友去玩, 點知無啦啦收到電話, 叫我地等埋佢兩個, 佢地都忍唔住要去玩埋一份啦。我地今次只在主池浮, 玩滑梯, 後尾去左個BB池搵龜龜玩遊戲, 佢班佬就係到玩數字球玩到不亦樂乎, 玩到人地要收池, 肥仔輸左, 要被射龜, 其實我有d想射埋一份, 因為我想打左佢好耐架啦, 哈哈哈。再轉場, 去到籃球池到, 俾班似菲律賓的細佬撩打波, 結果一場中外交流的籃球賽開始啦。人地屬水性, 一踏水己去到老遠, 同埋佢地都打茅波LOR, 我地班gentlement邊夠人打呀。我地在場邊做啦啦隊, 製造效果, 結果引來很多亞洲人觀看, 哈。而我地三個女子, 又俾一個聲稱軍人的美籍人士撩我地去玩, 我想他已經飲醉了, 我們不停咁遠拒佢的好意。大戰過後, 佢班友扮鬼佬同人地握手擁抱, 和氣收場, 又係時候梳洗準備食飯啦。等候食飯期間, 企係露台睇左陣樓下餐廳的SHOW, D人跳到個盤骨甩左咁滯。
今晚去食墨魚麵, 一間意大利餐廳, 間餐廳就叫做"pasta"啦, 因為讀極都唔記得點讀。等左一陣位, 那間餐廳俾左個飛碟的物體我地, 有位會叫的喎。而我們人太多, 要分枱坐, 無咁好氣氛, 但已開始同d細佬念熟, 開始玩啦。個個都食到個咀黑忟忟, 個導遊說d屎屎都會黑麻麻的, 記住唔好似為自己有病喎。
飯後, 一行十四人, 又浩浩蕩蕩殺去K-MART啦, 我們一行三人當然要做先頭部隊啦, 因為我發起的, 同埋唔係太肯定那間野的位置, 因為要行一段山邊的, 靜英英的, 好在關島治安好咋。而行咁的時候, 全全解釋左點解三仔同四仔的女角咁唔同, D女三仔靚D, 四仔係唔靚的。
終於都到啦, 俾我預其中細, 同埋無咁多野買, 但真係平過出邊LOR, 我地係咁搵手信買, 結果買左大PAD古古力分, 真係平好多架, 而我就買左D TEE俾舅父, 迪迪, 哥哥同老豆佢地。唔知點解, 我地可以連相架都玩一餐, 由那個花花相架, 到相架的價值, 都講左成半個鐘, 連anut同uncle都同埋我地玩埋一份, 人多就係咁, 一人一句, 大吉利是, 乜都玩餐死。
走啦, 慢步走回酒店, 夜晚的關島很舒服, 唔熱, 正。返去就要pack行李啦, 唔係明天掛住玩pack唔切。明天又係0700起身, 0900準時玩。
02/07/2007 (Monday) - Day 4 PIC RESORT → TGI FRIDAY → 關島機場
準時七點起身, 因為尋日玩浮潛唔夠喉, 個心掛住掛住咁, 一定要今日再玩過。阿志佢兩個無得玩, 因為佢地要去做正式的註冊。準時九點去借野玩, 全全又撞番佢剛認識的STAFF - JIMMY, 兩個互打招呼一輪後, 就跑向沙灘啦, 今早D水有D深同埋瀆, 無尋日咁清, 我地要就住就住咁浮, 唔敢浮得離地太遠的地方。JOIN埋UNIQUE的一家, 浮呀浮, 佢地一斷餵魚魚, 我地就不停在附近浮, 因為佢地引哂D魚埋黎。但水太瀆同深, 我地決定上水曬一陣太陽, 就係呢黃金十五分鐘, 我曬傷了。後來水開始退, 我地終於可以浮出去D珊瑚到睇啦, 我不停咁追住D魚魚, 後來仲見到似海曼的物體, 追到埋珊瑚礁, 唔見左無得玩LU。浮同十一點, 夠皮啦, 同埋要上房沖洗, 執行李預備走人。
上水後, 原來就先有個台灣婆婆浸親, 在岸上急救咁, 其實浮咁的時候已經知道有人有事, 本來以為小事, 但原來大件事, 個婆婆係嘔哂白泡咁被救起的。當我上岸時, 佢應該被"猜"左好耐架啦, 我玩夠上岸企左陣, 先有救護車到, 我望一望個婆婆, 其實個面都開始紫的了, 都唔明點解救護車咁耐都未到, 關島好細0者。
爆哂唊走, 我無諗過我會買到野的, 無帶多個旅行袋, 唯有返香港再解決D手信啦。等候其間, 又係露台到溜連左一陣, 跟左樓下跳左陣YMCA, 哈哈, 其實好恨落去跳呀。
但係我發覺我唔見左支太陽油呀, 肥仔幫我搵過都搵唔到, 算吧啦, 好在唔係唔見相機0者, 唔係實灰爆。十二點夠鐘交房, 睇下各走得未, 結果哩左去阿志房睇相, 玩到十二點半先落LOBBY。退房時, 個RECEIPTION話我地打左個本地電話出去要收錢, 我點會識打本地電話呢？跟住佢打番個電話去0個度問, 結果咁係唔使收錢啦。
埋完單, 寄低D行李, 就出去TOWN食飯行街啦, 但係等左差唔多一個小時先等到巴士出去, 去左TGI FRIDAY食LUNCH, 都係美式食品啦, D RIBS好好食。一貫TGI FRIDAY的作風, 員工都比較風趣的。吃過飯後, 就過左去JP再殺, 買番D未買完的手信。
撘車返酒店LU, 但我未買完野, 要殺番去酒店對面間商場再殺埋TEE, 先返酒店集合。當地時間四點半, 就驅車前往機場LU, 即意味著這個旅程即將完結。十分鐘內, 已到達機場, CHECK-IN的程序非常簡單, 已連埋過關的了, 反而檢查行李比較麻煩, 要自己去過X光機, 再去檢手提行李。檢手提行李時要鞋都除埋的, 但我地著住人字拖架啦, 都要除, 痴線。
過哂所有野, 仲有時間剩, 各人馬上拿出所有NDS出來比戰, 結果比戰左十個回合。夠鐘上機LU, 上到機又係例菜無野做, 咪又係聽歌LOR, 聽聽下訓著左, 個頭飛左出去頭口, 而又就快有餐車過喎, 肥仔即刻執番我個頭返黎, 完來UNIQUE又係, 個頭又係飛左出去。肥仔執番我個頭返黎之後, 佢做左樣野, 令到我好開心的, 佢重未在有FD係到時做的, 嘻嘻。
醒左後, 訓唔返LU, 等食, 個餐OK啦, 無國泰的咁難食, 國泰的真係好難食。而全全同ASTLEY不停咁係到打機, 佢地D手語笑死我。又經過四個鐘頭的航程, 返到香港啦, 要同各人說道了, 哥哥黎左接我地, 所以好快咁返到屋企。
後記
乜野叫做渡假, 乜野叫做RELEX, 乜野叫做HEA, 在這個旅程我做足左呢D野, 完全覺得自己放下束縛, 唔使帶腦, 每天只想著如何玩, 點玩。早睡早起, 一覺訓到天光。又HEA到爆, 人字拖走天涯直到返香港。全程與愛人, 好友, 盡情吃喝玩樂, 每天受盡藍天與白雲及陽光與海灘的洗禮, 一樂也。一個簡單而隆重的婚禮, 令我不期然愛上這個地方, 很開心可以分享到佢地的喜悅。這個旅程的每一點滴, 我還在細味當中, 希望將來, 我有幸可以在這個美國領土再一次去享受及踏入我人生的另一階段吧。
沒有留言:
發佈留言