請勿用一套古老的思想跟我說話

是晚與媽媽的對話中, 說及不如第時我不在香港結婚, 將買金器的錢作為旅費, 其實我想買金器的錢比旅費還多。

她劈頭第一句跟我說的聲明是, 你第時唔好怨阿媽一d金器都無買過俾你, 你那時阿婆無買過金器俾我, 你舅母入門都說, 係咪要買番樣金器俾你家姐呢。你第時哥娶老婆, 我買俾佢你唔好話你無。聽後心裏頓時激起一股憤慨, 好想大鬧。會唔會係你好介意無呢？係唔係你買左俾我的分量會同哥相同呢, 永遠都係佢大份我細份架啦, 有同無有分別嗎？哥畢業, 你會由佐敦行到旺角去買套衫, 我要陪你行到腳仔軟, 我畢業時, 你有咁做嗎, 這叫作公平嗎, 我要計, 好多野可以計的, 呢個世界無公平的, 你如何做到懶係公平, 咪還是偏心, 算吧啦, 我心已死, 你由我自由的去吧？切勿再用這種帶有威脅的語句跟我說話。

結果, 我只係拋下一句, 我去唔去第二樹結婚, 我都唔會擺酒0羅, 那場大龍鳯真的很討厭, 試想想婚宴中, 公司的三圍, 有兩圍在互劈, 阿媽如果請哂D"黑忟忟"的親戚, 有一圍每道菜的間段中, 都係在玩排九, 一圍街坊的師奶在高談闊論, 想當年真係由手抱睇到佢大的, 而我就在台上, 任由擺佈, 要想對白, 鍚要鍚幾耐, 又要將D核突陳年相由櫃筒低拎番出黎, 包括埋出賣D朋友, 又要不停咁換衫扮公主, 還有你個女我平時蝦蝦霸霸, 得罪人多稱呼人少, 無十杯八杯落肚我還走得嗎？

我真係不敢想像那時的我是怎樣的。

還有, 要我一手都係金器, 我平時鏈都唔多條, 你要我將一排野放係手, 唔係呀, 講笑咩, 何況我不喜歡金的, 我最鐘意都係個豬牌, 都只不過係貪過癮, 得意咋。將心比己, 每每聽到別人去飲要做人情時, 個個都頂心頂肺, 你自己做人情時都咦咦哦哦啦, 好玩咩, 大家都覺得五百蚊去食一餐唔抵, 咁點解仲要將自己捲入呢個遊戲呢。人越大, 越不想擺酒, 大不了我咪唔結0羅, 同居對我有乜所謂, 況且我又是一條軟皮蛇, 你越逼我, 我越不去做的, 大不了去到三十多歲都未結, 各親戚朋友每問你之時, 我咪幫你答下, 時代唔同啦, 唔興結婚咁lor, 但請不要將你所想的一套附托在我的身上, 我受軟不受硬的。我的心已決, 就算不在外地結婚, 都只會作行禮的儀式。各親戚朋友想跟我分享喜悅, 有心便可以了。