初四無聊日

今日約左肥仔媽&爸飲茶拜年, 因為尋晚佢妹男友上左去拜年LU, 費事佢又煮多次啦, 所以飲茶吧啦。基本上, 整個過程異常快, 因為肥仔只係顧住食, 佢咪飽LOR, 而我唔飽, 因為一來叫得少, 二來佢地又話飽, 我費事再叫了。我發覺, 基本上而家一年先見佢一次爸媽, 溝通技巧對我來說沒有問題的, 問題在於, 他們整家人都不善於溝通的, 死肥仔一句野都唔講, 真係飲茶食飯, 頂, 點呀, 激死我。

終於走啦, 結果我去我的下半場飲茶, 泉舅父發左新年財, 請飲茶, 見番媽媽佢地, 我可以盡情講野啦, 開心哂。但飲茶期間, 發生打鬧事件呀, 係圍嘔那種, 阿伯同後生仔圍嘔, 個後生仔個鼻爆缸, 兩行血流哂出黎, 好在今日唔係坐那邊咋, 平時好多時都坐那邊的。D警察黎得慢, 擾攘左成十分鐘先黎到。我地見到個後生仔拖馬黎, 肥仔話有條皮褸友行左上黎, 個樣好衰架, 跟住D警察就開始黎, 黎完一個又一個, 結果黎左十二個, 仲帶埋膠帶黎封鎖現場, 因為有兇器, 聽講話有人用水壺車埋去。

D人俾警察押哂走後, 又到CID到場啦, 影相, 落口供, 我飲茶飲到三點, 佢地點幾打的, 到我走, D CID仲坐係到飲咁茶落咁口供。迪迪上黎飲茶時, 佢話內內外外警車有成六七架, 白車都兩架, 痴。

飲完茶, 無野做, 就去左鴨寮街買大陸電話, 泉舅父買左雙咭雙號TOUCH SCREEN連電視的, 而我地就買左雙咭TOUCH SCREEN俾爸爸, 貪佢響得夠大聲, 泉舅父那個仲勁, 四個啦叭, 超大聲, 響完一定耳鳴, 兩部電話夾埋都係千九蚊, 超抵。其實而家大陸電話真係好勁, 款靚, FUNCTION勁, 你想要乜就有乜, 最勁係個電視, 天線成尺張的。買完電話, 就去黃金買咭, 買ADAPTER, 超多人, 可能D人無地方去, 黎哂呢到。

買完野都成六點啦, 舅父放工, 各自返屋企拎拜年物品去伯婆屋企拜年, 伯婆一個人住的, 仲要剛跌親, 過年前先從醫院返出黎, 舅父問佢有冇申請平安鐘呀, 佢話有, 咁舅父係到搵啦, 點知伯婆話, 呢咪係個樽到LOR, 原來佢將掛住係身的平安鐘, 放左落個銀包仔, 再用個膠袋載住再放埋入去個樽到, 超爆笑。

舅父教佢, 要掛住, 話佢上次大命啦, 跌親, 坐係到第二朝醒番先去按電話邊的鐘, 唔係次次咁好彩的, 所以要掛係身到, 伯婆佢仲即時示範俾我地睇, 按左打左去姑娘到報平安。伯婆話, 佢申請左都無人教佢用, 要掛係個身到, 所以唔知, 都唔明點解佢D子孫都唔教佢的。

去完伯婆到, 就去左新墟大排檔食飯啦, 今次去左間叫做永利的, 佢個深圳雞煲, 好好食呀, 個汁勁濃, 係個羊腩煲麻麻地, 都係第一檔好食D。但佢咁多人, D小菜都整得唔錯呀, 都幾好。

唉, 明天就要返工啦, 真係唔想返, 唔係因為D利是, 真係唔返架, 但唔返逗唔返咁多利是架啦。